慶你個頭

繼上年震撼非常既《熱愛基本法》之後，特衰政府再次推出另一首樣辦歌曲《始終有你》，作為「慶祝」香港回歸十年既主題曲。哇，咁厚禮，我等好事之徒當然立即要去官方網站聽一聽睇一睇，哇哇哇，原來仲有卡拉OK版添，呢次發達啦，本埠親中派終於有新歌仔唱了，唔駛次次搞乜鬼所謂國慶/國民教育活動都係唱《我的祖國》咁悶蛋囉。

起首以為呢首樣辦曲只會再一次成為港人既笑話，點知試聽後我又覺得比想像中好喎。金培達既曲四平八穩，副歌都算易上口，而陳少琪既詞亦無太明顯既國家同民族包袱，其實輕輕鬆鬆咪好囉，唔駛次次都咁hardcore嘛，但係…但係…可唔可以唔好搵埋莫華倫李龍同阿女變成既尹飛燕響裡面一人唱番句搞到首曲不倫不類格格不入呢？我並非否定上述幾位前輩既藝術造詣同成就，只係覺得官府既蠶虫師爺們點解可以諗埋哂呢d屎橋出黎，以為響首K歌裡面加入各界藝術代表就可以象徵到本埠上下一心慶回歸下哇？

之但係我稍後細心研究一下呢支曲既歌詞，我又睇唔出同慶回歸有咩關係喎。就以重覆又重覆既副歌黎講：

香港始終有你　讓萬眾掌聲響一世紀
香港始終有我　十萬個驚喜多一世紀

拿拿拿，如果要分析呢支曲既重心同作詞人想表達既訊息，「始終」兩字乃關鍵所在也。

究竟何謂「始終」呢？我地可以用以下兩句例句去理解一下：

例句一：程亮係就係唔夠專一，不過佢始終都醒目過得得地喎，常在心呢次真係難揀啦。
例句二：舅父波係就係貪錢左d，但係佢始終都算係唐家既一份子，大契趕他走未免太絕情了。

各位睇下，「始終」兩字其實或多或少帶著一種雖然有一樣負面既事擺在眼前，但幸而有另一樣野作出補救或者平衡下既意思。如果套用呢個分析響呢首所謂用黎「慶回歸」既樣辦歌上面，即係陳少琪可能係想話：雖然特衰政府響回歸後搞到香港一鑊粥，但係好彩有我同埋有你呢d小市民合力補鑊至拆得掂咁解囉，因此香港今日死唔去，係因為多得有我地自力救濟，而一d都唔關特衰政府事囉。

所以呢排成日話慶祝慶祝，我就話慶你個頭。撫心自問，今日生活在香港的你，比十年前來得快樂嗎？