橫濱FC - J1悲願昇格達成！

隨住今日作客鳥栖時Alemao下半場一戰定江山，我地終於確定得到J2冠軍，取得下年昇級至J1既資格。

6年，足足6年。身為遠在香港既橫濱FC球迷，我知道消息後真係好激動，激動之處不單在於我們升到班，而係在於我地從6年前既萬年弱旅，經過6年經營，終於達成昇格呢個目標既奮鬥過程。

要知道我地並非財雄勢大既傳統勁旅，冇能力一擲千金狂買大牌球星打造鑽石陣容，我地只係6年前由一群前橫濱Flugels既球迷籌組而成既球隊。當年因為橫濱Flugels金主全日空唔肯再出錢搞波，一眾球迷唔忍心睇住自己既愛隊被迫解散，故此球迷們有錢出錢，有力出力，以市民會社形式組成一隊真真正正屬於橫濱市民既球會。我自己就係俾呢份兄弟班既「地味」感覺深深吸引，因為足球從來都唔係大老闆或者自覺資深既球迷既專利，足球係一種全民運動，係一種可以令到一個地區，一個城市，甚或一個國家得以更加團結既共同語言。

起初兩年，我地既成績可謂慘不忍睹，但過去幾季，我地好慶幸得到幾位曾經失意於頂級聯賽既沙場老將加盟，尤其一班前日本國腳城彰二、三浦知良、山口素弘同小村德男等既鼎力相助，以佢地既豐富經驗，配合一批如Tweed、Augusto同埋Alemao等優秀洋將既支援，帶領我地以菅野孝憲同內田智也為首既年青球員急促成長，一步一腳印地達成昇格既終極目標。

來年，J1見！

納米豪宅？

本來想寫另一個題目，不過hold住先，因為呢幾日睇電視同報紙，見到本埠某地產發展商鋪天蓋地既樓盤廣告，標榜其新盤住客可盡享「納米海濱貴豪生活」喎。

據我呢個科學白痴既理解，「納米」者，即係一米既十億份之一 (唔好問我有幾多個零，我數學程度只有小學六年級，總之係好微細啦)，乃一度量單位而已，本質上同毫米或者厘米冇分別，咁點解呢個新盤又可以叫做「納米」呢？我諗左幾日，可能班宣傳大員有以下既弦外之音：

• 呢個新盤既單位大小，只係好似「納米」呢個概念一樣咁纖細；
• 呢個新盤既單位大小，全部係以「納米」黎做量度單位，令一眾買家買樓時自我感覺良好，可以大大聲同人講哇你睇我個單位既實用面積有成xxx,000,000,000,000.... 納米咁大丫有咁多個零頭我住既唔係豪宅係咩丫；
• 呢個新盤既單位，可以望到只能用「納米」黎做量度單位至計得掂既「海濱」景色；
• 呢個新盤既住客，雖然可以過住「海濱貴豪生活」，但呢種咁中產咁優雅既生活原來只屬「納米」式，即係人地d大戶人家個個星期環遊全世界去唔同既「高而富」球場落場打番十八個洞既同時，呢個盤既住客就只能去個d處於鬧市既所謂golf club (唔係「高級」)，對住幅空地係咁開波開足兩粒鐘跟住同人講喂我成日都去打「高而富」球的唔係貴豪係咩丫，又或者係人地d大戶人家每年飛去法國波爾多既私人酒莊品酒同大宴親朋既同時，呢個盤既住客就只能落樓下既百佳 (你放心一定唔會有惠康的) 買支唔知邊度出產既紅酒跟住仲要為左易入口少少所以溝埋可樂一齊飲又同人講喂我而家飲wine丫唔係貴豪係咩丫；或者
• 呢個新盤既住客全部都係「納米」一族，即係每個月既人工好「納米」，每個月份糧供埋樓之後就變得更加「納米」。

究竟下次本埠既地產商賣新盤時，仲可以用咩噱頭呢？

娛樂短打

近排公私兩忙，放工唯一娛樂變成睇電視，點知唔睇尤自可，一睇就把幾火。

《肥田喜事》

三個字：「雷聲大，雨點小」。胡杏兒其實幾有觀眾緣，可惜呢次中空寶囉，皆因呢套所謂重頭劇一來劇情嚴重反智，二來竟然用犯眾憎既老鼠安做男主角，三來搵件一年三百六十五日全天候三百六十度廿四七都自以為自己好靚仔又高大又識彈琴又大隻又有對殺死人既迷人眼睛既高某扮靚仔。大佬丫，高某個款係唔錯，但唔係型得很個隻囉。我起初以為佢因劇情需要至要咁作狀，點知上兩星期睇佢上《15/16》佢都係咁既死款，連企響度拎住支咪都要側側身丁字腳雙手插袋成個瀟灑哥咁既樣，但係又講野講到一舊舊同埋語焉不詳言不及義，唉，港男冠軍喎...

真係笑死我囉

講開TVB，我真係想有番《K-100》，等我可以上去自由講囉。大佬丫，明明已經有首席喜劇泰斗林某同埋本埠播音王子梁某坐陣架啦，而家仲要搞多個節目俾本埠殿堂級笑匠杜某擔大旗。哇，真係笑死人唔使本咩？

明星夢

前陣子響電視精+行家mon姐個blog度睇到以前TVB個位小演員「東東大師」既近況，佢已經由一個老積童星進化成一件MK潮童，唉，睇到都真係幾唏噓咁囉。須知每一行都係你睇我好我睇你好既門面野黎姐，你睇到當下既明星天王天后表面風光，萬人景仰，但我好相信佢地響背後一定有下過苦功至有今日既光景囉，台上一分鐘，台下十年功丫老友。

你班靚仔靚妹自恃有幾分姿色 (拿拿拿，真係幾分架咋，響現今世代各位型男索女都或多或少懂得打扮既情況下，真係十八冇醜婦的) 就成鬼日發埋哂d明星夢，一個二個未學行就先學走。我覺得發夢唔係問題，但重點係你有冇實現夢想既實際行徑，套句台灣政界既述語，即係你既「執行力」有幾高？當你發你既春秋大夢時，又有冇同時擬訂具體既行進計劃？有冇咩短期、中期同長期目標？只說不做有幾難，週不時都響網上見唔少呢d講就天下無敵做就無心無力見埋真人就只覺佢不自量力既傻仔傻女出沒，但又有幾多可以講得出做得到 (或者起碼認真地嘗試去做)？前排我睇番TVB收費電視既《無線大寶藏》，有兩集係播番TVB既一哥一姐們以前做新人時既訪問或者片段，好多你今日見到大有成就既明星，其實入行前都真係對戲劇工作有濃厚興趣，讀書時有參加劇社既活動，甚至有部份會度埋劇本做埋導演，入到藝訓班後學習主動之餘，又肯虛心受教，尊師重道，到你畢業後又要做好多年路人甲乙丙至熬出頭來，機會得來不易。單憑一顆虛榮心，我唔相信佢地可以撐得咁耐。

或者你會話，你條老餅駛唔駛咁認真丫，我都係諗住唱下歌玩下姐，但娛樂圈呢口飯根本就唔係想像中咁易食，皆因呢行既可預期性太低，實在有太多太多你無法控制既外在因素決定你能否一夜成名，君不見好多有外型有內涵有食力既藝人撈足三十年都只係梅菜一條，反而有d你睇落去就覺唔順眼聲大大冇貨賣既茂利可以長做長有？答案點解？咪就係冇得解囉。此外，呢行人際關係同交際手腕好重要，但偏偏呢樣野就好講每個人既際遇同彩數，唔係你話你好勤力好有心就搞得掂囉。仲有丫，你又有冇諗過假若你真係咁好彩俾你紅到，你又會私隱盡失毫無自由可言，一舉一動都有本埠傳媒同師奶兵團日日同你做道德評估，你又頂唔頂得住呢d活在放大鏡下既日子？

所以，響發明星夢之前，務請各年青人三思，三思。