足球筆記 (10)

20070512 - 廣島 0 橫濱FC 2

哇！贏波呀！

作客全取三分兼完封勝，不僅暫時將聯賽失波最多既紀錄送左俾大分，仲可以(暫時)最下位脫出，真係可喜可賀。我地今場大致用番上週中Nabisco杯作客贏FC東京1-0既陣容，即係將大部份本季預定既主將收起，反而踢出驚喜。上半場先憑今季大有進步既難波宏明打開紀錄，跟住完半場前再由精神領袖三浦叔叔來一記遠程左Q笠射拉開比數，哇，真係靚到痺 (雖然我覺得有d神來之筆(呢度同呢度有精華)，仲打破聯賽既最高齡入球紀錄 (當然佢只係一直同自己比賽，而家全個聯賽最大年紀就係佢啦)，搞到我對你真係又愛又恨，I love you hate you丫，King Kazu！最好野就係下半場竟然抵擋得住主隊既狂轟濫炸 (全場射門次數係22-7，我地真係俾人壓住打的)，鐵壁防線終於似番少少樣，上年既菅野孝憲返黎啦。

熱切期望我地聽日能夠贏埋大宮，食住個勢繼續為護級搶分。

另外，高木監督早前講既補強行動終於初見成效，我地幾日前從東京V借得前鋒平本一樹至球季尾。現年26歲既平本一樹係一匹左Q快馬，腳下功夫同射術係賣點，上年響東京V踢出職業生涯最好既一季，聯賽上陣40場入15球外加5次助攻，但今季響人材濟濟既東京V只有幾次上陣機會，所以決定出走一試。單睇數據佢既落底傳中既次數不多，打法應該傾向個人突破，睇睇佢可唔可以憑佢既活力同技術，製造多d空位俾射手型既久保龍彥搵食了。

再另外，前幾日竟然有報導指日本自民黨有意搵三浦叔叔出馬選參議院議員，果然全世界既政棍都係一樣黑，好多都傻上腦的。

足球筆記 (9)

20070506 橫濱FC 0 神戶 3

連對住昇格組既對手都可以主場輸三粒，我地未來護級之路真係愈來愈難行。睇番賽後報導，今場三個失球都響右路出現，但其實上年我地響J2第四循環作客神戶時，其實正係憑出色既側擊至能夠反勝2-1，點解今年我地對住同一個對手，表演卻有天壤之別？仲有丫，高木監督，我求下你拜下你，唔該唔好再用三浦叔叔打正選，我唔係話佢唔掂，事實上佢真係仲幾有腳法又有經驗，但問題係三浦叔叔真係唔夠體力應付J1既比賽，其實用佢做後備殺手可能仲好呢，係咪？

20070506 曼城 0 曼聯 1

Vassell未能替天行道，正一敗家仔，講完。

足球筆記 (8)

好耐冇寫，一次過寫番哂佢。

20070421 - 東京 1 橫濱FC 0

又輸一場，睇番賽後報告，其實兩隊既表演都唔太好，東京只係一味斬高波俾過氣既街霸Wanchope (對唔住，雖然你曾經係曼城既球員，但你真係不掂了) 死滾，而我地就連有效既攻勢都組織唔到，交波頻頻斷纜，所以俾對手把握到一次機會就足以落敗。

20070428 - 橫濱FC 1 清水 1

哇，和波丫，聯賽五連敗後終於拎到寶貴既一分，理應可喜可賀。但係睇番我地下半場和田拓三既入球 (呢度同埋呢度)，其實真係入得好鬼核突，當時奧大介響左路掘個波入禁區，我地兩個球員飛身都掂唔到個波，點知最後搞完一輪竟然俾和田拓三一手推落對手市川大佑度就順勢推埋個波過白界，唉，入都入得唔光彩過人。

回顧番我地聯賽到現時為止所入到既四大球裡面，嚴格黎講真係搵次美妙組織都冇，唔係咩？第一球係J1首戰對浦和時上半場久保龍彥個腳神來之筆，第二球係橫濱打比時早川知伸禁區外偷雞冇越位既胡亂笠射，第三球係主場對名古屋難波宏明響對手禁區人馬踏雜之際亂軍篤入個球先制點，而第四球就係和田拓三呢球推手，唉，真真失禮。

不過算啦，執番一分，就咁算啦，哈哈哈哈。

20070503 - 甲府 1 橫濱FC 0

又輸一場，今季八場聯賽既成績一勝一和六負，唉，咁搞法真係提早收工，尤其對於甲府呢類算做同級既球隊都搶唔到分，前路認真嚴峻。

今場原本先發既內田智也開波前突然體調不良，臨時搵三浦叔叔頂上右中場位置。事實上，開波初段三浦叔叔同埋元代表孖寶奧大介同久保龍彥都炮製左兩次埋門機會，可惜無功而還，點知下半場中段俾對方既後衛增島龍也憑死球戰術一頭建功，雖則打到最後高木監督諗到換入老鬼小村德男打箭頭呢招諗住搏大霧，但始終決定力不足既死穴又再一次累死我地，更造就甲府今季第一次唔駛失波添，問你死未。

話時話，突然諗起我地個三件所謂外援，由開季至今一直提供唔到任何援助，前鋒Gilmar Silva叫做最多出場機會，但勤力有餘把握不足 (雖然唔怪得哂佢，今季負責派牌既奧大介狀態一直低沉)，完全踢唔出上年響東京V既水準，左腳中場Adriano就獨食之餘又喜歡上腳賣弄腳法拖慢進攻速度，而中堅Anderson就從未於聯賽上陣，究竟我地仲應唔應該用埋呢d次級球員而浪費左三個寶貴既洋助人名額？諗諗佢啦高木監督。

足球筆記 (7)

20070415 - 南華 1 傑志 1

而家至得閒寫番呢場大戰，所以係咁而講兩句算數，橫掂南華響東莞都贏到波拎到聯賽冠軍囉。

其實講整體發揮，傑志比南華優勝得多，特別響戰術執行上面傑志班波真係踢到4-3-3既隊型出黎，進攻亦因為中前場球員速度較高，所以踢得有活力，亦較為多樣化，反觀南華今季打死一瓣高波，用迪天奴轟炸對方既防線，配合T史高斯既個人技術同把握能力數糊，季初都仲可以嚇下鬼，但逐漸俾對手洞悉打法，加上迪天奴始終年紀唔細，呢招單天保至尊既威力已大減，而且T史高斯係就係入波多，但問題係佢獨食又貪功，長久真係要諗諗計，唔可以鋪鋪靠李海強射罰波或者遠射架嘛，係咪先？

足球筆記 (6)

20070414 - 橫濱FC 0 鹿島 1

又輸一場。

今場有直播，睇完全場後發現我地今季既表現真有如阿巢既評語一樣：「攻不銳，守不穩」。

先講防守，上年既鐵壁防線變成今年既豆腐渣工程，我覺得最大問題係出響防線前面個對防中完全做唔到截擊同掃蕩 (特別係今場既根占真伍真係完成不見影)，搞到對手可以從容響我地既中路慢慢組織攻擊。如果對手選擇分波走兩邊，我地對閘卻經常谷得前太前，如果對手選擇從中路突破俾直線 (就好似今場鹿島既打法)，我地對中堅又經常因為轉身慢食哂塵，反而對住一d喜歡打高波既球隊 (好似之前對名古屋個場)，小村德男反為有一定既制空能力去頂住對方既高大中鋒，而早川知伸既釘人功夫其實亦唔差。因此當務之急，其實係要搵一件速度同較為靈活既中路守將，搭住小村德男或者早川知伸，可能會有轉機。仲有今場條防線唔知因乜事會用新仔太田宏介打中堅，佢其實正宗位置係左閘或者左中場，唉今場真係睇住佢三番四次俾對方既前鋒走靚位，如果唔係鹿島把握能力唔高，我地其實應該唔只輸一粒的。

至於我地既攻擊方面又係令人搖頭。高木監督近來雖已轉打4-2-2-1-1，用Silva企響久保龍彥後面，希望憑藉佢既速度同個人技術多拉空位同埋做多d二傳俾射手型既久保搵食，奈何睇番今場Silva係好努力，但始終孤掌難鳴，皆因左右中場三浦知良同奧大介狀態真係好差，衰d講句真係一腳好波都無。後面毫無輸送，前鋒線又如何數糊？所以今季經常見到久保龍彥成日要走到番後場搵波上腳，而我地亦應響中場方面做好補強工作。

其實仲有一樣野，就係今季高木監督經常變動球隊陣容，可能係鑑於球員狀態，又或者係因應老將們既體力或傷患，總之就係成日變變變，試問咁樣又如何建立防線既默契？又如何操練進攻既板斧？只見我地今年踢落無論攻守都係一個「亂」字，長此下去唔係辦法，咁搞法我地真係會提早宣佈降班。

我唔係講玩笑鬧著玩的。

足球筆記 (5)

20070408 - 千葉 4 橫濱FC 0

再一次完敗，今季5仗失左14球，究竟我地上季引以為傲既鐵壁防守去左邊度？高木監督既「老人戰隊」體力問題陸續浮現，40歲既三浦叔叔當然唔在講，山口素弘小村德男等主將亦只能踢一場休一場，前線希望久保龍彥又受傷患困擾，搞到前鋒位根本唔夠人用，整體後備力量又薄弱，高木監督今日終於放話，希望再一次從失意軍人中執到寶，唉，早知當初，點解上季季尾要放棄吉武剛同北村知隆兩個中前場球員？

足球筆記 (4)

20070331 - 大宮 1 清水 2

今次日本遊睇既第一場波。大宮一向都缺乏個別突出既球員，所以比較著重打整體戰，但今場表演明顯不及客軍，對方一對箭頭Fernandinho同西澤明訓多次製造威脅，後防高佬高木和道夠穩陣，抵贏。睇落大宮既攻勢非常薄弱，前面吉原宏太早已成過氣既街霸，如果搞唔掂進攻，大宮睇怕都會同我地一樣要護級了。

20070401 - 橫濱FC 1 名古屋 2

噢，久違了的聖地啊，我回來了，但好可惜要親眼睇住我地先入一粒但四分鐘內連輸兩粒，唉。今場平心而論我地整體發揮不俗，高木監督近幾場針對我地欠缺攻力既弱點改打4-4-2，前面用Silva同難波宏明為球隊帶來活力：前者勤於走動，後者亦有把握能力，而後防老將小村德男今場睇實對手高大鬼頭Johnsen亦好稱職，今場問題係出響兩閘位，和田拓三同小野會吉有時谷得太前，遇著對方打反擊就麻煩，加上上季表現一流既門將菅野孝憲輸壞第二球，我地亦只能由贏變敗。話時話，自愛上橫濱FC以來，我有幸入場親眼觀看比賽既戰績係1和2負，究竟我幾時至能夠目睹我地獲得勝利既一刻呢？

足球筆記(3)

20070317 - 川崎 6 橫濱FC 0

成場波俾我既感覺就係四個字：不知所謂。

第一個不知所謂，係我地成隊踢得一無是處。門將菅野孝憲其實已經盡左力，奈何成條防線毫無默契，包抄補位等等完全欠奉，老將小村德男速度極慢，對住對手快速既前線行軍完全束手無策，左右兩閘亦被對方既側擊完全擊倒，中前場亦組織唔到攻勢，內田智也同奧大介上腳機會寥寥可數，三浦知良除左開波早段響禁區右路發難一次之後就唔見左影，箭頭久保龍彥更多次要返後場羅波就知佢完全得唔到輸送。仲有最弊就係我地呢場波不僅「完敗」，下半場仲有內田智也傷出搞到踢唔到，真係雪上加霜。

第二個不知所謂，係講波個位菜肉魚。我理解本埠球評同球迷對日本足球認識可能唔夠深入，但真係唔該各路講波佬呃飯食之前先做下功課至好胡說八道：我容忍到你話高木琢也係一位強調進攻既監督 (實際上睇番上年，我地既成功其實係建基於穩健既防守，進攻好多時都係魚生粥)，我亦唔介意你話內田智也未夠班擔起中場既進攻大旗 (雖然佢其實上年已經係一個被一致睇好既待望新晉)，我真係絕對忍受唔到菜肉魚竟然話：

「川崎前鋒既前身係川崎讀賣」

妖，連呢d基本既事實都可以錯得咁離譜，還請Now TV既資料搜集注意一下。

足球筆記(2)

20070310 - 橫濱FC 1 橫濱FM 0

從來冇諗過會贏到呢場相隔9年再次出現既打吡戰。睇番比賽精華 (呢度)，早川知伸上半場7分鐘偷雞成功帶有運氣，之後對手一浪接一浪既攻擊未能奏效亦係好彩，但係足球就是這樣的，我地J1開齋了，久保龍彥亦再一次展現自己既實力俾老東家睇，等你唔要我丫拿？呵，你會沒有好結果的。

20070311 - 布力般 2 曼城 0

睇完呢場波之後，如果我地今年唔駛降班，我會罷食一次祥利以作慶祝。後防一盤散沙，只有Dunne似樣少少 (話時話佢真係擺脫到以前既大舊衰形象)，Distin照舊懶懶閒，孫繼海？唔該唔好民族主義上腦，佢真係唔掂了；中場Hamann老態盡現，Barton又唔適應打右中場；前線就仲衰，Corradi如果係有貨賣，佢就唔會成為足球浪人了，柱躉式中鋒又唔係，射術精湛又唔係，唔知點解仲要用佢打正選，至於新仔Emile Mpenza又係浪人一名，就算以前所謂高峰期都唔係太好波，又係一件半季用完即棄既球員。

妖，打多個都可以輸多粒，我冇眼睇了。

足球筆記(1)

20070303 - 浦和 2-1 橫濱FC

身為橫濱FC忠實球迷既我呢個星期日日做到冇停手竟然唔知道呢場波香港有得直播所以冇睇到又冇錄到，搞到錯過左我地既史上初J1戰，可算係人生既飲恨事件之一。Master Lo好體貼地安慰我，話橫掂之前幾年你都冇得睇直播架啦，你咪當今日都係冇直播囉，拿，呢d咪就係女人既智慧囉，哈哈哈哈。

講番場波，對住勁旅浦和，我地今場擺到明就係搏和，所以擺出一個4-4-1-1既防守陣式應戰，可惜上半場廿幾分鐘新加盟既後衛和田佑三就擺老烏送大禮，但好彩完上半場前有前國腳久保龍彥既32米長程笠射彈為我地追成平手。哇，睇番Youtube (呢度) 既片段，原來真係入得好靚，久保入波後個風騷樣又真係幾得戚的，岩啦，就係呢種感覺啦，你睇我唔起咩，我就叻俾你睇，熱切期待下星期響我地主場上演既橫濱打呲，我地既「元代表再生工廠」一定要繼續叻俾人睇的。之後以為呢鋪發達啦，1-1喎，拎到一分番屋企就當贏波架啦，點知臨天光俾人搞掂，唉....

不過算啦，我地上得J1就預左要苦戰，況且我已經老早訂下今季既目標，好簡單，就係...

「J1殘留」