足球筆記 (7)

20070415 - 南華 1 傑志 1

而家至得閒寫番呢場大戰，所以係咁而講兩句算數，橫掂南華響東莞都贏到波拎到聯賽冠軍囉。

其實講整體發揮，傑志比南華優勝得多，特別響戰術執行上面傑志班波真係踢到4-3-3既隊型出黎，進攻亦因為中前場球員速度較高，所以踢得有活力，亦較為多樣化，反觀南華今季打死一瓣高波，用迪天奴轟炸對方既防線，配合T史高斯既個人技術同把握能力數糊，季初都仲可以嚇下鬼，但逐漸俾對手洞悉打法，加上迪天奴始終年紀唔細，呢招單天保至尊既威力已大減，而且T史高斯係就係入波多，但問題係佢獨食又貪功，長久真係要諗諗計，唔可以鋪鋪靠李海強射罰波或者遠射架嘛，係咪先？