學術論文乙篇

論文題目：透過應用滿足個人物質需要及心靈訴求的分析框架藉以探討港府日前發表的《進一步發展政治委任制度諮詢文件》內載列的建議對吸引優秀人才投身政圈的成效評估

各位老友，今次條題睇落係咪好深奧呢？我見近來本埠有位女士響阿美利堅合眾國整左篇碩士論文就學成歸來搖身一變成為民主專家，所以咪諗住整條睇落好學術既題目黎拋下書包扮下精英咁囉。如果睇唔明，就睇唔明囉，因為我都唔知點解的。

其實平心而論，我係贊成政府呢鋪增加政治問責既副局長同局長助理職位既，原因好簡單，你睇而家個班「局長」一條友空降政府單刀赴會力抗身為天之驕子坐擁行政資源及經驗既AO黨真係行唔通的。我覺得既然要搞高官問責制就唔該做戲做全套，俾足機會班局長埋班搵d自已友組成執政團隊，到時施政上有咩冬瓜豆腐就唔到佢地左閃右避，話乜鬼野一條友孤家寡人入到政府俾人玩到死死下。

對於本埠部分泛 (扮？) 民主派提出乜鬼野「政治分贓」既批評，雖然有d道理，但我諗深一層其實除笨有精。點解？如果講到明親疏有別既BT曾真係搵佢個批「真誠為香港」既親信做局長同副局長，假若第時響佢地個瓣既政策上面失去民心搞左舊屎出黎，到時佢地成為施政團隊一分子，就再唔可以好似以前響選舉時大言不慚地講「我地唔係保皇黨因為我地根本冇份施政」呢類詭辯，泛民亦可以冠冕堂皇地當其影子政府，扮演好反對黨既角色 (當然泛民裡面個班大佬大姐係咪有心有力就係另一回事啦)。

之但係喎，以我都算身為過來人既角度去睇，我又覺得就算而家有呢類所謂開放政府既改革，從政響香港都只會係票房毒藥，皆因任憑你既政見立場如何，左中右派如果選擇成為一條全職政棍，最尾都只係殊途同歸，就咁一世。

唔係咩？睇下地區層次既區議會就知道箇中困局。我當你廿零歲大學畢業就選擇加入政黨「落區」諗住搵個選區做下地區工作打好社區關係等待三幾年後既區議會選舉，響做到區議員之前，你既人工睇怕都唔會有五位數 (特別係泛民主派既政黨)，而且唔好忘記響正式選舉前既三幾年「砌區」日子裡面，你既身份只係一件職位叫做乜鬼野社區幹事/聯絡主任/地區黨部幹事既蛋散，因為你唔係正式既區議員，所以街坊唔會覺得你會點樣幫到佢，地區民政事務處同各個地區政府部門都係唔會多重視你，再加上響現時區議會小選區既制度下現任議員有著極大既問政優勢 (每次區議會選舉有超過九成既現任議員可以成功連任的)，大大局限左呢班政壇新力軍既發揮。

好啦，下一步我當你捱得過呢幾年終於等到四年一度既區議會選舉，正如先前提過，如果唔係你既現任議員對手響過去四年既表現一無是處，否則憑你一條新仔贏到一個區議會議席既機會係細過曼城下年可以贏到英超冠軍的，好啦，輸左之後又點先？再搏多鋪響個區做多四年繼續咬住份唔夠一皮野一個月既人工諗住下次可以用「不離不棄為社區」呢類競選口號黎多次，定係決定離開政圈諗住轉行重新出發？如果你選擇前者，你就會陷入「四年之後又四年」既選舉遊戲之中，到時好可能睇住Rooney打足三屆世界杯跟住宣佈退出英格蘭國家隊你都仲係一條社區幹事，睇住你既同輩一個二個十年八載後無論做緊邊行都總算有d起色有d成就之際，你都仲係響某個政黨既地區辦事處裡面同班婆仔量緊血壓；如果選擇後者，你又會發現原來外界根本唔會點承認同看重你過去服務社區既所謂「工作經驗」，做左幾年野差唔多廿到尾三張黎緊頭既你，到時先至同班初出茅廬既年青男女爭飯食，你又過唔過到自己個關？

就當我份人太過市儈一味只係著重從政既「錢途」，我又試下同你計計從政既「前途」。我就當你真係有著莫大既理想抱負唔怕捱足幾年，響一屆至n屆不定既選舉後終於俾你選到做區議員一個月拎足萬六蚊人工 (如果計埋補貼地區辦事處既支出同搞活動既使費你份糧肯定冇咁多)。雖然生活上叫做勉強有保障，但響而家本埠區議會等同吹水會大官唔鬼理你細官俾你日嘈夜嘈都係話唔到事既情況下，一個區議員同一個街坊保長又有咩分別？你既崇高理想同抱負又可以發揮到幾多？最後咪又係搞埋個d乜鬼野「成功爭取巴士站加多個垃圾筒樓下個公園加多條晨運腳底按摩石春路對面屋村個籃球場開放做曬棉胎基地」(當然仲有某位「真誠為香港」既候選人既豐功偉業：成功爭取交通燈綠公仔延長兩秒 - 有相為證)。但係最大鑊既就係，據我個人觀察一般而言一個區議員既視野同胸襟同佢既參政年資係成反比既 (拿拿拿，我呢個觀察係咪好有前瞻性先？話哂呢篇都係一篇學術論文黎的)，即係諗來諗去都只係關心 (擔心？) 四年後有邊個政黨邊個對手「搞佢個區」，又或者係要如何攻陷/防禦邊間大廈既法團或者互委會，同埋份人只會變得愈來愈小器同記仇，好似個腦只會永遠記住邊個議員響邊次大會同佢互片呢類都唔知有咩好嬲既小兒之爭。如果真係誰人能及你最好手風亂說都開口中做左幾屆之後輸埋個現任議席，更會頓時由街坊保長變成失業中年，到時響你唔食你老婆仔女都要食 (如果你儲到$$結婚生仔的話) 既壓力下你都唔知可以點行落去，個種失落感同無助感真係好惡啃的。

基於以上種種殘酷既現實，難怪現時大部份被吸引至政圈既年青人，無論係咩黨咩派都只能算是平庸之輩，當中縱然有著一個半個有志或有識之士，響目前既政治環境下也只會落得鬱鬱不得志既下場，簡直係格雷欣法則 - 「劣幣驅逐良幣」既最好示範 (唔好話我拋書包，我一早講左呢篇係學術論文黎架，哈哈哈哈)。