2006世界杯 (第20日 - 十六強)

巴西 3 加納 0

或者加納教頭Dujkovic對佢地條防線真係好有信心，竟然選擇以佈越位黎對付巴西個班具備速度同個人突破技術 (除左佢地著9號波衫個件前鋒) 既中前場球員，三球裡面有兩球都係輸裝越位失敗，真係抵輸三蛋。平心而論，加納今場響晨早落後一球要採取主動既情況下表現已經好好，Amoah同Draman響前線好活躍，仲幾次迫到Dida要駛出真功夫，都唔算太失禮囉。

法國 3 西班牙 1

法國今場返哂黎贏波，全靠有Vieira聯繫攻守。佢不單只做到中場掃蕩既工作，更加係球隊發動轉守為攻時既起步點。法國今場班波打反擊既模式，其實同當時有Vieira、Wiltord、Henry同埋Pires (今屆冇份玩) 在陣既阿仙奴好相似，都係轉守為攻時一條友帶波響中路推進，左右兩邊就有兩件高速前鋒響度大奔走等接應直線，呢種流暢既打法相當賞心悅目。至於西班牙就死哂火，今場受制於法國個條死都唔肯谷前既防線簡直一籌莫展，Raul欠缺活力，Torres始終都係獨食左少少，仲有左閘Pernia今場實在谷得太前了，搞到法國響右路如取如攜，最終只能靠David Villa個球靚到痺十二碼入波。

2006世界杯 (第19日 - 十六強)

意大利 1 澳洲 0

從Hiddink去到下半場尾段都只係換得一件，就知道佢想搏加時兩隊體力下降後至換入佢既愛將Kennedy去前場做柱躉 (秘密武器黎架)，甚至摸和射十二碼兩個只能活一個，可惜事與願違，臨天光俾個球證玩死，真係不抵到痺。一句到尾，個球我唔覺得要俾十二碼，意大利真係好彩，之但係佢地咁屎既攻力就算俾你入到四強都只有死路一條，仲有Nesta同Materazzi下場唔出得，條防線仲會唔會咁穩陣呢？

烏克蘭 0 瑞士 0 (十二碼：3-0)

五五波一場，瑞士雖敗猶榮。烏克蘭今屆死好命抽條好籤，呢d球隊俾佢過到骨真係睇到人眼怨，所以八強我決定訓身支持意大利擊倒"符碌足球"。

2006世界杯 (第17日 - 十六強)

英格蘭 1 厄瓜多爾 0

英格蘭今場改打4-5-1，J. Cole同Gerrard負責中場較炮，但打少件箭頭真係差好遠，搞到成場波都係中場混戰居多，前線既Rooney雖則速度唔慢，但佢係個類有人餵到波俾佢至搵到食既前鋒，今場佢就係欠缺輸送，所以表現一般，搞來搞去最尾都係要靠老大哥Beckham既死球一箭定江山，下場對葡萄牙未必再咁好彩的。至於厄瓜多爾其實已經盡哂力，Hurtado繼續響後防一夫當關，可惜一對撞死馬箭頭Delgado同C. Tenorio表現普通，佢地殺到入十六強都算超額完成了。

葡萄牙 1 荷蘭 0

十六黃四紅，究竟佢地想打波定打人？呢場暴力足球既精髓唔係Maniche入個球 (雖則呢球葡萄牙既組織真係好靚)，而係當你見到Boulahrouz一野倀雞腳搞到C. Ronaldo碌脾有個窿、Figo俾人一睜批到塊面紅哂同埋Sneijder成個爛仔一樣有乜事都第一個湧埋去「咩丫咩丫」咁同人推撞搞到件衫心口上面個"20"號燙字甩出黎咁滯之後，最尾竟然影到Deco、Van Bronckhorst同埋Van Bommel三個球會隊友排排坐響場邊一齊睇波呢個反高潮喎，在在印證「上場冇父子」呢句至理名言，哈哈哈哈，足球就是這樣的。

2006世界杯 (第16日 - 十六強)

德國 2 瑞典 0

攻防戰。德國攻足全場，但瑞典本身又真係好唔爭氣成隊走哂樣，前鋒Ibrahimovic全場受制於德國中堅Metzelder，中路防守更加係一塌糊塗，輸第一球就係俾Ballack響中路直搗黃龍至俾Podolski執雞，輸第二球又係三件中路守將走哂去娥眉月頂既Klose個邊至搞到Podolski梅開二度，加上Lucic兩黃一紅，Larsson個球十二碼又宴客，唔輸至奇了。

阿根廷 2 墨西哥 1 (加時)

兩隊合演一場好波。墨西哥今場防守打得好好，球員走動多，盡量減少空位令阿根廷班中前場可以用"x"同"Δ"掣做短傳組織既機會大幅減少 (特別係Osorio睇到Tevez實一實，好野)，雖然聯繫攻守既Pardo傷出，但入替既Torrado亦做到掃蕩中場既工作，前線Borgetti走動唔多，但位置感好經驗搭夠總係走到靚位，打到加時至輸波都算雖敗猶榮。至於阿根廷開波輸個球Heinze要負好大責任，竟然可以俾Marquez從後場衝入禁區，但又不得不讚佢地下半場睇準兩隊體力下降既時候換入Messi令到成隊波生哂，最後M. Rodriguez入個球左Q窩利又真係好鬼靚喎。

2006世界杯 (第15日)

烏克蘭 1 突尼西亞 0

因為突尼西亞贏波就好有機會出線，所以我好醒地揀呢場黎睇，點知悶到我嘔。可能天氣太熱既關係，兩隊都好似唔願走咁樣，大家行行企企輕輕鬆鬆又收工，唉。烏克蘭入到十六強完全係靠執到條好籌姐，對住瑞士肯定冇運行，我話既。

西班牙 1 沙地阿拉伯 0

西班牙話就話全隊後備上陣咁滯，但Raul、Fabregas、Reyes同Joaquin呢班人根本就具有正選既實力，真係令其他球隊欣羨，熱切期待佢地十六強對法國既大戰。

法國 2 多哥 0

好正路既一場波。轉打4-4-2既法國面對多哥個條唔知想點既防線 (我睇左佢地三場波都仲係唔知佢地想點的)，自然成場係咁壓住攻，如果唔係Ribery係咁響門前敗家，應該唔知贏兩粒的。至於多哥，我真係睇咁耐都唔知佢地想點，特別係前鋒Adebayor極度獨食，甩左波又唔追波，追唔到波就指住隊友埋怨埋怨再埋怨，呢d咁既球員真係你愛了。

瑞士 2 南韓 0

瑞士今屆表現令人驚艷，唔打明星唔打名氣只打團隊同組織，而且防守異常穩健 (佢地係分組賽階段唯一一隊冇失波既球隊)，真係要講句「瑞士，賣飛佛！」至於南韓都可算光榮出局，反勝多哥迫和法國喎，日本得唔得先？

2006世界杯 (第14日)

意大利 2 捷克 0

捷克今場再輸波，一方面係輸俾意大利個條好穩陣既防線，但另一方面我都好同情佢地前線缺少左Koller (今場連另一個高佬Lokvenc都冇埋)，只能夠用狀態不足既Baros搏殺，中場Nedved孤掌難鳴，Rosicky越踢越沉，明明隊波第一場仲踢得好好，點知又受傷又停賽搞到可用之兵愈來愈少，出唔到線相當可惜。

加納 2 美國 1

加納由Essien同Appiah領導既反擊係幾有效率，但今場佢地真係要多謝美國既極品後衛Onyewu禁區犯手球，冇你加納又邊度會有球十二碼呢？

巴西 4 日本 1

日本出局真係抵死。今場雖然繼續打4-4-2，一對後備箭頭亦勤於走動 (玉田圭司個球窄角度入球射得好靚架喎)，但條把鬼防線完全冇向巴西班進攻球員作出壓迫，導致後場大把空位俾對手起腳練遠射，搞到川口能活左飛右撲好不得閒，最尾輸四球咪好彩囉，但係最最最羞家既係，連跑唔郁跳唔高既Ronaldo都可以入兩粒 (你睇佢上半場跳起頂入第一球時中澤佑二走甩佢之餘連跳都費事跳就知呢條防線有幾差)，你話醜唔醜呢？Zico，你都係返巴西做體育部長算啦，你其實唔識教波架。

澳洲 2 克羅地亞 2

我撐澳洲，因為佢地班波夠拚搏，全隊上下一心前仆後繼為爭出線好鬼好睇，十六強睇佢地好過睇克羅地亞啦，係咪？

2006世界杯 (第13日)

葡萄牙 2 墨西哥 1

兩隊都收起主力球員，但後備上陣既球員一樣對攻，都幾精彩。上半場葡萄牙Maniche個球充分表現佢地既團隊組織，但防守有少少鬆懈，而且入到十六強要硬碰荷蘭，到時肯定打甩脾。至於墨西哥缺少防守中場Pardo聯繫攻守，總覺得有點混亂，下一場對住阿根廷中前場水銀瀉地式進攻，防線恐怕會受到嚴重考驗。

安哥拉 1 伊朗 1

冇睇，只係睇到安哥拉失波後班友互相指責，好過癮。

阿根廷 0 荷蘭 0

本來或者真係一場世紀大戰，但尋晚響兩隊都坐定粒六收起半隊主力之下就變左世紀悶場。阿根廷上半場初段谷左一輪雖無斬獲，但睇到Riquelme點樣一個打哂同埋Terez既活力都唔錯既，荷蘭收起Robben邊線立即死哂火，成場波中場混戰多，都係等睇十六強好過了。

科特迪瓦 3 塞黑 2

兩隊都係晨早出局，話知你地打到曉飛都冇用啦。

2006世界杯 (第12日)

德國 3 厄瓜多爾 0

慢熱的德國開始上力了，面對收起半隊主力既厄瓜多爾輕輕鬆鬆鄧梓峰就入三粒，至於厄瓜多爾雖然輸波，但我仍然睇好佢地對箭頭Delgado同埋C. Tenorio十六強繼續撞死馬。

波蘭 2 哥斯達黎加 1

例行公事，冇睇。

英格蘭 2 瑞典 2

雖然J. Cole笠死個球真係好乖巧 (都話佢好fit架啦)，但係下半場佢地整體既表現就恐怖囉。面對瑞典既狂轟同死球攻勢，成隊表現慌失失，一對中堅Terry同Campbell更加係輸第二球既罪魁禍首，一個就頂空氣，一個就凌空哂靴，真係唔得你死，入到十六強仲要冇埋Owen，問你點打？仲有丫，Rooney小朋友，你被換出後咁唔好老脾，不如一拳「窩」埋Eriksson度丫笨。

巴拉圭 2 千里達 0

例行公事，都係冇睇。

2006世界杯 (第11日)

瑞士 2 多哥 0

瑞士整體發揮不俗，攻勢主要集中兩翼側擊，後防一對中堅Mueller同Senderos好穩陣，係打整體戰既最佳演繹。至於多哥都係個句，唔係咁知佢地想點，前線一對箭頭過於獨食 (特別係Adebayor)，進攻板斧唔多，左猜右猜一輪最尾都係要靠個人硬闖，咁搞法最後一場對法國睇怕都冇運行了。

烏克蘭 4 沙地阿拉伯 0

烏克蘭一洗烏氣，一次入返四粒補數。烏克蘭贏到波唔係佢地打得特別好 (雖然Kalinichenko表現好搶鏡)，只係沙地表現太差，特別係防守時毫無壓迫，烏克蘭攻到去三閘線都仲係懶懶閒大把空位任人舞，加上應付高空波能力極差，唔輸至奇。

西班牙 3 突尼西亞 1

突尼西亞一開波偷到雞真係好波，呢球西班牙又真係抵輸架喎，Mnari射第一腳俾Casillas救出後成班友都冇人去跟波，個個企響度睇戲，難怪可以俾Mnari執雞啦，但又真係不得不讚西班牙半場換入Raul同Fabregas既調動，Raul位置感一流 (睇佢執雞個球就知，Boumnijel一拍個波出黎佢就已經預計到個波會跌響邊)，Fabregas傳射盡顯功架 (你睇第二球佢交俾Torres個球大直線真係好通透架喎)，但最恐怖既係，呢兩條友都只係打後備，問你驚唔驚？

2006世界杯 (第10日)

日本 0 克羅地亞 0

兩隊雖不乏埋門機會，但把握能力不高，所以和波都算合理。日本今場放棄翼衛打法轉打4-4-2，攻擊主要響中路發動，但中村俊輔表現一般，中田英壽雖有一兩腳具威脅射門但始終徒勞無功 (呢條友完全唔願意防守的)，一對正印箭頭繼續發夢，下半場入替既速度型左Q玉田圭司亦無甚表現，而防守方面更加恐怖，隊長宮本恆靖輸個球十二碼明顯睇到佢羅位極差，明明mark住對手都可以俾人側身推過，咁搞法下場對巴西個堆走位靈活既前鋒就真係兇多吉少。至於克羅地亞表現都只係普通，響日本對閘今場刻意縮後之下，Prso冇上場咁活躍，可幸有另一個前鋒Klasnic搭夠。

巴西 2 澳洲 0

兩隊既後防今場都好離譜，從澳洲輸第一球可以睇到佢地班後衛欠缺壓迫，可能驚拍得太埋會俾巴西班高速球員一推就過，所以連成場都跑唔郁既Ronaldo都可以輕輕鬆鬆助攻俾Adriano搞掂 (Ronaldo企響度都仲可以引到三個後衛埋去拍佢喎)，但巴西條防線都唔好得去邊，Roberto Carlos打到上前場咁滯，令澳洲下半場落後死谷之下既攻勢一浪接一浪 (尤其後備上陣既Bresciano表現唔錯)，如果唔係Dida有水準演出，巴西未必贏到波的。

法國 1 南韓 1

法國初段表現唔差，亨利入個球展示出佢既走位同入楔技巧 (如果發揮到的話) 真係世上數一數二的，呢一球亦同時暴露到南韓後防既弱點，一對中堅崔鎮哲同金永銖轉身太慢，對住法國呢類前鋒速度夠快同走位夠靈活既球隊會好蝕底。平心而論如果無左個球誤判，戰果或者會改寫。至於南韓表演唔算太好，全場俾對手壓住攻，反擊亦冇咩威脅，和到波都算好好彩。

2006世界杯 (第9日)

葡萄牙 2 伊朗 0

葡萄牙全場壓住對手打，戰果合理。佢地雖有Deco復出並且入左球遠射，但係佢同埋C. Ronaldo同Figo都係個類上腳型球員，三個和尚爭水喝反而令到條中場線有少少不知所措。右閘Miguel呢兩場表現都好好，攻守全面，好野來的。最後奉勸C. Ronaldo一句，你都係快d去拜拜條龍門柱啦，兩場都中楣中柱，唔老黎喎。

加納 2 捷克 0

捷克真可憐，一開波Ujfalusi就輸球大意波，真係唔得佢死，搞到成隊波迫住強攻，反而岩哂團隊意識較強既加納打快速反擊，加上Koller缺陣對捷克既負面影響真係好大 (你睇頂替佢既Lokvenc全場失蹤就知佢既重要性) ，如果唔係Cech打到上哂身，加納應該唔只入兩粒的。

意大利 1 美國 1

三個字："呢場波，好混亂"。兩隊都因為有球員被趕出場而弄得陣腳大亂，所以全場都處於混戰，但不得不贊美國今場波真係有改善，上場踢得極差既Onyewu今場表現勇猛，左路既Convey亦有唔錯既演出。呢組形勢亂七八糟，最後一round肯定好緊湊了。

2006世界杯 (第8日)

阿根廷 6 塞黑 0

大屠殺。阿根廷既進攻水銀瀉地，傳送精準流暢，球員技術細膩之餘亦有靈活走位組織，睇佢地做波既感覺，就好似打winning時係咁用"X"掣短傳一樣，呢d咪叫球味囉。反觀塞黑就真係一舊屎，正如上場一樣，一對箭頭Milosevic同Kezman狀態真係好差 (後者仲做埋紅牌阿姑)，球員又完全冇鬥心，睇怕最尾一場對科特迪瓦都好牙煙，分分鐘要做「三零部隊」。

荷蘭 2 科特迪瓦 1

有科特迪瓦就有快上快落既足球睇。兩隊上半場開波就鬥攻，荷蘭英超三寶狀態好fit，特別係Van Persie助攻助守打法勤力，入個腳左Q罰球盡顯功架，而且不得不提老將Cocu，有佢響中場掃蕩真係好放心。至於科特迪瓦果然今場打多左兩邊，但始終比較側重個人主義，班友個個都係上腳就死去，但從B. Kone入個球又真係睇到佢地腳法好好架喎。

墨西哥 0 安哥拉 0

悶波一場，兩隊頻頻斷纜。唯一有睇頭既係安哥拉門將Joao Ricardo成場左飛右撲，演出可人。

2006世界杯 (第7日)

厄瓜多爾 3 哥斯達黎加 0

厄瓜多爾以整體戰為主，打法簡單直接，全場控制戰局，一對箭頭Delgado同C. Tenorio把握能力認真唔錯，後防Hurtado繼續一夫當關，整體表現實而不華，但首兩場對手太弱，入到16強至有真正考驗。至於哥斯達黎加成隊狀態都好差，今場明知非勝不可但班波都係懶懶閒，成隊最有鬥心個件反而係下半場入替既Bernard，真係唔到你唔出局囉。

英格蘭 2 千里達 0

英格蘭今場戰術有明顯改變，唔再獨沽一味斬高波俾Crouch做二傳，兩邊翼衛A. Cole同Carragher亦冇谷得咁前，反而多左響中距離射門 (可惜Lampard幾球撞射都越楣而過)，下半場換入Rooney同Lennon後成隊生左好多，最尾Beckham響右路set埋中路俾Crouch頭鎚入波真係幾靚，而千里達則繼續一貫穩守突擊打法，後防高佬Lawrence看管Crouch表現唔錯，但就係走漏一次足以致命，下半場又係換入速度較快既Glen諗住搏一粒，但礙於質素反撲無力，下場想出線要贏巴拉圭之餘仲要靠英格蘭打敗瑞典，睇怕都係冇符。

瑞典 1 巴拉圭 0

好悶的一場波，雙方射門次數雖多，但無幾可命中目標。瑞典上半場有Ibrahimovic既時候打得唔錯，但下半場一換入Allback之後就真係"痾拔甩"，但又估唔到佢臨尾set到個波俾無人看管既Ljungberg頂入，真係吹佢唔漲。巴拉圭今場表現又係令人失望，Santa Cruz魂遊球場，Valdez雖努力鑽營但徒勞無功，表現比較好既只有救左幾球波既後備門將Bobadilla。

2006世界杯 (第6日)

西班牙 4 烏克蘭 0

好一場攻防戰。西班牙全場壓住對手強攻，中前場一眾球員默契唔錯，但似乎未受真正考驗。至於烏克蘭我好同情佢地無啦啦輸左球十二碼，但整體表現真係好差，後防鬆散，中場受制於西班牙既壓迫防守且欠缺創造力，成場波左猜右猜始終都俾唔到波Shevchenko，咁既情況下就算佢曉飛都冇用啦，之後個兩場分分鐘俾兩支亞非球隊偷到雞。

突尼西亞 2 沙地阿拉伯 2

雖然戲碼好弱，但兩隊全場搏拳又幾刺激架喎。整體表現黎講沙地認真唔曳，尤其佢地既反擊真係好鬼有效率，入個兩球都只係用三兩腳波就成功埋門，至於突尼西亞就不過不失啦，攻勢主要集中響Trabelsi打既右手邊，佢地臨尾追返和又真係好鬼野。

德國 1 波蘭 0

波蘭雖敗猶榮。門將Boruc打到上哂身，而且由隊長Bak領導既防線打得都算唔錯，臨天光輸個球實乃非戰之罪，怪就只怪有件中堅無啦啦走左埋去Odonkor個邊幫波，搞到老鬼Neuville後上成功囉。至於德國方面，Lahm表現繼續搶眼，Ballack就普普通通啦，但對箭頭就認真麻麻，特別係降班射手Podoski頻頻失機，真係睇到眼火爆，下場不如落Klinsmann啦。

2006世界杯 (第5日)

南韓 2 多哥 1

南韓打出精彩一仗，半場壓迫式防守令對手全場難以組織攻勢。朴智星雖然俾人mark得好緊，但李天秀、李榮杓同後備入替既安貞煥均表現活躍，特別係對手打少一件後更完全搶得主動，幾個進攻擊球員響蛾眉月附近製造左唔少威脅。相反多哥整體表現除卻入波既Mohamed Kader偶有個人突破外其實不太突出，感覺有點不知所措，真係攻唔係守又唔係，都唔知佢地想點。

法國 0 瑞士 0

法國整體表現令人失望，雖然Zidane同Wiltord好努力響製造攻勢，新人Ribery亦響左路積極鑽營，但一著起國家隊球衣就會魂遊球場既Henry表現令人失望，個人突破速度壓過刁鑽射門等招數全部欠奉，相反後防更多次走甩瑞士前鋒Frei而險象環生，法國和到波已經好好彩，仲想佢地贏到波？咪玩啦。

巴西 1 克羅地亞 0

巴西攻力無疑強勁，Ronaldinho亦真係好好波，但對親巴西你都預得對手會屯重兵於後防，如果想有效撕破呢種密集式防守，睇怕巴西要多用Kaka入波個類中距離射門至搞得掂，仲有唔該唔好再出Ronaldo了，如果唔係佢響下半場射過腳越楣波，我都唔知佢有落場喎。至於克羅地亞都算雖敗猶榮，而且左路Prso表現生猛，全場食正巴西對翼衛成日谷到半場既優勢頻頻發難，佢遲下對住日本個條把鬼三人防線應該會好開心的。

2006世界杯 (第4日)

澳洲 3 日本 1

本屆最扣人心弦既比賽。澳洲用10分鐘就KO對手，最大功勞當然係Cahill，但教練Hiddink既調動亦應記一功，下半場換入高大既Kennedy加埋大舊佬Viduka二條友牽制日本個條把鬼三人防線以掩護後面既Kewell同Cahill，真係好鬼野。至於日本就把鬼囉，門將川口能活係救左兩次射門，但佢既上三路波完全唔掂，特別出迎既時間掌握更係離譜，日本第一球就係輸佢，邊線個兩隻翼衛三都主同駒野友一其實製造左唔少機會，但進攻個對箭頭高原直泰同柳澤敦表現真係一無是處，佢地全場唯一既貢獻睇怕都係上半場夾計撞埋Schwarzer度令中村俊輔無啦啦入左一粒。Zico呀Zico，你都係算罷啦，對於澳洲都打成咁，對住你祖家點算呢？

捷克 3 美國 0

捷克整體表現出色，後防夠穩陣，防守中場Galasek實而不華，中間一老一嫩Nedved同Rosicky負責組織攻勢同控制球賽節奏，配合唔單只得個「高字」既Koller既高空轟炸同二傳，成隊波攻守流暢，可惜Koller半場傷出，睇佢個樣好似好嚴重個隻，後備高佬Lokvenc級數明顯不同，打後唔通要用Baros？至於美國同日本一樣都係死得，成條防線表現極差，特別係新仔中堅Onyewu更係不知所謂，佢明明負責凍結Koller，但輸第一球時佢老哥就被Koller走甩，輸第二球仲妙，佢竟然可以是但用個頭點下個波就叫解圍，真係唔得佢死。如果美國繼續用佢打正選，睇怕只會死多兩錢重。

意大利 2 加納 0

意大利全場壓住對手攻，Toni狀態一流滿場飛，Perrotta響右路亦出左唔少靚波，當然仲有Pirlo個野射門，而且中前場球員好肯走動，經常用first touch同短傳推進，相當賞心悅目。至於加納既反擊其實幾有威脅，中間Essien發動攻勢盤球推進，左右兩邊就有人向前走，呢d至係以小制大穩守突擊架嘛，可惜Kuffour最終魂遊球場，整腳醫院波俾Iaquinta輕鬆搞掂。

2006世界杯 (第3日)

荷蘭 1 塞黑 0

荷蘭開局後一直以慢打快，好有耐性地響中後場組織攻擊，睇準機會"質"直線，Robben既入球就係靠呢招 (雖然佢真係好好波，但真係太獨食了)，但荷蘭入波後反而打得有點進退失據，尤其響下半場塞黑換入高佬Zigic之後更加俾對手搶返唔少攻勢，特別係左閘Dragutinovic既助攻能力認真唔錯。至於塞黑對正印箭頭Milosevic同Kezman就真係多舊魚，想靠佢地入波？不如望對手擺烏龍算啦。

墨西哥 3 伊朗 1

唔好以為呢場牌面好弱，實情係尋晚最好睇既一場波。兩隊開局打法進取且具壓迫性，特別係伊朗既德國軍團Karimi、Mahdavikia同Hashemian響邊線製造左唔少威脅，可惜輸壞第二球，搞到成隊原先高昂既士氣一去不返。墨西哥方面雖然中場大腦Borgetti同前鋒Franco表現唔太好，但整體合作一流，加埋右路孖寶Mendez同Bravo打到曉飛咁滯，所以真係抵贏。

葡萄牙 1 安哥拉 0

大佬對細佬。大佬用一個C. Ronaldo加一個Figo就玩到細佬死死下，基本上兩條友有波上腳就起碼有兩三件白衫招呼佢。C. Ronaldo打得好生，自已搵食又得，製造機會又得，睇見葡萄牙換走佢之後成隊波毫無生氣就知佢既重要性，至於入波個位Pauleta用佢就真係"保你大"，唔係Figo截到個波後推右走左再黎個地波靚交，你有鬼波入呀你。安哥拉上半場表現可用"不堪入目"黎形容，前又冇後又冇默契又冇合作又冇，特別前鋒Akwa更係浪射加獨食王，半場換走佢簡直明智，好彩下半場葡萄牙換走C. Ronaldo後自斷半臂佢地至有反撲機會，臨尾Andre個腳勁射又真係幾靚的。

2006世界杯 (第2日)

英格蘭 1 巴拉圭 0

英格蘭除左J. Cole同Lampard有貨交之外，整體表現只屬普通，全靠對手一個老烏至贏到波。Crouch既存在令到英格蘭球員傳送時有清晰目標，但佢響場上只係會做三件事：1. 用頭鎚點個波做二傳 (不過尋晚做唔到)；2. 用腳將個波回後做二傳同埋；3. 犯規 (經驗始終未夠)。至於巴拉圭就一如既往以小組滲入為主，可惜中場頻頻斷纜，前面Santa Cruz全場表演失魂，咁搞法隊波想出線都幾難。

瑞典 0 千里達 0

其實瑞典踢得唔差，兩邊側擊亦頗具威脅，前線三條煙Larsson、Ibrahimovic同Ljungberg走動頻頻，自已隻揪又得，三條友打小組亦得，尤其Ibrahimovic下半場小禁區邊個球車身抽射有姿勢又有實際，奈何千里達老鬼龍門Hislop打到上哂身 (全場有6次撲救)，就算下半場開始千里達要打少件，換入黎既Glen響右路表現都唔錯，差d一腳收死對手，真係抵佢地以小制大。

阿根廷 2 科特迪瓦 1

呢場波兩隊快上快落，拳拳到肉，真係好鬼好睇。兩隊球員腳下功夫都比較耍家，但阿根廷比科特迪瓦優勝既地方就係有團隊意識，中前場球員勤於走動，製造好多空檔做直線，Saviola入個球就係最好既示範。相反科特迪瓦中前場成班友差唔多件件都係獨扭濕手巾 (例如Kalou、Keita同埋後備入替既Dindane)，有波在腳就算左右兩邊有隊友接應都只係一味dup低頭死去，反而下半場後段打多左兩翼側擊就仲有威脅，你睇佢地入個球就係先響右邊底線出波，再響左邊出多次俾Drogba篤入就知。其實佢地兩邊個對谷到好前既閘速度夠高又有膽識落底 (尤其左邊個件細粒仔Boka認真唔錯)，配合Drogba中路有體型又有頭鎚，打咁多地波把鬼咩。

2006世界杯 (第1日)

德國 4 哥斯達黎加 2

雖然Lahm入個球既角度真係好刁鑽，雖然Klose終於識用腳入波，雖然Frings個球長程炮真係用手擺都冇咁靚，但對住打5-4-1既哥斯達黎加 (個箭頭仲要係高峰已過既Wanchope) 都可以失兩球，德國既防線睇黎要執執 (特別係裝越位時既企位)。但另一邊廂哥斯達黎加都唔好得去邊，打穩守突擊唔係問題，但成隊波既上落節奏真係要加快，德國攻到落三閘線你班大帝都仲可以懶懶閒，真係入埋都唔夠輸。

厄瓜多爾 2 波蘭 0

唔好比場波既比數呃左，事實上兩隊都打出水準，要怨就只能怨波蘭臨尾十分鐘又中眉角又中柱，真係連運都輸埋。厄瓜多爾反擊快速，防線由Hurtado領軍好鬼穩陣，前面Delgado同C. Tenorio又打出水準，而且成隊體能一流步大力雄，真係抵佢地贏波的 (但總覺右閘De la Cruz有d過於高章，好怕佢會玩出事)。

唧死你

近日本埠政界的話題作，首推華叔踢爆BT曾當年參加「民主歌聲獻中華」活動一事。從事件中可看出華叔不愧為搞政治鬥爭的老手 (傳聞佢年青時乃共產主義信徒也)，呢鋪一出手就玩到BT曾大出洋相。

成件事一開波，華叔只係拋出一句「BT曾當年有去跑馬地參加民主歌聲獻中華」，BT曾當然即時大加否認，表示當日冇見過華叔，亦從未參加支聯會舉辦的活動 (佢錯唔哂，當時支聯會的確尚未成立)。然後第二日華叔又爆多一句：「BT曾個日同埋佢個仔一齊黎」，BT曾就改口話當日的確有響跑馬地見過華叔，但只係咁岩去會所吃飯時偶遇佢既時候傾左兩句姐，仲話個仔可以做證添。好了，跟住今日又有當日有出席既戰友同義工指出當時馬場搞緊裝修所以會所根本冇開門，BT曾就回應稱事實勝於雄辯，佢不想再糾纏於「無證據」、「無厘頭」同埋「莫須有」既指控。噢，堂堂一位特首俾華叔耍到一棟都冇，你都咪話唔醜怪。

其實心水清者一眼就可看出華叔呢次只係用左一招「唧牙膏」策略，就玩到民望高企既BT曾樣衰左幾日。「唧牙膏」者，即逐小逐小地將手頭上既料放出黎 (當然前提係要手握堅料啦)：如果你諗住賭一鋪搏對家其實冇料扮四條所以唔認數，聽日我咪放多二兩出黎囉，但你如果怕衰選擇坦白從寬，又生怕一次過爆埋對家甚至全世界都唔知道既內幕出黎最後蝕哂章。換句話說，身有屎者真係講又唔係唔講又唔係，點搞都係死路一條。

唔好睇少呢一招看似簡單既「唧牙膏」策略，佢既殺傷力其實相當驚人。遠既唔講，近幾年死響呢一招手上既政客就有前尊貴議員情戒男同埋前財爺阿松，當然唔少得上年注目全城既車震賤男梁某。

所以各界友好，記住錯就要認，打就要企定。點解？因為十賭九輸囉。

****************************

頭先2230睇電視，見到亞洲電視三五台執死雞播埋個乜鬼「非禮投票」風波分析節目。唉，蛋散DJ梁某的確係抵死，但係一來佢已公開道歉，二來真係罪不致死，三五台繼徐步高事件後又一次抽水抽到咁低莊咁核突，難怪永遠俾人叫做「二奶台」。

****************************

低級趣味

報載商業二台DJ梁某，在其節目中搞了個甚麼「十大我最想非禮的香港女藝人」投票。消息傳出後，梁某立被社會人士圍剿，直斥其做法有傷風化，更有婦女團體發起簽名運動，投訴梁某嚴重侮辱女性。呵呵呵呵，以為好過癮好好玩唄，梁某，你而家唔係響屋企同你班老友吹緊水，你係響大氣電波做緊節目丫 ，受過高等教育既你唔係咁都唔識分丫嘛？

唔好話我抽佢水，其實我早對這件經常以為自己幽默非常生鬼有趣的蛋散看不順眼。試看一下此人目前在無記主持的電視節目，當你看到他係唔係都「木」起個咀以為自己好有型，聽著他那三句唔埋兩句就哈哈哈哈胡亂叫囂一番的主持風格，加上那堆連陳幸煩個小王子都會覺得完全唔掂既無聊「爛gag」，就知我所言非虛。但可悲的是，根據年前的市場調查顯示，此君原來乃現時最受本港年青人歡迎的電台DJ，你話點線好？

如果第時我個仔女同我講「商業二台好好聽好好笑架老豆」，我肯定本埋條老命同佢死過。

良知

十七年前的北京天安門廣場的凌晨，發生了「那件事」。

只須在鍵盤上按一下，儲存於電腦硬碟內的一切資料就能輕易清除，但我是一個人，一個有血有肉的普通人，就算你要我把腦袋裡的記憶徹底忘掉，我的良知仍會告訴我誰是誰非，誰對誰錯：對日本人發動的「南京大屠殺」尚且也要一年譴責三五七次，那對一群荷槍實彈的中國人暴力鎮壓另一群手無寸鐵的中國人，我們又應如何看待？