視評數則

哇，望一望至醒起原來成個幾月冇更新過呢度，都係快刀斬亂麻係咁易撩幾筆視評，免得各路仇家誤以為我已玩完。

三五台革新

其實三五台次次有新官上任都總會有三把火架啦，但今次新人事新作風得來更揚言來一鑊大刀寬斧式改革，單係改台徽都用左成百粒，唔知銀彈政策下又會唔會醫得掂呢頭病馬呢？計我話，如果三五台真係想響本埠免費電視業能有立足之地，就千祁咪再重蹈覆轍學人搞埋d咩劇集了，與其同TVB鬥拍那堆總係以不同背景同職業包裝但到頭來五集打後必定走入三四五六七八角婆媽戀愛情節，倒不如好似而家咁集中火力專攻短小精幹既半小時至一小時知性雜誌式節目，例如搵陶健筆搭賜官再加劉綽琪整返次"犀牛俱樂部"re-u都應該幾有睇頭，但找來如響娛樂圈楝篤左好多年都唔太好笑既張達明、一味只識響每句說話後面都"woo"一聲既DJ莎拉，同埋前TVB懶音Eleven主力行姐 (睇下呢度就知點解) 呢d過氣既街霸，就真係搵鬼睇了。 平心而論，三五台積弱多年既最大問題，在於佢地雖然偶有佳作，但始終俾唔到觀眾一種長期而持續既優質製作，就好似睇煙花咁爆幾下哇好響丫哇好靚丫之後就靜鬼哂，觀眾次次都俾你地耍，久而久之自然對你冇信心。

TVB鄧某

據聞鄧某乃志雲大師親自欽點之愛將，希望再次發揮點石成金之威力喎。之但係呢，正如我之前所言 (係丫，我既"pon"好多都係炒冷飯的，真係幾悶)，雖則娛樂圈一向都咩冇路捉，但起碼受歡迎既藝人都有一個共通點，就係要有觀眾緣，亦即俗話既"入到屋"囉。鄧某自參加新秀入行原來已有11年，但一直浮浮沉沉：唱歌嘛，起初有首"朋友二號"都叫紅過下，但個人認為唱腔太刻意模仿陳奕迅 (講起呢d樂壇A貨真係搵日要另寫一篇詳談至得)，而且技巧極度幼嫩，一味擘大喉嚨死嗌就以為自己好有感情，其後總係覺得自己乃非池中物，決定往外闖喎，最後兜兜轉轉咪又係要死死地氣返老家，但家陣睇佢做"味分高下"，卻仍然只係一味講埋哂D唔好笑既笑話，仲要周不時窒住搞氣氛一流既哈林哥以為自己很風趣 (係，其實我都成日以為自己很風趣的)。有時做人呢，真係唔好睇得自己太高，要時常懷著謙卑之心，皆因天外有天，人外有人丫老友。

最緊要健康

而家逢星期三晚我地中醫呢都會見到一位前TVB新聞記者響到做節目，咁我地中醫呢其實我覺得上一輯幾好睇的，之但係我地中醫呢唔知點解響短短半小時既節目裡面呢位前記者都會好刻意地將"我地中醫呢"呢幾隻字掛響口邊囉 (我真係有數住架，例如我地中醫呢今晚就講左7次了)，我覺得呢我地中醫呢未免太醜怪了，還望TVB方面可以我地中醫呢向此人提點一番。講真，如果佢真係好想全港觀眾知道佢現時乃一名中醫呢，咁我建議我地中醫呢不如好似泛民搞一人一信表達2012普選訴求咁樣，由TVB印定一大堆寫有"我清楚知悉黃XX女士乃中醫一名，我覺得她巧威威唷！"既意見書，等我地簽個名就可以寄番俾TVB咪得囉，OK？