還原基本步

很久不見。

係咪以為呢度已經摺埋呢？其實只不過係前排公私兩忙搞到冇咩時間同心機爬格子，所以冇更新一排咁囉，是以各路仇家唔好太開心住，呢度仲未爛尾丫喂。

首先，我真係要衷心感謝響度留言既每一位朋友，你地對我同Master Lo既祝福，我會好好記住。從今以後，雖然多左一重身份，但我仍然會與往常一樣，就身邊既人和事繼續亂up廿七，還請繼續多多指教。

講番上年年尾既婚事，其實Master Lo響佢個邊都有略略提過下當日既內容同過程，所以詳情唔再多講，反而想同各位分享下我對現代婚禮既睇法。

即係咁，響今次籌備婚禮既過程當中，其實聽過唔少長輩講，對比於佢地個代而言，而家我地呢d後生細仔搞結婚已經簡單左好多架啦，以往好多繁文縟節已經隨住時代變遷慢慢從簡，甚至早遭摒棄，所以我地呢一代已經好幸運了。

之但係按我呢個八公既自身觀察同聽埋聽埋，我又唔太認同呢種說法喎。雖則而家的確冇咁著重傳統既嫁娶禮儀，但我又唔覺得而家既新人搞婚禮輕鬆得去邊喎。此話何解？皆因當今所謂追得上潮流之婚禮，其實咪又係充塞住一大堆公式化到多舊魚既環節。

唔係咩？就由新郎接新娘開始，唔知點解總係有d姊妹喜歡玩一d聽落都知唔好玩玩落就更加唔知為乜既所謂接新娘遊戲，係咁糟質個新郎同班兄弟一輪仲要係咁問人拎利是一味問人多d添啦一味錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢市儈到好似賣女咁樣最後柴娃娃一輪但又唔覺氣氛好好都算啦，更弊既就係有d橋王會諗到例如叫個未來老公食完一大篤「屎」先好入黎搵新娘既遊戲 (我知篤屎唔係真既)，真係意頭好到呢。

夜晚如果會擺酒就更加精彩。先講整個婚宴既程序，總係好公式化地全場熄燈跟住落射燈射住一對新人進場跟住個司儀就會話不如大家一齊睇睇一對新人由細到大既相片跟住開波時一對新人又會上台祝一祝酒上翅就要走勻全場敬酒上魚或者上雞既時候就會上台玩下遊戲或者唱下情歌又或者發表一番情深說話之後總有少少驚喜有哂新娘喊位之後就食糖水美點雙輝出去送客。

其實搞埋搞埋咁多野，又會有幾多賓客真係會好欣賞呢類「俾面派對」？咪又係一次又一次見到成檯十二條友因為分別有舊同事三人舊小學同學三人舊中學三人同埋舊大學同學三人所以三九唔識七全晚除左每次上菜時大叫一句「飲杯」後全檯一片死寂，或者見到台上d兄弟姊妹玩新郎新娘玩到嘻嘻哈哈忘哂形完全唔知自己企到背哂台砌左一道人牆出黎搞到台下既人咩都睇唔到剩係聽到成班人喡嘩鬼叫搞到咪都"拆"哂跟住冷冷地爆一句「妖都唔知佢地做緊咩」，又或者係新郎哥響台上情深款款地發表愛的宣言時台下賓客坐響度同身邊個個講「哇d魚蒸得好老丫d雞好鞋丫喂」。最好野就係近年由於好多新人生怕到場賓客有悶場，所以諗埋諗埋好多綜藝節目式環節加插響自己既婚宴當中，包括有玩bingo玩抽獎同埋請人番黎變魔術等等，生怕你做左五舊水公價人情當做入場費就點都要物有所值拎番d野走所以搞到婚宴愈來愈似EYT或者TVB台慶，搞到同你去公司既年終晚宴或者春茗分別不大。仲有新娘子唔知幾時開始擺酒既時候就要係咁換衫，開席影相前一套衫進場又一套衫敬酒又一套衫上台玩遊戲又一套衫散席送客又一套衫換衫成晚五六七套衫換得仲密過本埠歌手開演唱會。其實換換換換乜鬼姐，賓客們咪又係匆匆一瞥過眼咪又唔記得。

其實擺酒擺得多席數或者新娘換幾多套衫幾光鮮又或加插幾多個遊戲同環節，同你段婚姻又有咩直接關係？係咪節目越多衣著越華麗就叫做嫁得風光愛得精彩？總覺得現代婚宴既煩瑣環節愈來愈多，但一對新人同賓客既距離就愈來愈遠。除左你去到開席前同一對新人講聲恭喜哂影兩張相之後敬酒同佢地碰一碰杯最後散席時握一握手講聲拜拜之外，你又可唔可以同一對新人舒舒服服地傾番兩句？點解唔可以讓婚禮還原基本步 - 以一對新人為中心，以一段婚姻為主體？