董建華的國際視野

還記得去年WTO會議舉行時，不少市民怨聲載道，大力批評當年老董及唐唐好大喜功，為省靚那塊邏輯上充滿矛盾既「亞洲國際都會」牌匾而爭左舊蘇州屎返黎，最後搞到灣仔被以韓農為首的示威者弄得腥風血雨，一片混亂。

但係如果睇返之後幾個月香港各大小團體既示威活動，深深受到韓農啟迪以後，就會睇到老董既國際視野：佢唔只希望香港成為「動感之都」，其實更加希望香港能成為名符其實的「示威之都」，所以來一招曲線教育，讓我等庶民大開眼界，繼而自省努力查找示威方式的不足。

自從上年年尾百幾個韓農不懼天寒地凍於灣仔海傍上演跳海示威後，本地各示威人士立即有如被周星星用天眼通點化一樣，一個二個有樣學樣。自韓農去後，印象中都試過有唔同團體以跳海明志，好似今日又有三幾個雞農跳海抗議周一鑊既殺雞政策，你話老董係咪用心良苦呢？

都話左老董真係日日夜夜都諗住為香港好架啦，係你地唔信佢之嘛。