2006世界杯 (第1日)

德國 4 哥斯達黎加 2

雖然Lahm入個球既角度真係好刁鑽，雖然Klose終於識用腳入波，雖然Frings個球長程炮真係用手擺都冇咁靚，但對住打5-4-1既哥斯達黎加 (個箭頭仲要係高峰已過既Wanchope) 都可以失兩球，德國既防線睇黎要執執 (特別係裝越位時既企位)。但另一邊廂哥斯達黎加都唔好得去邊，打穩守突擊唔係問題，但成隊波既上落節奏真係要加快，德國攻到落三閘線你班大帝都仲可以懶懶閒，真係入埋都唔夠輸。

厄瓜多爾 2 波蘭 0

唔好比場波既比數呃左，事實上兩隊都打出水準，要怨就只能怨波蘭臨尾十分鐘又中眉角又中柱，真係連運都輸埋。厄瓜多爾反擊快速，防線由Hurtado領軍好鬼穩陣，前面Delgado同C. Tenorio又打出水準，而且成隊體能一流步大力雄，真係抵佢地贏波的 (但總覺右閘De la Cruz有d過於高章，好怕佢會玩出事)。