單打

自卑變自大

2008-02-27T01:07:00.001+08:00

根據報載，有件疑似未來廣播處長尋日突然吹雞開記招，高調反駁批評政府降低廣播處長職位申請人學歷要求至大學學位以下既人變相係歧視個d冇大學學位但係憑自己努力打出一片天既人喎。

首先，佢呢番"歧視"論既理據能否站得住腳委實令人懷疑。講真一個人係咪遭受"歧視"呢，其實好睇受眾既自我感覺既，如果同一句說話大部份人聽到之後覺得no big deal，但你覺得好大件事的話，會唔會係你自己太敏感，抑或有心魔作祟呢？

我覺得呢條友雖然口口聲聲話有冇大學學位都冇所謂，又搬出由細到大既奮鬥史證明自己既實力，但我反而有種感覺，佢係因為自覺欠缺一張沙紙感到自卑，繼而自卑到盡頭就變為自大，藉以築建堡壘保護自己。老實講，我都好認同佢真係上一代個種憑雙手工字打出頭，由低爬到高既好例子，亦同意大學學位不是一切 (你睇有幾多所謂大學生連基本識見同工作能力都好恐怖就知)，但選擇咁樣高調回應會唔會此地無銀左少少呢？與其高調做show，不如少說多做捲起衣袖以行動證明自己咪更加有說服力。仲有呢種刻意分化既言論又算唔算係"拉一派打一派"，刻意製造社會矛盾呢？

講開又講，從上年民主黨用廿皮請件女公關返黎不久佢就自行製造公關炸彈搞到樣樣衰衰，繼而有前排天真嬌間公司選擇高調回應疑似淫照乃移花接木到最尾好傻好天真既一分鐘真人show，再有今次歧視非學位人士既反駁，係咪標誌著香港真係欠缺優質公關人材？唔，值得深思。

敬請自重

2008-02-24T15:05:00.000+08:00

哇，原來上一篇文係上年11月，真係失禮。

今次唔講咁多，先睇片，呢場係前幾日響重慶舉行既東亞杯足球賽，由中華人民共和國主場迎戰日本，最終客隊以1比0小勝。

老實講，勝敗乃兵家常事，中華人民共和國技不如人因而輸波冇咩大不了，但輸波兼輸品就相當失禮，成場波大打暴力足球，沙塵滾滾，完全係要人唔要波，請問呢d係咪中共領導人成日掛響口邊既文明精神？就算兩國有幾大家仇國恨也好，係咪需要響球場上以呢種等同未受教化既野蠻人表演黎解決？

距離北京奧運唔夠半年時間，中華人民共和國國民到時會表演出何等程度既文明同進步，實在值得關注。中共領導層，如果你地真係想中華人民共和國成為真正既世界大國，唔該響展示自身既經濟實力以外，多多留意國民既質素，免得俾人背後笑到你面黃囉唔該。

要得到別人既尊重，還請先行自重。

2007區選評論之一：公民黨

2007-11-21T22:14:00.000+08:00

唔好講咁多，先睇睇日月神報11月20日既報導：

逾半得票過千公民黨地區勢力冒起

【明報專訊】成立只有一年多的公民黨，首次派出42人參選今屆區議會，只有8人當選，當選率不足兩成，但其中近半數選區獲得四成或以上選票，逾半參選人獲得1000票或以上。有分析指出，這顯示主打專業形象的新政黨，正逐漸在地區冒起。

六成參選人高票落敗

公民黨黨魁余若薇坦言，對整體取得議席數目雖未算滿意，但在落選的34人中，不少是「高票落敗」，作為一個新政黨，短時間內已獲這個成績已算不錯。

公民黨今次出選42個選區，在其中19個選區獲得逾四成選票，超過一半參選人獲得1000票或以上。在34名落選者中，近六成是高票落敗。其中該黨的「大內總管」曾國豐和唯一外籍參選人司馬文，只以100多票落敗。

政綱獲認同不靠「打電話」

余若薇認為，作為一個新成立的政黨，利用這麼短時間做地區工作，第一次參選已有這個成績已算不錯，「我要感謝選民對公民黨的支持，因為投民主派的選民都是同意我們的政綱而不是靠『打電話』拉票」。她強調，不論當選與否，黨員都承諾會再接再厲，繼續發展社區及創新路向。

陳淑莊：工商界也支持

她指出，陳淑莊在山頂區中勝出，令他們很鼓舞，顯示出民主派未必得不到工商界支持；另一重意義是，公民黨今次勝出的新人，都有專業人士背景，如陳淑莊是大律師、東涌北的林有嫺是律師、康怡的陳啟遠是工程師，顯示專業人士絕對有能力與其他人公平競爭，要求政府不要再委任任何區議員，「專業人士絕對有能力透過一個公平競爭選舉勝出，政府沒有需要繼續委任相同理念人士加入區議會」。她要求政府盡快宣布取消區議會委任制，否則不利香港民主發展。

社民連6人匯賢2人當選

另外，同樣首次派出30人出選區議會的社民連，其中6人成功當選。由前保安局長葉劉淑儀的匯賢智庫有4人參選，當中陳岳鵬及黃楚峰當選。

******************************************

為免讀者生疑，我事先表明，我係一個堅定的民主派支持者。睇完篇野之後，唔好亂扣我帽子。

1. 出42條友羸得8件，仲要有5件係成黨後至收編返黎既現任地保，得勝率不足兩成，咁樣就可以叫做"在地區冒起"？或者你會話，咁人地真係有3個新人咁大把喎？超，公民黨所謂贏到個3件新丁，山頂個件純粹贏形象，加上早前田少表演口技令該區成為傳媒焦點而間接谷票而已；東涌北個件就係響5人大打泥漿摔角下以35%低空掠過當選；而康怡個件睇落得到58%選票贏得風光，但實情只係該區居民因現任議員於屋苑大維修事宜上同大部份居民意見不合，所以選民自行決定大舉counter-vote而已。

2. 咩叫"高票落敗"？"高票"條線點樣劃？係咪所謂既1000票？響現行區議會單議席單票制既選舉制度下，票數既所謂高低參考意義其實不大，一來選民年年增加，整體投票人數自然有所提昇，根本無需大驚小怪；二來公民黨所謂得到四成選票既20個選區 (我睇呢度既)，當中有16個選區係二人對決格局，以民主派同保守派本身各有約三成既基本盤黎睇，就算落選者搶到四成或以上既票選亦不足為奇，正一小題大作。

3. 公民黨黨魁認為，"投民主派的選民都是同意我們的政綱而不是靠『打電話』拉票"。唔... 其他黨派我唔知啦，但係以公民黨黎講，好多選區既候選人根本只係空降部隊，唔講甚麼新氣象新思維社區要變革搵個新人試一試呢d願景式政綱仲可以講咩？君不見十件著左八件公民黨人今次選舉既街版同海報都將佢地既所謂"政治明星"放到有幾大得幾大？仲有丫余議員若薇資深大律師，你唔好咁大聲同人講你地唔係靠甚麼"打電話"拉票丫，你不如先去問問貴黨炮台山選區既優質候選人呢鋪究竟用左d咩高尚而公平到痺既方法去打壓佢既對手先啦。

當然，我絕對唔否認以上言論有少少偏頗，但識我既人一定知我點解會咁火。公民黨？我呸！

下篇會講講我前老細檔野。都係個句，識我既就知我想講d咩了。

視評數則

2007-10-10T23:33:00.000+08:00

哇，望一望至醒起原來成個幾月冇更新過呢度，都係快刀斬亂麻係咁易撩幾筆視評，免得各路仇家誤以為我已玩完。

三五台革新

其實三五台次次有新官上任都總會有三把火架啦，但今次新人事新作風得來更揚言來一鑊大刀寬斧式改革，單係改台徽都用左成百粒，唔知銀彈政策下又會唔會醫得掂呢頭病馬呢？計我話，如果三五台真係想響本埠免費電視業能有立足之地，就千祁咪再重蹈覆轍學人搞埋d咩劇集了，與其同TVB鬥拍那堆總係以不同背景同職業包裝但到頭來五集打後必定走入三四五六七八角婆媽戀愛情節，倒不如好似而家咁集中火力專攻短小精幹既半小時至一小時知性雜誌式節目，例如搵陶健筆搭賜官再加劉綽琪整返次"犀牛俱樂部"re-u都應該幾有睇頭，但找來如響娛樂圈楝篤左好多年都唔太好笑既張達明、一味只識響每句說話後面都"woo"一聲既DJ莎拉，同埋前TVB懶音Eleven主力行姐 (睇下呢度就知點解) 呢d過氣既街霸，就真係搵鬼睇了。平心而論，三五台積弱多年既最大問題，在於佢地雖然偶有佳作，但始終俾唔到觀眾一種長期而持續既優質製作，就好似睇煙花咁爆幾下哇好響丫哇好靚丫之後就靜鬼哂，觀眾次次都俾你地耍，久而久之自然對你冇信心。

TVB鄧某

據聞鄧某乃志雲大師親自欽點之愛將，希望再次發揮點石成金之威力喎。之但係呢，正如我之前所言 (係丫，我既"pon"好多都係炒冷飯的，真係幾悶)，雖則娛樂圈一向都咩冇路捉，但起碼受歡迎既藝人都有一個共通點，就係要有觀眾緣，亦即俗話既"入到屋"囉。鄧某自參加新秀入行原來已有11年，但一直浮浮沉沉：唱歌嘛，起初有首"朋友二號"都叫紅過下，但個人認為唱腔太刻意模仿陳奕迅 (講起呢d樂壇A貨真係搵日要另寫一篇詳談至得)，而且技巧極度幼嫩，一味擘大喉嚨死嗌就以為自己好有感情，其後總係覺得自己乃非池中物，決定往外闖喎，最後兜兜轉轉咪又係要死死地氣返老家，但家陣睇佢做"味分高下"，卻仍然只係一味講埋哂D唔好笑既笑話，仲要周不時窒住搞氣氛一流既哈林哥以為自己很風趣 (係，其實我都成日以為自己很風趣的)。有時做人呢，真係唔好睇得自己太高，要時常懷著謙卑之心，皆因天外有天，人外有人丫老友。

最緊要健康

而家逢星期三晚我地中醫呢都會見到一位前TVB新聞記者響到做節目，咁我地中醫呢其實我覺得上一輯幾好睇的，之但係我地中醫呢唔知點解響短短半小時既節目裡面呢位前記者都會好刻意地將"我地中醫呢"呢幾隻字掛響口邊囉 (我真係有數住架，例如我地中醫呢今晚就講左7次了)，我覺得呢我地中醫呢未免太醜怪了，還望TVB方面可以我地中醫呢向此人提點一番。講真，如果佢真係好想全港觀眾知道佢現時乃一名中醫呢，咁我建議我地中醫呢不如好似泛民搞一人一信表達2012普選訴求咁樣，由TVB印定一大堆寫有"我清楚知悉黃XX女士乃中醫一名，我覺得她巧威威唷！"既意見書，等我地簽個名就可以寄番俾TVB咪得囉，OK？

下年再搵過食

2007-09-05T23:20:00.000+08:00

報載，早排九秒九高調宣布參加港島補選既前尊貴議員何女士，前兩日突然毫無預警地選擇抽身而退。哇，好高尚的情操啊！

響(i)自行搶閘宣布參選令一眾 (如果何女士有當佢地係) 泛民同路人嘩然以後；(ii)鼓動本埠街坊響應佢提出既遲交差餉神聖呼籲搞到譭多於譽以後；(iii)泛民共同制訂一套對佢極為不利既協調機制以後 (你估以何女士既人緣佢會得到泛民組織300票裡面既幾多票呢？)；(iv)尊貴既余議員若薇資深大律師既病情曝光而身體狀況未明以後；及(v)下年選舉於比例代表制下會較為有利之下 (你估下要搶過半選票易d定係響混戰當中求其搵到十個八個巴仙既選票易d呢？)，何女士就好顧全大局地同忍辱負重地犧牲小我完成大我選擇退選，藉以消除陳四萬參選既阻力喎 (講真，以陳四萬既高等華人身份同官拜政務司司長既背景，會唔會紓尊降貴選擇同自己以前既下屬民主研究學者葉劉氏正面交鋒，又係另一回事囉)。

都係老友K說得好，何女士今次都未必志在選到既，都係出黎曝下光等d市民仲記得有呢一號人物咁姐。唔，咁又係，何女士咁講，我地咪咁聽囉，黃子華話齋："搵食姐，犯法丫！"

不如罷小便啦

2007-08-21T01:53:00.000+08:00

補選「武林大會」前夕火藥味濃泛民成員圍攻何秀蘭 - 蘋果日報 2007-08-13 (節錄)

另外，何秀蘭昨在一個政改論壇上稱，泛民可以呼籲市民以不合作方式，例如遲交差餉，表達對政改綠皮書的不滿，「咁樣會畀到政府相當大壓力，因為佢唔知你今次唔交差餉，下次又會唔交 d 乜野」。

爭2012普選何秀蘭倡遲交差餉 - 明報 2007-08-13 (節錄)

有意參加立法會港島區補選的何秀蘭，昨日出席政制論壇時表示，泛民可進一步考慮以「不合作運動」來爭取2012年雙普選，何秀蘭倡議市民齊齊遲交差餉，向政府施壓，擾亂政府的財政循環，而市民的代價，最多是被人罰款，「吃少幾餐麥當勞」。

何秀蘭昨日指出，有人曾於反對《基本法》23條立法時，以遲交差餉作抗議。她說，雖然遲交差餉政府會出告票，但市民可於出庭前繳交差餉，則可免出庭，市民最多只會被罰款10%的附加費。她指出︰「我並不是教你（市民）犯法，只是遲交差餉！」

***********************************
按呢位女士既邏輯，咁我又可唔可以同人講："我並不是教你 (市民) 犯法，只是殺下人/搶下劫/非下禮/盜下竊"？仲有丫，唔好以為係咁易up兩句就能令我等蟻民用真金白銀去響應你既神聖呼召替你臉上貼金，你咁有諗頭咁有創見咁想搶sound bite搏見報，下次不如話希望本埠市民上下一心，學《精裝追女仔》裡面既吳準少咁樣一齊罷小便以明爭取全面普選之志丫笨。

矇佬

2007-08-14T21:02:00.000+08:00

工潮變成工會政治角力

【本報訊】一場勞資糾紛，最後演變成職工盟與工聯會之間一場政治角力，明爭暗鬥。工聯會旗下建造業扎鐵職工會主席陸君毅昨罕有地點名批評職工盟為爭取政治本錢，連日來發起激烈抗爭，並直指職工盟「冇資格」就加薪問題上與商會談判；職工盟秘書長李卓人拒絕回應有關指控，但強調職工盟是獲得扎鐵工友邀請，才協助他們抗爭。

工聯會曾拒工人遊行

上周三扎鐵工會率先發起集會要求加薪，但翌日職工盟及街工等勞工團體卻加入爭取行列，隨即惹來工聯會中人不滿，批評他們煽動工人，騎劫工潮。職工盟多名成員及立法會議員「長毛」梁國雄昨晨原本希望到集會現場聲援工人，但申請今次集會的工聯會，拒絕他們參加，結果眾人只好在街尾等候消息。在上午的集會，工聯會代表多番被喝倒采，成為輸家。在下午，工聯會更「玩失蹤」。相反，過去幾日不在港的職工盟秘書長李卓人周日返港，昨午到示威現場，向工人拋下一句：「對唔住各位，我黎遲左」，已換來如雷的掌聲。整個集會幾乎由職工盟操控。有知情人士透露，由於有工人不滿扎鐵工會未有捍衞他們利益，所以找其他立會議員梁耀忠、李卓人及梁國雄等幫手，由於李卓人不在港，職工盟才改由幹事參與，當時工人要求扎鐵工會，採取遊行示威等抗爭行動時，工會代表拒絕，於是才由職工盟等人帶領遊行。城市大學專業進修學院首席講師宋立功認為，今次事件已被政治化。他指出，近年本港工運陷入低潮，各勞工團體為了爭取更多會員人數，出現激烈競爭。

*********************************
妖，一早話左工聯會班友有獨佔本埤工會市場之心 (睇返呢度)，呢鋪紮鐵工運果然又有一咋小嘍囉出黎生人霸死地，委實醜怪。話時話，你班矇佬講埋哂d咩撈政治油水破壞江湖規舉既小家子氣說話做咩姐，根本成件事既重點就正如老友F話齋："如果工聯會真係幫到手，班工人就唔會搵職工盟啦！"

噢，一矢中的，抵你一次進三步。

劣質攝石人

2007-08-10T00:52:00.000+08:00

左派撐葉劉補馬力議席立會補選　何秀蘭勞永樂加入戰團

【本報訊】民建聯主席馬力去世後，遺下的立法會港島區直選議席空缺，引起各大陣營虎視眈眈。據了解有意進軍立法會的保安局前局長葉劉淑儀，極可能提早出戰，參加港島區補選，民建聯可能讓路，集中左派票源支持葉太。至於今屆敗走立法會選舉的民主派人士何秀蘭已表明會捲土重來，政圈又盛傳社會民主連線的勞永樂也可能參選。有民主派人士分析，就算民主、公民兩大黨撐何秀蘭，在社民連分薄選票下，葉太隨時有機會勝出。　記者：莫劍弦

民主黨、公民黨昨日表示，未有考慮立法會港島區議席補選問題，民主黨立法會議員李永達說，他們要先諮詢中委及港島支部意見。據了解，兩大黨高層昨晨曾經私下商討，如何面對補選的問題。據悉，民主黨傾向不派人參選，並全力支持今屆立法會不幸落敗的何秀蘭出選，惟一切需諮詢黨內意見後才有定案。公民黨方面，雖然外界估計會派新丁陳淑莊出戰，但黨高層認為，若何秀蘭出選，公民黨傾向支持何秀蘭。

變綠皮書和城規公投
左派陣營方面，據知身兼匯賢智庫主席葉劉淑怡已積極開始為參加補選作準備，民建聯認為，若葉太決定去馬，該黨傾向不派人參選，全力支持葉太一戰。除了兩大陣營，政圈昨日也盛傳社民連副主席勞永樂，有可能加入戰團，令戰況更混亂。有民主派人士分析，假如民主派最終只有何秀蘭一人參選，以民主派在港島區坐擁六成選票的優勢下，即使左派力撐葉太，勝算亦相當高，可是民主派一旦有多於一名候選人，戰況勢必改寫，民主派票源會被分薄，「到時葉劉拎住三成幾、四成選票，隨時可以偷雞贏到。」何秀蘭接受查詢時表示，馬力的離世是一種不幸，但她表明，若港島區進行補選，她一定會參加，並希望將是次補選，變成一次就《政制發展綠皮書》和城市規劃立場的公投。
將刊憲宣佈議席出缺
勞永樂則指，社民連昨日曾開會討論馬力離世事件，決定現階段只會向馬力和其家屬致哀，不會評論其他問題。被問到會否參加補選時， 勞說：「我諗任何從政人，都有起碼的道德，不會做一隻人屍骨未寒，就虎視眈眈的兀鷹！」 葉劉淑儀對馬力的去世感到非常難過，她說，香港因此失去一個政治領袖。對於會否參與立法會補選，葉太稱選舉問題需從詳計議。根據法例，政府稍後會刊憲宣佈馬力議席出缺，選舉事務處之後會宣佈補選提名及投票日期，預計最快可以 10 月底、 11 月進行補選。
************************************

咁耐冇出黎亂up，本來想先講講對皇后衛士既想法，之但係呢，今日睇報紙呢，就見到有件多年來都只係一味靠痴既前尊貴議員餓狗搶屎般高調發功以圖單方面製造既定事實囉，由此可見此人素質如何。還是棄明投暗既勞醫生說得好，就算如何不齒馬某生前之言行，惟死者已矣，在別人屍骨未寒之時還是給回他一份尊重吧。盜亦有道，就算你只是當一件攝石型政棍，都請你收歛一點積番些少陰德囉唔該。

況且，幾年前那所謂"八百票的差錯"導致甚麼意外落馬，事後孔明人人也懂當，但易地而處，當時又有邊個民主黨人有地位又夠"吉士"兼有百分百信心落order大叫眾兄弟收手好等港島區選民能緊跟泛民配票策略先？呢位前尊貴議員，唔該你唔好將選民自身最後既個別選擇，一廂情願地看成是整個泛民派系欠你三年多的一筆人情債，仲有唔好上綱上線將我等蟻民擺上檯，將呢次補選定調為甚麼對"綠皮書的公投"，我支持2012全面普選，但唔代表我一定要投你票。

政治從來都冇人情講，沒有永遠的朋友，沒有永遠的敵人，有的只是永遠的利益。食得咸魚抵得渴，認命啦你。

整死香港

2007-06-27T02:41:00.000+08:00

報載網路上最近有人製作左一首《整死香港有你》，用以反擊《福佳始終有你》云云。

哇哇哇，大家都係搞下屎棍抽下特衰政府水咁姐，駛唔駛咁緊湊玩單挑先？所以咋咋林上網搵下啦 (要聽自己搵啦，費事幫佢做宣傳)，點知聽完後不禁搖頭嘆息。唉，拾你仇敵的牙慧已經冇咩骨氣，但呢首極品d詞竟然好多個位都唔岩音喎，喂大佬丫，星爺話齋做茄喱啡都要專業丫，而家東施效顰成咁，係咪想再一次印證本地左派既人才凋零先？

講真，呢首極品既作詞人亦未必太抬舉本埠民主派了。一方面目前建制內既所謂民主派領導群既能耐同心態如何大家有目共睹，佢地無論係個人而言或者整體而言都只係烏合之眾，單憑佢地當然絕對冇可能整得死香港，另一方面響現時本埠以行政主導作終極教條既政治體制之下，上至垃圾會各尊貴下至各區街坊保長嚴格黎講全部都慘被奄割成無權無責既反對派，響官府緊握大權既局限下，要搞建設又談何容易呢？

慶你個頭

2007-05-24T21:25:00.000+08:00

繼上年震撼非常既《熱愛基本法》之後，特衰政府再次推出另一首樣辦歌曲《始終有你》，作為「慶祝」香港回歸十年既主題曲。哇，咁厚禮，我等好事之徒當然立即要去官方網站聽一聽睇一睇，哇哇哇，原來仲有卡拉OK版添，呢次發達啦，本埠親中派終於有新歌仔唱了，唔駛次次搞乜鬼所謂國慶/國民教育活動都係唱《我的祖國》咁悶蛋囉。

起首以為呢首樣辦曲只會再一次成為港人既笑話，點知試聽後我又覺得比想像中好喎。金培達既曲四平八穩，副歌都算易上口，而陳少琪既詞亦無太明顯既國家同民族包袱，其實輕輕鬆鬆咪好囉，唔駛次次都咁hardcore嘛，但係…但係…可唔可以唔好搵埋莫華倫李龍同阿女變成既尹飛燕響裡面一人唱番句搞到首曲不倫不類格格不入呢？我並非否定上述幾位前輩既藝術造詣同成就，只係覺得官府既蠶虫師爺們點解可以諗埋哂呢d屎橋出黎，以為響首K歌裡面加入各界藝術代表就可以象徵到本埠上下一心慶回歸下哇？

之但係我稍後細心研究一下呢支曲既歌詞，我又睇唔出同慶回歸有咩關係喎。就以重覆又重覆既副歌黎講：

香港始終有你　讓萬眾掌聲響一世紀
香港始終有我　十萬個驚喜多一世紀

拿拿拿，如果要分析呢支曲既重心同作詞人想表達既訊息，「始終」兩字乃關鍵所在也。

究竟何謂「始終」呢？我地可以用以下兩句例句去理解一下：

例句一：程亮係就係唔夠專一，不過佢始終都醒目過得得地喎，常在心呢次真係難揀啦。
例句二：舅父波係就係貪錢左d，但係佢始終都算係唐家既一份子，大契趕他走未免太絕情了。

各位睇下，「始終」兩字其實或多或少帶著一種雖然有一樣負面既事擺在眼前，但幸而有另一樣野作出補救或者平衡下既意思。如果套用呢個分析響呢首所謂用黎「慶回歸」既樣辦歌上面，即係陳少琪可能係想話：雖然特衰政府響回歸後搞到香港一鑊粥，但係好彩有我同埋有你呢d小市民合力補鑊至拆得掂咁解囉，因此香港今日死唔去，係因為多得有我地自力救濟，而一d都唔關特衰政府事囉。

所以呢排成日話慶祝慶祝，我就話慶你個頭。撫心自問，今日生活在香港的你，比十年前來得快樂嗎？

人禽之辨

2007-05-22T22:22:00.000+08:00

本埠某聲稱「真誠為香港」之組織頭目馬某，上星期向記者表示，8964那一夜中共並無「屠城」，還科學地以「坦克果能壓得死人麼」之屁話圖為殺人者脫罪。

看到這段報導，只覺得真他媽的荒謬。無論事隔已久，一個有良心及有良知的「人」也絕不會向死難者和受害者的傷口灑鹽，現馬某竟然拋出此等狡辯，難怪本埠土共經常被批評為「左狗」矣。

還看由此人領導之劣質組織以後如何大義凜然年年到日本領事館抗議他媽的日本右翼政棍參拜靖國神社亂改教科書之侵華歷史，皆因別人的辯解亦只謂日本當年乃「進出」中國而已，大家都只是用文字以圖潤飾國家的惡行嘛，五十步笑百步，對麼？

馬某，呢度唔係法庭，呢度唔需要講定義，咱們對眼就係證據，大契好野。

足球筆記 (10)

2007-05-18T23:39:00.000+08:00

20070512 - 廣島 0 橫濱FC 2

哇！贏波呀！

作客全取三分兼完封勝，不僅暫時將聯賽失波最多既紀錄送左俾大分，仲可以(暫時)最下位脫出，真係可喜可賀。我地今場大致用番上週中Nabisco杯作客贏FC東京1-0既陣容，即係將大部份本季預定既主將收起，反而踢出驚喜。上半場先憑今季大有進步既難波宏明打開紀錄，跟住完半場前再由精神領袖三浦叔叔來一記遠程左Q笠射拉開比數，哇，真係靚到痺 (雖然我覺得有d神來之筆(呢度同呢度有精華)，仲打破聯賽既最高齡入球紀錄 (當然佢只係一直同自己比賽，而家全個聯賽最大年紀就係佢啦)，搞到我對你真係又愛又恨，I love you hate you丫，King Kazu！最好野就係下半場竟然抵擋得住主隊既狂轟濫炸 (全場射門次數係22-7，我地真係俾人壓住打的)，鐵壁防線終於似番少少樣，上年既菅野孝憲返黎啦。

熱切期望我地聽日能夠贏埋大宮，食住個勢繼續為護級搶分。

另外，高木監督早前講既補強行動終於初見成效，我地幾日前從東京V借得前鋒平本一樹至球季尾。現年26歲既平本一樹係一匹左Q快馬，腳下功夫同射術係賣點，上年響東京V踢出職業生涯最好既一季，聯賽上陣40場入15球外加5次助攻，但今季響人材濟濟既東京V只有幾次上陣機會，所以決定出走一試。單睇數據佢既落底傳中既次數不多，打法應該傾向個人突破，睇睇佢可唔可以憑佢既活力同技術，製造多d空位俾射手型既久保龍彥搵食了。

再另外，前幾日竟然有報導指日本自民黨有意搵三浦叔叔出馬選參議院議員，果然全世界既政棍都係一樣黑，好多都傻上腦的。

足球筆記 (9)

2007-05-09T23:08:00.000+08:00

20070506 橫濱FC 0 神戶 3

連對住昇格組既對手都可以主場輸三粒，我地未來護級之路真係愈來愈難行。睇番賽後報導，今場三個失球都響右路出現，但其實上年我地響J2第四循環作客神戶時，其實正係憑出色既側擊至能夠反勝2-1，點解今年我地對住同一個對手，表演卻有天壤之別？仲有丫，高木監督，我求下你拜下你，唔該唔好再用三浦叔叔打正選，我唔係話佢唔掂，事實上佢真係仲幾有腳法又有經驗，但問題係三浦叔叔真係唔夠體力應付J1既比賽，其實用佢做後備殺手可能仲好呢，係咪？

20070506 曼城 0 曼聯 1

Vassell未能替天行道，正一敗家仔，講完。

足球筆記 (8)

2007-05-06T00:38:00.000+08:00

好耐冇寫，一次過寫番哂佢。

20070421 - 東京 1 橫濱FC 0

又輸一場，睇番賽後報告，其實兩隊既表演都唔太好，東京只係一味斬高波俾過氣既街霸Wanchope (對唔住，雖然你曾經係曼城既球員，但你真係不掂了) 死滾，而我地就連有效既攻勢都組織唔到，交波頻頻斷纜，所以俾對手把握到一次機會就足以落敗。

20070428 - 橫濱FC 1 清水 1

哇，和波丫，聯賽五連敗後終於拎到寶貴既一分，理應可喜可賀。但係睇番我地下半場和田拓三既入球 (呢度同埋呢度)，其實真係入得好鬼核突，當時奧大介響左路掘個波入禁區，我地兩個球員飛身都掂唔到個波，點知最後搞完一輪竟然俾和田拓三一手推落對手市川大佑度就順勢推埋個波過白界，唉，入都入得唔光彩過人。

回顧番我地聯賽到現時為止所入到既四大球裡面，嚴格黎講真係搵次美妙組織都冇，唔係咩？第一球係J1首戰對浦和時上半場久保龍彥個腳神來之筆，第二球係橫濱打比時早川知伸禁區外偷雞冇越位既胡亂笠射，第三球係主場對名古屋難波宏明響對手禁區人馬踏雜之際亂軍篤入個球先制點，而第四球就係和田拓三呢球推手，唉，真真失禮。

不過算啦，執番一分，就咁算啦，哈哈哈哈。

20070503 - 甲府 1 橫濱FC 0

又輸一場，今季八場聯賽既成績一勝一和六負，唉，咁搞法真係提早收工，尤其對於甲府呢類算做同級既球隊都搶唔到分，前路認真嚴峻。

今場原本先發既內田智也開波前突然體調不良，臨時搵三浦叔叔頂上右中場位置。事實上，開波初段三浦叔叔同埋元代表孖寶奧大介同久保龍彥都炮製左兩次埋門機會，可惜無功而還，點知下半場中段俾對方既後衛增島龍也憑死球戰術一頭建功，雖則打到最後高木監督諗到換入老鬼小村德男打箭頭呢招諗住搏大霧，但始終決定力不足既死穴又再一次累死我地，更造就甲府今季第一次唔駛失波添，問你死未。

話時話，突然諗起我地個三件所謂外援，由開季至今一直提供唔到任何援助，前鋒Gilmar Silva叫做最多出場機會，但勤力有餘把握不足 (雖然唔怪得哂佢，今季負責派牌既奧大介狀態一直低沉)，完全踢唔出上年響東京V既水準，左腳中場Adriano就獨食之餘又喜歡上腳賣弄腳法拖慢進攻速度，而中堅Anderson就從未於聯賽上陣，究竟我地仲應唔應該用埋呢d次級球員而浪費左三個寶貴既洋助人名額？諗諗佢啦高木監督。

足球筆記 (7)

2007-04-28T01:34:00.000+08:00

20070415 - 南華 1 傑志 1

而家至得閒寫番呢場大戰，所以係咁而講兩句算數，橫掂南華響東莞都贏到波拎到聯賽冠軍囉。

其實講整體發揮，傑志比南華優勝得多，特別響戰術執行上面傑志班波真係踢到4-3-3既隊型出黎，進攻亦因為中前場球員速度較高，所以踢得有活力，亦較為多樣化，反觀南華今季打死一瓣高波，用迪天奴轟炸對方既防線，配合T史高斯既個人技術同把握能力數糊，季初都仲可以嚇下鬼，但逐漸俾對手洞悉打法，加上迪天奴始終年紀唔細，呢招單天保至尊既威力已大減，而且T史高斯係就係入波多，但問題係佢獨食又貪功，長久真係要諗諗計，唔可以鋪鋪靠李海強射罰波或者遠射架嘛，係咪先？

足球筆記 (6)

2007-04-16T00:05:00.000+08:00

20070414 - 橫濱FC 0 鹿島 1

又輸一場。

今場有直播，睇完全場後發現我地今季既表現真有如阿巢既評語一樣：「攻不銳，守不穩」。

先講防守，上年既鐵壁防線變成今年既豆腐渣工程，我覺得最大問題係出響防線前面個對防中完全做唔到截擊同掃蕩 (特別係今場既根占真伍真係完成不見影)，搞到對手可以從容響我地既中路慢慢組織攻擊。如果對手選擇分波走兩邊，我地對閘卻經常谷得前太前，如果對手選擇從中路突破俾直線 (就好似今場鹿島既打法)，我地對中堅又經常因為轉身慢食哂塵，反而對住一d喜歡打高波既球隊 (好似之前對名古屋個場)，小村德男反為有一定既制空能力去頂住對方既高大中鋒，而早川知伸既釘人功夫其實亦唔差。因此當務之急，其實係要搵一件速度同較為靈活既中路守將，搭住小村德男或者早川知伸，可能會有轉機。仲有今場條防線唔知因乜事會用新仔太田宏介打中堅，佢其實正宗位置係左閘或者左中場，唉今場真係睇住佢三番四次俾對方既前鋒走靚位，如果唔係鹿島把握能力唔高，我地其實應該唔只輸一粒的。

至於我地既攻擊方面又係令人搖頭。高木監督近來雖已轉打4-2-2-1-1，用Silva企響久保龍彥後面，希望憑藉佢既速度同個人技術多拉空位同埋做多d二傳俾射手型既久保搵食，奈何睇番今場Silva係好努力，但始終孤掌難鳴，皆因左右中場三浦知良同奧大介狀態真係好差，衰d講句真係一腳好波都無。後面毫無輸送，前鋒線又如何數糊？所以今季經常見到久保龍彥成日要走到番後場搵波上腳，而我地亦應響中場方面做好補強工作。

其實仲有一樣野，就係今季高木監督經常變動球隊陣容，可能係鑑於球員狀態，又或者係因應老將們既體力或傷患，總之就係成日變變變，試問咁樣又如何建立防線既默契？又如何操練進攻既板斧？只見我地今年踢落無論攻守都係一個「亂」字，長此下去唔係辦法，咁搞法我地真係會提早宣佈降班。

我唔係講玩笑鬧著玩的。

足球筆記 (5)

2007-04-10T21:32:00.000+08:00

20070408 - 千葉 4 橫濱FC 0

再一次完敗，今季5仗失左14球，究竟我地上季引以為傲既鐵壁防守去左邊度？高木監督既「老人戰隊」體力問題陸續浮現，40歲既三浦叔叔當然唔在講，山口素弘小村德男等主將亦只能踢一場休一場，前線希望久保龍彥又受傷患困擾，搞到前鋒位根本唔夠人用，整體後備力量又薄弱，高木監督今日終於放話，希望再一次從失意軍人中執到寶，唉，早知當初，點解上季季尾要放棄吉武剛同北村知隆兩個中前場球員？

足球筆記 (4)

2007-04-10T21:12:00.000+08:00

20070331 - 大宮 1 清水 2

今次日本遊睇既第一場波。大宮一向都缺乏個別突出既球員，所以比較著重打整體戰，但今場表演明顯不及客軍，對方一對箭頭Fernandinho同西澤明訓多次製造威脅，後防高佬高木和道夠穩陣，抵贏。睇落大宮既攻勢非常薄弱，前面吉原宏太早已成過氣既街霸，如果搞唔掂進攻，大宮睇怕都會同我地一樣要護級了。

20070401 - 橫濱FC 1 名古屋 2

噢，久違了的聖地啊，我回來了，但好可惜要親眼睇住我地先入一粒但四分鐘內連輸兩粒，唉。今場平心而論我地整體發揮不俗，高木監督近幾場針對我地欠缺攻力既弱點改打4-4-2，前面用Silva同難波宏明為球隊帶來活力：前者勤於走動，後者亦有把握能力，而後防老將小村德男今場睇實對手高大鬼頭Johnsen亦好稱職，今場問題係出響兩閘位，和田拓三同小野會吉有時谷得太前，遇著對方打反擊就麻煩，加上上季表現一流既門將菅野孝憲輸壞第二球，我地亦只能由贏變敗。話時話，自愛上橫濱FC以來，我有幸入場親眼觀看比賽既戰績係1和2負，究竟我幾時至能夠目睹我地獲得勝利既一刻呢？

寫於特首「選舉」前

2007-03-23T21:03:00.000+08:00

星期日就係特首選舉投票日，雖然本埠大部分市民可能會覺得今次選舉早有結果無甚看頭，之但係諗深一層其實又幾有意義既。

首先，今次選舉展示到本埠市民其實心智相當成熟。老實講，經過八年建華之亂後，相信好多人已經開始懂得分辨是非，知道自己既所要所想之餘，更愈來愈懂得洞悉各路左中右政棍既政治技倆，就好似今次尊貴既梁議員家傑資深大律師就能以「選舉要有競爭」既旗號成功取得選委支持，之但係到佢正式入局同BT曾隻抽後，睇番所有民調由始至終佢都係遠遠大落後，就睇到本埠市民既心水有幾清：「我係想要競爭，即係唔想BT曾一個人玩哂，但係相比之下梁議員其實並未有足夠既競爭能力囉。」所以呢，反對本埠推行民主政制響樹阿之阿佐話香港有民主就變成福利社會選選選選到長毛出黎點算丫你班友逢中必反咁叻你做俾我睇丫笨既古老石山唔該聽聽劉夫子德華先生既話張開一下你地既小眼睛，你咁樣諗我地，係咪當我地都係冇腦架先？

講開本埠民主派，今次選舉亦證明到選民其實懂得亦願意用自己手上既一票去俾個機會你，問題係俾左個舞台俾你地之後，你地既思維仲係咪應該仍然停留響廿年前只係諗住做好監察同制衡咁低層次？你地會唔會開始諗下如何善用自己現時既議會位置，累積建制經驗，從而逐步說服本埠市民你地並唔係有破壞無建設，而係有決心亦有能力管治好香港？

老實講，以前逢選舉就落足心機搞政治議題黎吸票既務虛時代已經過去，民主派未來一定要諗諗計點樣務實地爭取本埠各路市民既支持，千萬唔好好似本埠部份仿如原教旨主義者一樣既激進左派般，只顧搶佔道德高地，透過批判別人圖令自我感覺良好，呢種集體精神自瀆既行徑，只會加速自身政治生涯既邊緣化同泡沫化。究竟執迷於一種近乎條件反射，凡事毫無退讓事事非黑即白既堅持，是否就代表自己既政治情操比別人來得高尚？企硬唔係問題，但永遠企硬倒頭來反會作繭自縛，跳得入政治呢一池濁水，就不得不接受「政治乃妥協之藝術」既遊戲定律，就好似上次政改爭拗就係一個好例子，部份死硬派寸步不移既態度不但令整個民主陣營未能達成共識，更弊既就係令到建制派可以藉此將政制發展原地踏步既帽子扣響民主派身上。

講完民主派就講返兩個「候選人」：篤定當選個件個句競選「是撈緊」委實眼高手低，以為觸動人心卻只令「我會X好XXX」淪為本埠市民既集體造句藍本，首次電視辯論亦再一次印證BT曾既臭檔脾氣，為官四十年永遠只有佢講冇人講bang埋門嘈幾耐鬧邊個都冇人gi gut佢半句架嘛，而家竟然要佢同梁議員相對地平起平坐地「辯論」？難怪佢會黑面的。至於擺明陪跑個件可能心知今次選舉實質上響選委選舉大獲全勝後已經結束，落場反而帶來驚喜，至少俾本埠市民知道，原來有競爭既選舉會為大家帶來兩次尚算有火花既口舌之爭，起碼唔駛用《高朋滿座》黎送飯囉，但係第二次辯論既時候，唔知係咪我地對梁議員期望太高，抑或佢有點high上腦，佢表現有點進退失據，患得患失，導致失去不少印象分。

最後，唔知你有冇留意到BT曾同梁議員有一個共通點，就係兩者都係港英殖民時代培育出來既社會精英：一個來自行政界，一個來自法律界。高效、中立、廉潔、穩定既公務員體系一直都係港府引以為傲既成就，而法治精神亦係本埠賴以成功既基石。噢，從佢兩個身上，又一次側面印證到本埠保守派是如何的不濟，原來爛泥真係扶唔上壁的。

足球筆記(3)

2007-03-20T01:35:00.000+08:00

20070317 - 川崎 6 橫濱FC 0

成場波俾我既感覺就係四個字：不知所謂。

第一個不知所謂，係我地成隊踢得一無是處。門將菅野孝憲其實已經盡左力，奈何成條防線毫無默契，包抄補位等等完全欠奉，老將小村德男速度極慢，對住對手快速既前線行軍完全束手無策，左右兩閘亦被對方既側擊完全擊倒，中前場亦組織唔到攻勢，內田智也同奧大介上腳機會寥寥可數，三浦知良除左開波早段響禁區右路發難一次之後就唔見左影，箭頭久保龍彥更多次要返後場羅波就知佢完全得唔到輸送。仲有最弊就係我地呢場波不僅「完敗」，下半場仲有內田智也傷出搞到踢唔到，真係雪上加霜。

第二個不知所謂，係講波個位菜肉魚。我理解本埠球評同球迷對日本足球認識可能唔夠深入，但真係唔該各路講波佬呃飯食之前先做下功課至好胡說八道：我容忍到你話高木琢也係一位強調進攻既監督 (實際上睇番上年，我地既成功其實係建基於穩健既防守，進攻好多時都係魚生粥)，我亦唔介意你話內田智也未夠班擔起中場既進攻大旗 (雖然佢其實上年已經係一個被一致睇好既待望新晉)，我真係絕對忍受唔到菜肉魚竟然話：

「川崎前鋒既前身係川崎讀賣」

妖，連呢d基本既事實都可以錯得咁離譜，還請Now TV既資料搜集注意一下。

短評TVB「312」新陣

2007-03-15T02:26:00.000+08:00

2000《同事三分親》

宣傳擺明賣三個女角：金燕玲乃好戲之人眾所周知，關詠荷亦屬觀眾緣高企之收視保證，兩者均極為吸引，惟獨剩餘個位江欣燕就真係令我難以接受，其實佢搞笑真係幾好的，從以前扮梅姊到Maria再到扮羊嫂都曾經令小時候既我捧腹大笑，但近期唔知TVB邊條茂利幫佢度左個「娛樂圈大家姐」既花朵。哇哇哇，大家姐？唔係丫嘛，江欣燕做左咁多年電視充其量只算得上係二三線插科打諢式藝員，幾時輪到佢去到大家姐呢個級數先？況且佢而家響《同事三分親》既冷酷型事業女性造型又不算討好，我覺得搵如妃娘娘做就差唔多，搵江欣燕？一大敗筆也，恐怕佢會拖累套劇既成績。仲有丫，神棍就話呃你十年八年，我而家就扮下預言家：蔣志光同苑瓊丹子好快會歸隊，處境劇冇佢地邊成事丫。

2030《亂世佳人》

胡幸而有愛繼續苦情，尚可一看，但可唔可以唔好搵賣飛佛做主角？

2130《寫意人生》

好憎黎姿，成日扮出一副戰鬥格，扮純情說服力好低，而且佢既演技真係咁多年都冇進步過，好悶，打死都唔睇。

2230《向世界出發》

拿拿拿，呢壇野扮明就係陳總經理志雲先生既重頭企劃 (雖然有偷三五台《從香港出發》橋之嫌，但我又真係唔想睇陳啟泰一個人帶我地環遊世界) 所以我寄予厚望的，特別係一d有經歷既藝人，好似阿燦曾志偉同蔡蔡芬呢幾集應該非常吸引，但係打靶仔同梁好勝個兩集就打死都唔睇。

2300《光影留情》

好好睇，因為舊香港既一切事物都係我既至愛，TVB善用自家龐大資料庫既例子之一。

足球筆記(2)

2007-03-12T14:04:00.000+08:00

20070310 - 橫濱FC 1 橫濱FM 0

從來冇諗過會贏到呢場相隔9年再次出現既打吡戰。睇番比賽精華 (呢度)，早川知伸上半場7分鐘偷雞成功帶有運氣，之後對手一浪接一浪既攻擊未能奏效亦係好彩，但係足球就是這樣的，我地J1開齋了，久保龍彥亦再一次展現自己既實力俾老東家睇，等你唔要我丫拿？呵，你會沒有好結果的。

20070311 - 布力般 2 曼城 0

睇完呢場波之後，如果我地今年唔駛降班，我會罷食一次祥利以作慶祝。後防一盤散沙，只有Dunne似樣少少 (話時話佢真係擺脫到以前既大舊衰形象)，Distin照舊懶懶閒，孫繼海？唔該唔好民族主義上腦，佢真係唔掂了；中場Hamann老態盡現，Barton又唔適應打右中場；前線就仲衰，Corradi如果係有貨賣，佢就唔會成為足球浪人了，柱躉式中鋒又唔係，射術精湛又唔係，唔知點解仲要用佢打正選，至於新仔Emile Mpenza又係浪人一名，就算以前所謂高峰期都唔係太好波，又係一件半季用完即棄既球員。

妖，打多個都可以輸多粒，我冇眼睇了。

足球筆記(1)

2007-03-04T18:36:00.000+08:00

20070303 - 浦和 2-1 橫濱FC

身為橫濱FC忠實球迷既我呢個星期日日做到冇停手竟然唔知道呢場波香港有得直播所以冇睇到又冇錄到，搞到錯過左我地既史上初J1戰，可算係人生既飲恨事件之一。Master Lo好體貼地安慰我，話橫掂之前幾年你都冇得睇直播架啦，你咪當今日都係冇直播囉，拿，呢d咪就係女人既智慧囉，哈哈哈哈。

講番場波，對住勁旅浦和，我地今場擺到明就係搏和，所以擺出一個4-4-1-1既防守陣式應戰，可惜上半場廿幾分鐘新加盟既後衛和田佑三就擺老烏送大禮，但好彩完上半場前有前國腳久保龍彥既32米長程笠射彈為我地追成平手。哇，睇番Youtube (呢度) 既片段，原來真係入得好靚，久保入波後個風騷樣又真係幾得戚的，岩啦，就係呢種感覺啦，你睇我唔起咩，我就叻俾你睇，熱切期待下星期響我地主場上演既橫濱打呲，我地既「元代表再生工廠」一定要繼續叻俾人睇的。之後以為呢鋪發達啦，1-1喎，拎到一分番屋企就當贏波架啦，點知臨天光俾人搞掂，唉....

不過算啦，我地上得J1就預左要苦戰，況且我已經老早訂下今季既目標，好簡單，就係...

「J1殘留」

還原基本步

2007-02-19T01:39:00.000+08:00

很久不見。

係咪以為呢度已經摺埋呢？其實只不過係前排公私兩忙搞到冇咩時間同心機爬格子，所以冇更新一排咁囉，是以各路仇家唔好太開心住，呢度仲未爛尾丫喂。

首先，我真係要衷心感謝響度留言既每一位朋友，你地對我同Master Lo既祝福，我會好好記住。從今以後，雖然多左一重身份，但我仍然會與往常一樣，就身邊既人和事繼續亂up廿七，還請繼續多多指教。

講番上年年尾既婚事，其實Master Lo響佢個邊都有略略提過下當日既內容同過程，所以詳情唔再多講，反而想同各位分享下我對現代婚禮既睇法。

即係咁，響今次籌備婚禮既過程當中，其實聽過唔少長輩講，對比於佢地個代而言，而家我地呢d後生細仔搞結婚已經簡單左好多架啦，以往好多繁文縟節已經隨住時代變遷慢慢從簡，甚至早遭摒棄，所以我地呢一代已經好幸運了。

之但係按我呢個八公既自身觀察同聽埋聽埋，我又唔太認同呢種說法喎。雖則而家的確冇咁著重傳統既嫁娶禮儀，但我又唔覺得而家既新人搞婚禮輕鬆得去邊喎。此話何解？皆因當今所謂追得上潮流之婚禮，其實咪又係充塞住一大堆公式化到多舊魚既環節。

唔係咩？就由新郎接新娘開始，唔知點解總係有d姊妹喜歡玩一d聽落都知唔好玩玩落就更加唔知為乜既所謂接新娘遊戲，係咁糟質個新郎同班兄弟一輪仲要係咁問人拎利是一味問人多d添啦一味錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢市儈到好似賣女咁樣最後柴娃娃一輪但又唔覺氣氛好好都算啦，更弊既就係有d橋王會諗到例如叫個未來老公食完一大篤「屎」先好入黎搵新娘既遊戲 (我知篤屎唔係真既)，真係意頭好到呢。

夜晚如果會擺酒就更加精彩。先講整個婚宴既程序，總係好公式化地全場熄燈跟住落射燈射住一對新人進場跟住個司儀就會話不如大家一齊睇睇一對新人由細到大既相片跟住開波時一對新人又會上台祝一祝酒上翅就要走勻全場敬酒上魚或者上雞既時候就會上台玩下遊戲或者唱下情歌又或者發表一番情深說話之後總有少少驚喜有哂新娘喊位之後就食糖水美點雙輝出去送客。

其實搞埋搞埋咁多野，又會有幾多賓客真係會好欣賞呢類「俾面派對」？咪又係一次又一次見到成檯十二條友因為分別有舊同事三人舊小學同學三人舊中學三人同埋舊大學同學三人所以三九唔識七全晚除左每次上菜時大叫一句「飲杯」後全檯一片死寂，或者見到台上d兄弟姊妹玩新郎新娘玩到嘻嘻哈哈忘哂形完全唔知自己企到背哂台砌左一道人牆出黎搞到台下既人咩都睇唔到剩係聽到成班人喡嘩鬼叫搞到咪都"拆"哂跟住冷冷地爆一句「妖都唔知佢地做緊咩」，又或者係新郎哥響台上情深款款地發表愛的宣言時台下賓客坐響度同身邊個個講「哇d魚蒸得好老丫d雞好鞋丫喂」。最好野就係近年由於好多新人生怕到場賓客有悶場，所以諗埋諗埋好多綜藝節目式環節加插響自己既婚宴當中，包括有玩bingo玩抽獎同埋請人番黎變魔術等等，生怕你做左五舊水公價人情當做入場費就點都要物有所值拎番d野走所以搞到婚宴愈來愈似EYT或者TVB台慶，搞到同你去公司既年終晚宴或者春茗分別不大。仲有新娘子唔知幾時開始擺酒既時候就要係咁換衫，開席影相前一套衫進場又一套衫敬酒又一套衫上台玩遊戲又一套衫散席送客又一套衫換衫成晚五六七套衫換得仲密過本埠歌手開演唱會。其實換換換換乜鬼姐，賓客們咪又係匆匆一瞥過眼咪又唔記得。

其實擺酒擺得多席數或者新娘換幾多套衫幾光鮮又或加插幾多個遊戲同環節，同你段婚姻又有咩直接關係？係咪節目越多衣著越華麗就叫做嫁得風光愛得精彩？總覺得現代婚宴既煩瑣環節愈來愈多，但一對新人同賓客既距離就愈來愈遠。除左你去到開席前同一對新人講聲恭喜哂影兩張相之後敬酒同佢地碰一碰杯最後散席時握一握手講聲拜拜之外，你又可唔可以同一對新人舒舒服服地傾番兩句？點解唔可以讓婚禮還原基本步 - 以一對新人為中心，以一段婚姻為主體？

我要結婚了

2006-12-15T12:02:00.000+08:00

我要結婚了。

與妳走在一起已有十年，能在有生之年碰到妳，是我最大也最實在的福氣。

如果沒有遇見妳，我將會是在哪裡？

從以前不知天高地厚的迷失小伙子，到現在成家立室的踏實上班族，過去三千六百五十夜的甜酸苦辣，尤幸在我身旁一直有妳。十年間的高低起落，我倆總算熬過了。

從今開始，我們二人連成一體，攜手踏入人生的新階段。

一路走來，始終如一，我會永遠記住以前一起吃苦的日子，以後並會竭盡所能，去守護妳這位幸福而麻煩的好妻子。

一世慶祝整個地球上，億個背影但和妳碰上，想說妳知整個地球上，無人可使我更想奔向。

我，找到了。 :)

《笨賊占》系列之六

2006-12-13T11:31:00.000+08:00

哇，老友，你搏拎2006年度笨賊之王都唔駛咁勇猛架...

持指甲銼維園劫情侶遇警員騰雞賊劫 570 元退還 1200 元

【本報訊】銅鑼灣維多利亞公園昨凌晨出現「指甲銼」劫匪。一名青年懷疑第一次「做賊」，在公園以指甲鉗內一吋長指甲銼作武器，威嚇一對情侶劫去 570 元及一部手機，竟意猶未盡，挾持兩人至公園外銀行櫃員機提款途中，女事主遇上警員呼救。賊人見警員出現「騰雞」，嚇得即時遞回一錢及手機予男事主求脫身，終被警員拘捕受輕傷，與受驚女事主同送院檢查。記者 : 李家傑

警方事後發現笨賊慌亂間，退回給事主的現金竟有 1,200 多元，較所得的贓款為多，有警員笑言被捕疑犯「做了蝕本生意」外，還要面對法庭的判刑，代價實在是太大，並懷疑賊人是行劫「初哥」，所持之武器只是一片指甲銼，港島東區重案組已接手調查，並追查疑人打劫的動機。

押往提款時遇警呼救

劫案現場為銅鑼灣維多利亞公園，每日深夜至凌晨時分，均有不少情侶在公園內談心，而公園過往亦曾發生劫案。昨凌晨 1 時許，兩名姓鍾 (27 歲 ) 及姓張 (21 歲 ) 男女，在維多利亞公園談心時，一名賊人突然出現，以指甲鉗內約一吋長的指甲銼做武器，威嚇兩名事主聲稱打劫。由於公園內光線昏暗，兩名事主還以為賊人手持之武器為小刀，所以不敢貿然反抗。賊人掠去男事主 500 元現金及一部手機，以及從女事主手袋內取去 70 元，懷疑賊人嫌收穫不多，隨即挾持兩名事主至公園外銀行櫃員機擬提款。當三人一前一後行經百德新街與記利佐治街交界時，剛巧有兩名警員巡邏經過，女事主見警員出現機不可失，即時高聲呼叫「打劫呀」。

警員取笑 : 做蝕本生意

 現場消息稱，賊人見事敗一時間方寸大亂不知所措，隨即將口袋內一錢及一部劫來之手機遞回男事主企圖脫身，他並轉身朝怡和街方向逃走。兩名警員立即啣尾窮追數十米，終於在怡和街街口將賊人制服，並在疑人身上撿獲疑涉案的一柄指甲鉗。糾纏間，姓陳 (20 歲 ) 疑犯頭部受輕傷，女事主亦因遇劫受驚不適，兩人送院治療後無大礙，該名笨賊其後被帶署扣查。 警方在現場點算贓物時發現，疑犯慌亂間退回給事主的一現金，竟有 1,200 多元，數目較被劫的 570 元贓款為多。 有警員對疑人的「騰雞」舉動，笑言他可能是打劫「初哥」，結果「做了蝕本生意」兼失手被擒。消息稱，涉嫌行劫的陳姓青年有刑事案底，警方正追查其犯案的動機。

橫濱FC - J1悲願昇格達成！

2006-11-26T23:04:00.000+08:00

隨住今日作客鳥栖時Alemao下半場一戰定江山，我地終於確定得到J2冠軍，取得下年昇級至J1既資格。

6年，足足6年。身為遠在香港既橫濱FC球迷，我知道消息後真係好激動，激動之處不單在於我們升到班，而係在於我地從6年前既萬年弱旅，經過6年經營，終於達成昇格呢個目標既奮鬥過程。

要知道我地並非財雄勢大既傳統勁旅，冇能力一擲千金狂買大牌球星打造鑽石陣容，我地只係6年前由一群前橫濱Flugels既球迷籌組而成既球隊。當年因為橫濱Flugels金主全日空唔肯再出錢搞波，一眾球迷唔忍心睇住自己既愛隊被迫解散，故此球迷們有錢出錢，有力出力，以市民會社形式組成一隊真真正正屬於橫濱市民既球會。我自己就係俾呢份兄弟班既「地味」感覺深深吸引，因為足球從來都唔係大老闆或者自覺資深既球迷既專利，足球係一種全民運動，係一種可以令到一個地區，一個城市，甚或一個國家得以更加團結既共同語言。

起初兩年，我地既成績可謂慘不忍睹，但過去幾季，我地好慶幸得到幾位曾經失意於頂級聯賽既沙場老將加盟，尤其一班前日本國腳城彰二、三浦知良、山口素弘同小村德男等既鼎力相助，以佢地既豐富經驗，配合一批如Tweed、Augusto同埋Alemao等優秀洋將既支援，帶領我地以菅野孝憲同內田智也為首既年青球員急促成長，一步一腳印地達成昇格既終極目標。

來年，J1見！

納米豪宅？

2006-11-22T14:41:00.000+08:00

本來想寫另一個題目，不過hold住先，因為呢幾日睇電視同報紙，見到本埠某地產發展商鋪天蓋地既樓盤廣告，標榜其新盤住客可盡享「納米海濱貴豪生活」喎。

據我呢個科學白痴既理解，「納米」者，即係一米既十億份之一 (唔好問我有幾多個零，我數學程度只有小學六年級，總之係好微細啦)，乃一度量單位而已，本質上同毫米或者厘米冇分別，咁點解呢個新盤又可以叫做「納米」呢？我諗左幾日，可能班宣傳大員有以下既弦外之音：

呢個新盤既單位大小，只係好似「納米」呢個概念一樣咁纖細；
呢個新盤既單位大小，全部係以「納米」黎做量度單位，令一眾買家買樓時自我感覺良好，可以大大聲同人講哇你睇我個單位既實用面積有成xxx,000,000,000,000.... 納米咁大丫有咁多個零頭我住既唔係豪宅係咩丫；
呢個新盤既單位，可以望到只能用「納米」黎做量度單位至計得掂既「海濱」景色；
呢個新盤既住客，雖然可以過住「海濱貴豪生活」，但呢種咁中產咁優雅既生活原來只屬「納米」式，即係人地d大戶人家個個星期環遊全世界去唔同既「高而富」球場落場打番十八個洞既同時，呢個盤既住客就只能去個d處於鬧市既所謂golf club (唔係「高級」)，對住幅空地係咁開波開足兩粒鐘跟住同人講喂我成日都去打「高而富」球的唔係貴豪係咩丫，又或者係人地d大戶人家每年飛去法國波爾多既私人酒莊品酒同大宴親朋既同時，呢個盤既住客就只能落樓下既百佳 (你放心一定唔會有惠康的) 買支唔知邊度出產既紅酒跟住仲要為左易入口少少所以溝埋可樂一齊飲又同人講喂我而家飲wine丫唔係貴豪係咩丫；或者
呢個新盤既住客全部都係「納米」一族，即係每個月既人工好「納米」，每個月份糧供埋樓之後就變得更加「納米」。

究竟下次本埠既地產商賣新盤時，仲可以用咩噱頭呢？

娛樂短打

2006-11-14T23:51:00.000+08:00

近排公私兩忙，放工唯一娛樂變成睇電視，點知唔睇尤自可，一睇就把幾火。

《肥田喜事》

三個字：「雷聲大，雨點小」。胡杏兒其實幾有觀眾緣，可惜呢次中空寶囉，皆因呢套所謂重頭劇一來劇情嚴重反智，二來竟然用犯眾憎既老鼠安做男主角，三來搵件一年三百六十五日全天候三百六十度廿四七都自以為自己好靚仔又高大又識彈琴又大隻又有對殺死人既迷人眼睛既高某扮靚仔。大佬丫，高某個款係唔錯，但唔係型得很個隻囉。我起初以為佢因劇情需要至要咁作狀，點知上兩星期睇佢上《15/16》佢都係咁既死款，連企響度拎住支咪都要側側身丁字腳雙手插袋成個瀟灑哥咁既樣，但係又講野講到一舊舊同埋語焉不詳言不及義，唉，港男冠軍喎...

真係笑死我囉

講開TVB，我真係想有番《K-100》，等我可以上去自由講囉。大佬丫，明明已經有首席喜劇泰斗林某同埋本埠播音王子梁某坐陣架啦，而家仲要搞多個節目俾本埠殿堂級笑匠杜某擔大旗。哇，真係笑死人唔使本咩？

明星夢

前陣子響電視精+行家mon姐個blog度睇到以前TVB個位小演員「東東大師」既近況，佢已經由一個老積童星進化成一件MK潮童，唉，睇到都真係幾唏噓咁囉。須知每一行都係你睇我好我睇你好既門面野黎姐，你睇到當下既明星天王天后表面風光，萬人景仰，但我好相信佢地響背後一定有下過苦功至有今日既光景囉，台上一分鐘，台下十年功丫老友。

你班靚仔靚妹自恃有幾分姿色 (拿拿拿，真係幾分架咋，響現今世代各位型男索女都或多或少懂得打扮既情況下，真係十八冇醜婦的) 就成鬼日發埋哂d明星夢，一個二個未學行就先學走。我覺得發夢唔係問題，但重點係你有冇實現夢想既實際行徑，套句台灣政界既述語，即係你既「執行力」有幾高？當你發你既春秋大夢時，又有冇同時擬訂具體既行進計劃？有冇咩短期、中期同長期目標？只說不做有幾難，週不時都響網上見唔少呢d講就天下無敵做就無心無力見埋真人就只覺佢不自量力既傻仔傻女出沒，但又有幾多可以講得出做得到 (或者起碼認真地嘗試去做)？前排我睇番TVB收費電視既《無線大寶藏》，有兩集係播番TVB既一哥一姐們以前做新人時既訪問或者片段，好多你今日見到大有成就既明星，其實入行前都真係對戲劇工作有濃厚興趣，讀書時有參加劇社既活動，甚至有部份會度埋劇本做埋導演，入到藝訓班後學習主動之餘，又肯虛心受教，尊師重道，到你畢業後又要做好多年路人甲乙丙至熬出頭來，機會得來不易。單憑一顆虛榮心，我唔相信佢地可以撐得咁耐。

或者你會話，你條老餅駛唔駛咁認真丫，我都係諗住唱下歌玩下姐，但娛樂圈呢口飯根本就唔係想像中咁易食，皆因呢行既可預期性太低，實在有太多太多你無法控制既外在因素決定你能否一夜成名，君不見好多有外型有內涵有食力既藝人撈足三十年都只係梅菜一條，反而有d你睇落去就覺唔順眼聲大大冇貨賣既茂利可以長做長有？答案點解？咪就係冇得解囉。此外，呢行人際關係同交際手腕好重要，但偏偏呢樣野就好講每個人既際遇同彩數，唔係你話你好勤力好有心就搞得掂囉。仲有丫，你又有冇諗過假若你真係咁好彩俾你紅到，你又會私隱盡失毫無自由可言，一舉一動都有本埠傳媒同師奶兵團日日同你做道德評估，你又頂唔頂得住呢d活在放大鏡下既日子？

所以，響發明星夢之前，務請各年青人三思，三思。

從煎釀三寶說起

2006-10-28T12:35:00.000+08:00

工聯會煎釀三寶呢個星期認真威威，先有陳某自感受屈哽咽會議廳，再有鄺某激動回應大舊之指控。其實你兜友要轉軑咪轉軑囉，都唔係第一次架啦，早已見怪不怪，你地要怨就怨自己開波時"open too high"，又咩反對致謝議案又咩司法覆核政府唔做最低工資既決定。唉，此乃兵家大忌也，連我此等廢料學生上advocacy既時候都記得RP呢句名言啦，身為大狀既鄺某，你食鹽多過我食米，你唔係咁都唔明白丫嘛。當然，如果你地話原來呢一幕係預先排演既高潮所在，咁又真係好睇過無記既《高朋滿座》少少既。

其實鄺某響發言回應大舊時既一番說話亦可圈可點，原文照錄：「我的立場哪用你（陳偉業）質疑﹖陳婉嫻哪用你質疑﹖我哪用向你交代﹖我們做工會那麼多年，哪用你去教﹖」拿拿拿，如果對呢番說話作出具體既文本閱讀同分析 (哇，好post-structural丫我)，就可以瞭解到鄺某呢番說話既潛台詞：

「我哪用向你交代」呢一句，反映到因為鄺某明白到佢既權力來源係來自功能組別既小圈子選舉 (佢身處既勞工界更衰到用block vote，簡直係政治分贓既最高表現)，所以佢自然唔駛向我等地區直選選民交代，所以從呢句話就可以睇到鄺某佢有心魔丫，佢有一種自覺高人一等既心魔丫，呢種精英心態同佢既工運形象大相逕庭，認真要不得，要不得；

「我們做工會那麼多年，哪用你去教？」呢一句，反映到鄺某既心態就好似一d自覺資深既球迷一樣，見到d靚仔靚妹加入睇波行列，就會擺出一副老行尊既咀臉大大聲話：「人睇波你又睇波，阿叔個陣睇歐偉倫/譚拔士/山度士/巴貝利/顧錦輝/... (總之就係越數得後就越威威) 響大球場踢波既時期，魚旦仲賣緊一毫子一串咋細路」，從中展示佢至係最識波既球迷，你地呢班濕星廢柴唔識野就唔好指指點點亂up廿七咁囉。拿拿拿，鄺某呢種鄙視別人既心態不但欠缺對門外漢既包容同諒解，更有意圖獨佔本埠工運市場之嫌，簡直同中共堅定不移既均平主義大家happy既思想指導背道而馳，唔通鄺某係咱們勞動人民既敵人？

講開最低工資，其實呢個問題已經爭論左超過一百年，正反意見都真係聽到臭，仲悶過睇無記首席喜劇泰斗林某做節目。平心而論，呢味野要做既一早做左，唔肯做既始終唔會做。我只係覺得，如果大家都認為我們應該將僱員當作一個「人」看待，咁就應該俾出賣勞力既打工仔女得回一份有尊嚴既報酬 (respectable wage，哇，又拋書包啦我)，唔好再用咩差經濟理論黎做借口咁囉，正如中共都識講：「實踐是檢驗真理的唯一標準」，唔試下又點知掂唔掂先？ (我所指既「試」當然唔係指而家政府提出個類呃細路既無法律效力既自願約章，而係硬橋硬馬立法個隻)，況且本埠商界為馬首是瞻既英美兩國一早已經訂立法定最低工資，成日想「超英趕美」既我地，而家又係唔係落伍左d呢？

三個字：「高收視，冇難度」

2006-10-17T22:10:00.000+08:00

前幾日睇娛樂版，知道TVB現正趕拍2007年度既節目巡禮。近年本埠電視製作成日俾人批評話冇新意又冇深度，所以我攪盡腦汁幫TVB度左三個節目，如果成事開拍播出，TVB收視保證晚晚過40點，到時警務處處長利孝和夫人仲唔開心到痺？

以下排名不分先後：

《志雲週記》

成日睇TVB都總係見到陳總經理志雲先生一唔係好溫文地響飯局裡頭同d嘉賓有講有笑，就係好緊湊地率領全港藝人向本埠劣質傳媒嗆聲說不，上星期仲見到佢去九公睇個個難民生活體驗營添。既然TVB認為咱們咁有興趣晚晚留意陳總經理既一舉一動，倒不如就整個《志雲週記》節目，每周闢半粒鐘出黎俾伶牙俐齒既陳總經理滿足一下上鏡慾，點醒下我等頑劣後輩，如果反應良好，TVB更可考慮將呢個節目改為《志雲日記》，甚至《志雲24/7》，讓廣大觀眾都能夠每分每秒緊貼陳總經理，掂丫。

《笑話教室》

呢個節目既主持人加大腦加幕後策劃加度橋都係林曉峰，肯定不作他人選。林先生身為TVB既首席喜劇泰斗，幽默感豐富，響節目裡面佢唔單只會教大家點樣創作自以為好笑既笑話，佢更會粉墨登場身體力行地教廣大觀眾如何講唔好笑既笑話，呢度至係賣點嘛。特別本埠部份女子經常批評此地充滿毒男，林先生更加要落力地以自身經驗，點化呢班溝唔到女既可憐蟲如何憑口技奪得美人歸，就好似佢自己能夠響短時間內拋棄糟糠後立即與TVB三線藝人康某行埋仲要幾年內連"beep"兩粒一樣。至於嘉賓方面，我強烈建議TVB可以搵本埠最受年青人歡迎既電台既DJ梁某及某風趣二人組合做助手，當然最尾一集就要搵電影電台雙棲動物杜某壓軸至夠派頭。

《TVB Lanyum Eleven》("懶音十一人")

相信好多人都會聽過《Winning Eleven》("勝利十一人") 足球遊戲系列，所以TVB大可照辦煮碗，來個《TVB Lanyum Eleven》("懶音十一人") 遊戲節目。遊戲玩法好簡單，TVB首先揀十零件滿口懶音既女藝員 (梗係女藝員啦，你話《美女廚房》好睇d定係《美男廚房》好睇d先？) ，然後安排佢地持續參加發音改造班，每集由觀眾用「匯應公」投票"西"走最有進步個件，最後留底個件就會得到TVB「懶音一姐」既美譽，戰況肯定殘酷過《殘酷一叮》。我當然唔會齋talking (我係咪好潮？)，以下就係我提供既建議陣容 (見圖)：

門將：林漪琪
自八十年代開始已滿口懶音，經驗老到，冷靜穩健

左後衛：唐詩詠
新晉年青球員，身型稍嫌細粒，但懶音程度搭夠

右後衛：姚子羚
同為新晉球員，身型亦較瘦削，都係懶音程度搭夠

中堅：蔡少芬
有身高夠經驗，懶音程度近年漸有改善，相信好快會離隊他投

中堅：林莉
球隊新丁，年青有身高，懶音程度屬恐怖

防守中場：梅小惠
征戰沙場多年，大山婆身型打防中最fit，懶音加馬嘯係佢既必殺技

進攻中場：郭可盈
懶音程度偏高，據聞性格唔好惹，踢中場鎖匙人俾波肯定夠哂陰毒

左翼、右翼：周汶錡、周麗淇
呢對姊妹花快翼身價不菲，佢地合作駛出既「一飛衝天懶音射球」更聞名全球，一眾球迷置身其中，有如盡享雙聲道懶音裝置，好爽丫

前鋒：陳彥行
懶音指數屬極高，多年來入球無數

前鋒：黃紀瑩
球隊另一多產射手，自十來歲出道懶音指數長期處於高位，穩佔球隊正選席位

後備一：李珊珊
名震天下既高大柱躉式中鋒，其撞死馬打法殺傷力極強，懶音指數極高，可惜近年處半退休狀態，惟有下半場至放佢落場搏殺

後備二：宋芝齡
來自韓國既外援，佢韓文算流利，國語算OK，但廣東話懶音指數卻呈日益攀升之勢，而且佢成日都要飛去韓國訪問阿Rain，故只暫列後備

致鄭欣宜小姐

2006-10-09T00:03:00.000+08:00

Dearest Joyce,

How are you I'm fine thank you.

當我last week睇住TV食dinner既時候，我suddenly notice到你好enjoy咁去拍你既latest MV。Wow！你跟住rhythm起勢twist your body個個樣真係好wild好charm，簡直將蔡依琳都比下去，你至係the genuine dancing queen囉。To be honest，我真係完全expect唔到你雖然只係in your teenage，但原來係好有heart去入娛樂圈囉。你last year從Canada返黎Hong Kong個陣，join左修身堂個減肥programme後成個人真係slim up左好多囉，出黎個effect好fresh丫，令到我好鬼impressed呢。

And then我又見你到響TV度扮Snow White喎，響Disney門口同七個小矮人dancing個part真係俾到我一種好princess既feeling囉，我仲有睇埋你專登飛去Japan拍個個MV「想飛」架，你既voice好有自己既style，especially從你以前成日唱English songs當中，我真係feel到你既accent同pronunciation好western囉，I think你其實好有talent to be a superstar囉，which is「可愛教主」囉，楊丞琳？你叫佢save啦，點同你compare喎。

但係呢，I really don't understand why咁多人都咁hate you囉，又話你扮Snow White好disgusting同埋太過artificial影衰哂princess既image，又話你kiss「賣飛佛」搞到人地好embarrassing，仲搞到廣管局接到破哂record既complaints話睇完你既performance之後feel not comfortable添。Oh! Jesus Christ! 佢地真係exaggerate too much囉，picky到死丫d人，我話丫，佢地jealous你有個咁好既mammy幫你fight到好多exposure就真。Real gold didn't afraid of fire，我一定會十卜你架，add oil丫！

Joyce，I know you're a good girl。我appreciate你有著一份好strong既determination同confidence去殺入娛樂圈，唔係咩？你give up響Canada既study，連university都唔讀就一個人came back to Hong Kong喎。但係你at the same time都要understand而家你mammy既病其實都幾serious架，所以in the future你好可能要spend好多time去look after佢囉。I mean就算你幾tough都好，你要孝順mammy就總要give up一d野架啦，係咪？俗語都有話啦，"Have duck must have suck"嘛。所以你都係暫時stop左你既jobs先，好好地look after你mammy until佢recover哂先再handle入行既事啦，ok？Trust me no die的。

Regards,

John

娛圈廿問

2006-09-23T01:19:00.000+08:00

我等八公，閒來無所事事，飽食終日，總要刨刨本埠娛樂版及大小八卦雜誌才覺心安理得，但睇得多心中對本埠娛樂圈既問題亦天天都多，到底有誰能夠告訴我，以下廿條問題既答案 (排名不分先後)？

點解見親原子鏸就一定會見到鄭珮珮 and vice versa？
點解楊天經有得見報上鏡既時候佢一定係探緊寶珠姐既班？
點解葉佩雯唔見幾年後會突然從以前既日系dance beat少女變成個樣極度兇狠成身黑麻麻既rock女？
點解古巨基唱親歌個樣都要三七面個咀一定要"木"起拎咪隻手一定要"fing"下"fing"下個身一定要起勢搖？
點解d司儀咁鍾意叫d觀眾"俾d掌聲自己"？
點解陳欣健做親司儀都總會唱番支歐西流行曲？
點解所有大騷起首都要搵隻歌改下歌詞唱番個騷既主題出黎？
點解所有大騷最後都要迫d嘉賓飲紙碎香檳？
點解飲食節目既主持試親菜都只會講"好香好清好滑好爽好鮮芒果布甸好有芒果味同埋晨早俾麥兜玩到臭既好有口感"？
點解《東張西望》「開心天氣提示」個part既gag可以爛成咁都仲未摺埋？
點解電視劇既西人個名唔係叫做Mr. Robinson就係叫做Mr. Smith？
點解張衛健拍親個d大陸劇時都要創作一句口頭禪然後講完又講講完又講講足成套劇？
點解彭健新可以響娛樂圈存活到三十年？
點解睇演唱會一定要成場企起身起勢跳起勢fing大聲跟住唱至叫投入同enjoy？
點解d歌手響演唱會愈來愈鍾意唱別人的歌唱到好似成班觀眾跟左佢入K房消遣一樣？
點解次次都有歌手響年終頒獎禮無論拎大獎細獎定豬肉獎都要作勢喊但總係喊唔出？
點解個個女仔參選港姐既原因都總係"我陪朋友去報名咋點知誤打誤撞就入左圍"？
點解個個男女參加新秀既原因都總係"我響外國返香港放暑假見冇野做咪報名玩下囉"？
點解本埠娛記咁鍾意幫外國藝人改埋d咩"靚佬湯福伯娜姐步姐聖子姨"呢類懶親切既稱謂？
點解... 點解我仲會咁留意本埠既娛樂圈？

《笨賊占》系列之五

2006-09-23T00:14:00.000+08:00

遲到好過冇到，呢個賊仔掂丫。

警方消防到場拯救　意外搗樓上鹹碟檔竊匪爬渠逃被困嗌救命
蘋果日報 9月11日

【本報訊】一名膽小賊，昨凌晨潛入旺角豉油街一個四樓的單位企圖爆竊，未及搜掠已經被門外的聲響嚇怕，作賊心虛爬外牆逃跑，但又因水渠濕滑危險，登時雙腳發軟無力，被困半空呼叫求救，結果要消防員拯救，其後被拘捕帶署。不過，事件卻意外揭發遭爆竊的單位竟存有數千張色情光碟，疑是「樓上鹹碟檔」，警方撿走所有光碟進一步調查。 被捕竊匪姓梁（ 27 歲），過程中他顯得相當「驚青」，雙手抱水渠「騰騰震」的模樣更令在場人員啼笑皆非。

渠濕滑舉步維艱

現場是豉油街 21 號 C 一幢樓高六層的唐樓，昨凌晨 4 時左右，疑犯潛入四樓一個單位企圖爆竊，不料卻發現內擺放大量色情光碟，似乎並無貴重財物或現金，正想仔細搜尋之際，聽到屋外傳來聲響，作賊心虛，以為行藏敗露有人返回，慌忙脫去波鞋爬出外牆逃跑，可是天雨過後水渠濕滑，舉步維艱，疑犯多次跣腳幾乎墮下，嚇得他緊緊抱水渠不敢郁動，無計可施只好高呼求救：「救命呀！我返唔到入去呀！」驚動途人代為報警。消防員接報到場借用五樓一個單位爬出外牆，然後用繩索綁腰協助疑犯爬回室內。警方查問之初有人支吾以對，一時說是單位住客，一時又稱找人，最後承認企圖爆竊，於是將他拘捕。

街上派卡片宣傳

警方隨即在該個被爆竊的單位調查，發現內空無一人，陳設亦相當簡陋，但存放了數以千計色情光碟，包括歐美、日本的製作，估計是售賣色情光碟的「樓上舖」，於是撿走所有光碟進一步點算，並追尋屋主下落。初步估計上址是出租單位，警方不排除將以藏有淫褻物品可供發布用途，對有關人士提出檢控。這類鹹碟樓上舖，在去年底開始流行，犯罪分子為逃避警方追查，在街上以派卡片形式宣傳，並僱用雙程證人士或癮君子睇檔，舖內貨量不會多，即使被搗破也可減少損失。

《笨賊占》系列之四

2006-08-24T22:21:00.000+08:00

前幾日發生，而家至貼番。

男子竹籤偷電話亭4元
(明報) 08月 15日星期二 05:05AM

【明報專訊】獨行竊匪昨早竄進土瓜灣炮仗街一個電話亭內，悄悄以竹籤伸進電話投幣口，經多番嘗試，終將4枚1元硬幣撥出。當他正沾沾自喜欲繼續偷錢之際，多名身穿便服在附近巡邏的警方特遣隊探員，已在四周注視其動靜，探員待時機成熟一擁而上，將偷錢賊拘捕，正調查他是否涉及過去同類案件。

竹籤撥4枚1元

被捕的40歲男子余╳明其後被押返警署調查，警方在他身上起回4枚1元硬幣，相信是余從涉案電話亭內偷取。現場是土瓜灣炮仗街及落山道交界一個電話亭，昨早11時15分，余獨自步行至上址並竄進電話亭內，他以為四周無人留意他，悄悄取出一支竹籤伸進與錢箱相連的電話投幣口，經多次嘗試，吃力地先後將4枚1元硬幣撥出。

余正竊喜並欲「再接再厲」偷錢，懵然不知自己的一舉一動已被多名在附近巡邏、身穿便服的紅磡警區特遣隊探員監視，數名女探員更穿著「街坊裝」，拿着載滿蔬菜蘿蔔的膠袋，假扮主婦在電話亭附近徘徊，他們見時機成熟馬上採取行動，一擁上前將余制服拘捕。警方正調查余是否與過去多宗同類案件有關。

給我碰到的仇人們

2006-08-16T00:15:00.000+08:00

很久以前我曾拜讀陶傑一篇刊載於壹週刊Book A的文章，提及他當年於左派學校中五畢業後有意到英國升學，於是摸到禮頓道雲翠大廈海外留學輔導組查詢，怎料接見他那位身披茄士咩的EO女士在得悉他的成績只屬「魚生粥」後就態度傲慢地拋下一句：「你都係去英國讀三年英文至讀高中啦。」這位殖民地官僚卻意想不到，她這句冷酷無情既說話會變成激勵這位年青人決心上進的轉捩點，令到陶傑立刻向自己說：「我唔單只過到去要即刻讀到高中，到時學成歸來仲要娶埋你個女！」其後陶傑放洋英倫讀中五時要讀莎士比亞《仲夏夜之夢》，但因英語程度不高故須拿著字典逐個字逐個字去查，所以一個小時才看得廿餘行，但任憑陶傑讀書讀得多苦也好，只要他一想起那位EO女士的嘴臉，鬥心就自然回來。

當我第一次看到這個小故事的時候，頓時覺得這段文字正正是我當年重讀中七時心情寫照。我承認，我是一個頗為記仇的人：你們當年在我失意低落之時曾經大我辱我話我害我的日子，我其實都已好好記住這筆帳。每當我身心俱疲極想放棄的時候，我就會強迫自己回想起當年目睹你們那一張又一張對我冷嘲熱諷的嘴臉，與及記起你們每一句羞辱我奚落我看扁我和恥笑我的說話。只要想起你們，我就想起「寧欺白鬚公，莫欺少年窮」這句老套話，就能重新得力，抖擻精神，繼續咬緊牙關挺下去。

雖云仇恨仇恨，但記仇不一定等同記恨，仇怨對我而言就像是一直推動我不停向前走既催化劑，當年的恨意亦老早隨歲月流逝而煙消雲散。如果有一天我有幸能與你們於繁囂的街道上相遇，我會讓你知道我竟能憑著奇蹟活下來，然後從你放大的瞳孔中得悉你那張故作鎮定的臉龐背後的錯愕和詫異後，向你致以最深的謝意。

致各會考生的政治不正確言論

2006-08-10T01:58:00.000+08:00

各位長佔道德高地既衛道之士，以下呢篇乃極度政治不正確既言論，唔岩聽的話煩請過主。因為思緒比較混亂，所以決定用點列方面表達出黎：

1. 千祈唔好信埋哂d乜鬼野「求學不是求分數」或者「條條大路通羅馬」呢類花言巧語。「求學不是求分數」？你試下拎住一張唔夠八分既會考證書去其他中學敲門報預科，睇下企響門口個兩個prefect仔俾唔俾你入學校門口半步丫拿。考得會考就係要考一個好成績返黎，因為整個遊戲既玩法由始至終都只係「認分唔認人」，你話殘酷又好無情又好，現實就是這樣的。

2. 如果今次因為成績唔理想而搵唔到傳統預科學位，千祈唔好信埋哂個堆唔知乜頭乜路既私人辦學團體呢輪推出既排山倒海式宣傳攻勢，響徬徨情急之下為求有書讀有人收留就落搭報埋哂個d學乜學物上至天文下至地理甚至有如社區中心興趣班般既乜鬼文憑或證書課程 (我今朝睇《頭條日報》至見到有間機構搞左個跳街舞證書咁上下既課程，有錯請指正)，因為一來呢類課程質素毫無保證，大拿拿俾十皮八皮野都唔知師資同課程內容係點樣，二來呢類課程既認受性亦頗受質疑，宣傳上話讀三兩年就可以升海外大學，但細心睇下就會發現你升到上去既只係一間原來響美國排名第4,788，全香港都冇人識既野雞大學，到時你駛左一大舊錢事小，浪費左幾年青春至唔抵嘛，對不對？

3. 至於從副學士先修班駁去副學士再駁去學士學位雖然都係一個可考慮既選擇，不過響現時嚴重缺乏銜接配套既環境下，你要做好以下心理準備。第一，現時全港每年可以從副學士成功升讀本地學士學位課程既人數唔夠一千人，所以呢幾年間學校對你既成績要求一d都唔低，至怕你到時副學士畢業升唔到上去決定出黎搵工至發覺副學士既認受性根本唔高最終變成倔頭進士就兩頭唔到岸了；第二，由副學士先修班爬到上副學士既學費因為全屬自負盈虧既關係其實一d都唔平，到時讀唔上去半途而廢就「賠了夫人又折兵」。

4. 或者你會話，你條友仔講到個個選擇都咁屎，咁你想我點先？我而家就話你知，如果你今次失手，我既建議就係：「重‧讀‧中‧五」，因為我始終覺得，目前響香港升學既途徑雖然五花八門，但正如先前所言，好多所謂既另類升學選擇其實都起碼有以下其中一個缺點：

陷阱處處
前景模糊
可預期性太低
認受性成疑
花費高昂

5. 相反而言，我個人認為響「搏一鋪」既前提同「限米煮限飯」既制肘下，重讀中五已算是較為可取既升學途徑：第一，可預期性夠高，亦即「有路捉」也，皆因你夠十四分，你就幾乎肯定可以升讀中六 (雖然對留校重讀生黎講可唔可以原校升中六要視乎你既同學有幾叻叻)；第二，效益夠高，只須多花一年時間 (當然假設你一take過搞掂啦) 就可以升中六；第三，認受性極高，因為會考乃本埠一行之已久既考試制度。

6. 或者你會話，一定要讀得成書既咩，我出黎做野唔得咩，李嘉誠冇乜點讀書咪一樣搵大錢，但係我話你知，第一：香港只係得一個李嘉誠，你要發夢就唔該早d訓；第二，香港以前真係機會處處遍地黃金，好多目不識丁既小伙子真係可以單憑一對手加一份肯拚搏肯捱苦既工作態度就能打造一個又一個香港神話，但響現時強調知識、創意同管理技巧既全球化經濟環境下已經再冇呢支歌仔唱，而家連以往算得係天之驕子既大學畢業生既工作收入同發展前景都只係勉強過得去，你學歷又唔夠只係單靠一鼓牛勁只會創造出一個又一個笑話，唔該認命啦老友。

6. 當然，我知道重讀中五呢一年係好難捱好惡啃，因為你唔單只要用一年黎應付中四中五兩年加埋既課程內容，而且你既心理壓力亦會好大添：一方面係「不成功便成仁」既考試壓力，另一方面既壓力係來自成績比你好既朋輩友儕既嘲笑同輕視眼光。但係我可以話你知，你現時面對既困境，相對於未來你要承受既壓力，無論響數量同程度上都只係「蚊脾同牛脾」，我敢寫包單，你如果挺得過呢一年，你以後亦一定能夠有辦法面對人生上既種種困難。由天真幼稚成長至成熟定性，就係由你重讀呢一年開始。當你老來回望你既一生，你更可能會多謝上天要你當年咁樣跌一交至開竅發憤向上都唔定的。點解我會咁清楚？因為，我都算係過來人囉。

7. 又當然，如果閣下屋企有能力供你放洋留學，即係自恃「有後路」者，你大可以當我放屁教壞細路囉，早抖。

《笨賊占》系列之三

2006-08-09T23:30:00.000+08:00

少年躲床認樣助擒竊匪兩賊撬門掠3萬財物酒樓品茗遭認出
(明報) 08月 09日星期三 05:05AM

【明報專訊】筲箕灣昨日發生一宗爆竊案，拉人過程曲折。一名15歲少年獨自在家期間，兩名爆竊匪拍門試探是否有人，少年因為不認識對方，沒有開門，對方則以為屋內無人，撬門入屋，少年大驚躲在床上，蓋著被子不敢動，匪徒掠去3萬多元財物後離開，一直未有發現少年。警員接報趕至，帶着少年四處兜截，發現兩匪正在附近一間酒樓品茗，將兩人拘捕。

單位陰暗未察床上有人

被捕竊賊分別姓馬（26歲）及姓劉（25歲），警員在兩人身上搜出3萬元現金、金鏈及單位戶主的護照等，並根據兩人口供，在酒樓廁所水箱搜出200元散銀及在後樓梯搜獲爆竊工具。

現場為金華街17至19號一幢10層高商住大廈，遭爆竊的單位在8樓，45歲姓戴戶主夫婦育有一對子女。單位大門旁邊放有一張碌架床，外面包著布簾，疑因單位環境陰暗及擺滿報紙等雜物，匪徒一時間未有發現床上的少年。

見人撬門暗中致電父親

事發昨早11時許，兩名匪徒從大廈後門撬閘潛入，疑以「打盲毛」方法，逐家逐戶按門鐘尋找無人單位爆竊。匪徒到達戴家按門鐘，當時獨自在家的15歲文仔從防盜眼看見兩名陌生男子，以為是「摸錯門」，沒有理會。詎料兩匪以為屋內無人，隨即用鐵筆撬門進入，文仔聽到異響，再從防盜眼查看，發現有人撬門，暗中致電父親，並閃進碌架牀上蓋著被躲藏。

天台攀至鄰廈歎茶

兩匪入屋後，隨即大肆搜掠，一直未發現文仔，掠去約3萬元財物後，即匆匆離開，並走上大廈天台，攀過圍牆逃至隔鄰大廈，其後走到該大廈3樓的酒樓，在廚房對開卸下爆竊工具，再經廚房進入酒樓，然後坐下歎茶、吃點心。

未幾，警員到場，經搜查後識破兩匪逃走路線，並懷疑兩匪可能逃進酒樓。兩匪當時仍不知道自己容貌早已被文仔記下，爆竊工具亦已卸下，疑沒想到警方可在眾多茶客中找到他們，故按兵不動未有逃走。不過警方帶著文仔前往「點相」，迅即認出兩匪，警員將兩人拘捕並起回所有贓物。

劉某與「長毛」

2006-08-06T23:27:00.000+08:00

尋晚睇「畸寶」直播立法會審議《竊聽條例》草案，對兩位尊貴既立法會議員有截然不同既睇法：

1. 隸屬「真誠為香港」組織既議員劉某果然係一件廢物，以為自己語調好強硬，三句唔埋兩句就人身攻擊上綱上線，唔該先跟你地個位前主席曾某學下辯才至好走出黎做打手 (平心而論曾某既辯論邏輯真係幾好的)，呢鋪畫虎不成反類犬，你班黨友真係多得你唔少。拿拿拿，雖然我唔認同本地左派大部份立場，但我一向都好尊敬個班一路走來都堅持自己政見，好似徐老鄔公曾Sir呢班老左派，佢地其實某程度上都幾可愛的，起碼真係誠心相信自己個一套，唔會忽然愛國突然變臉。但係呢件劉某響1991年岩岩有立法會地區直選之時其實係民主黨前身「港同盟」既一員，不過響新界北區直選落敗後就埋怨黨友們當時唔俾佢上位，最後仲退埋黨響沙田搞壇「公民力量」過左幾年冷河之後就入左同「民主」兩字風馬牛不相及既「真誠為香港」組織。雖說政治乃妥協之藝術，但你竟然可以為左一個立法會議席連自己從政既底線都可以放棄，呢d咁既世界仔真係你要，但你又真係吹佢唔漲，條友藉著上次立法會選舉成功拖多件馬仔入局既餘勇竟然可以爬到上副主席既位置，唉，要怪就只怪「真誠為香港」組織內其餘成員既素質太雞了 (你知道誰是「蔡蔡子」嗎？)。

2. 成日有人話「長毛」只係識抬棺材遊行示威衝擊政府晚晚走去劈酒溝女香港有著佢呢庭人真係可以陸沉了，但千祈唔好俾佢個死人look呃到，佢肯定係現時立法會內政治理論基礎最深厚既議員，試試瞭解佢既過去同背景，唔好人云亦云同d三姑六婆一般見識。據我以前經常同佢一齊開飯既接觸，「長毛」份人係就係爛口少少，但至少性格豪爽直腸直肚，唔似得個班懶係尊貴既政棍般虛偽非常笑騎騎放毒蛇，而且睇下佢2004年立法會選舉既競選策略就知佢幾有腦，「撐長毛即係撐自己」呢句口號其實好搶，當年幫佢吸到唔少選票，再睇埋尋晚佢就《竊聽條例》加入「日落條款」既發言又睇到佢有幾醒目，成班泛民坐哂響度慘被保守派牽制毫無頭緒之際，佢就突圍而出諗到橋鑽《議事規則》既空子上演一幕大快人心既filibuster經典示範。你話佢唔掂？我怕你被人話你痴線咋。寫寫下突然醒起，原來劉某同「長毛」都係新界東既直選議員，哈哈哈哈，如果「長毛」兩年後仲玩的話，到時肯定有大把野睇。

延伸閱讀：
1. 立法會全體審議《竊聽條例》加入「日落條款」時「長毛」既第二次發言 (由14:56:46開始，劉某既發言由13:06:12開始)
2. A45報今年5月訪問長毛：第一部分、第二部分、第三部分

學術論文乙篇

2006-07-30T23:06:00.000+08:00

論文題目：透過應用滿足個人物質需要及心靈訴求的分析框架藉以探討港府日前發表的《進一步發展政治委任制度諮詢文件》內載列的建議對吸引優秀人才投身政圈的成效評估

各位老友，今次條題睇落係咪好深奧呢？我見近來本埠有位女士響阿美利堅合眾國整左篇碩士論文就學成歸來搖身一變成為民主專家，所以咪諗住整條睇落好學術既題目黎拋下書包扮下精英咁囉。如果睇唔明，就睇唔明囉，因為我都唔知點解的。

其實平心而論，我係贊成政府呢鋪增加政治問責既副局長同局長助理職位既，原因好簡單，你睇而家個班「局長」一條友空降政府單刀赴會力抗身為天之驕子坐擁行政資源及經驗既AO黨真係行唔通的。我覺得既然要搞高官問責制就唔該做戲做全套，俾足機會班局長埋班搵d自已友組成執政團隊，到時施政上有咩冬瓜豆腐就唔到佢地左閃右避，話乜鬼野一條友孤家寡人入到政府俾人玩到死死下。

對於本埠部分泛 (扮？) 民主派提出乜鬼野「政治分贓」既批評，雖然有d道理，但我諗深一層其實除笨有精。點解？如果講到明親疏有別既BT曾真係搵佢個批「真誠為香港」既親信做局長同副局長，假若第時響佢地個瓣既政策上面失去民心搞左舊屎出黎，到時佢地成為施政團隊一分子，就再唔可以好似以前響選舉時大言不慚地講「我地唔係保皇黨因為我地根本冇份施政」呢類詭辯，泛民亦可以冠冕堂皇地當其影子政府，扮演好反對黨既角色 (當然泛民裡面個班大佬大姐係咪有心有力就係另一回事啦)。

之但係喎，以我都算身為過來人既角度去睇，我又覺得就算而家有呢類所謂開放政府既改革，從政響香港都只會係票房毒藥，皆因任憑你既政見立場如何，左中右派如果選擇成為一條全職政棍，最尾都只係殊途同歸，就咁一世。

唔係咩？睇下地區層次既區議會就知道箇中困局。我當你廿零歲大學畢業就選擇加入政黨「落區」諗住搵個選區做下地區工作打好社區關係等待三幾年後既區議會選舉，響做到區議員之前，你既人工睇怕都唔會有五位數 (特別係泛民主派既政黨)，而且唔好忘記響正式選舉前既三幾年「砌區」日子裡面，你既身份只係一件職位叫做乜鬼野社區幹事/聯絡主任/地區黨部幹事既蛋散，因為你唔係正式既區議員，所以街坊唔會覺得你會點樣幫到佢，地區民政事務處同各個地區政府部門都係唔會多重視你，再加上響現時區議會小選區既制度下現任議員有著極大既問政優勢 (每次區議會選舉有超過九成既現任議員可以成功連任的)，大大局限左呢班政壇新力軍既發揮。

好啦，下一步我當你捱得過呢幾年終於等到四年一度既區議會選舉，正如先前提過，如果唔係你既現任議員對手響過去四年既表現一無是處，否則憑你一條新仔贏到一個區議會議席既機會係細過曼城下年可以贏到英超冠軍的，好啦，輸左之後又點先？再搏多鋪響個區做多四年繼續咬住份唔夠一皮野一個月既人工諗住下次可以用「不離不棄為社區」呢類競選口號黎多次，定係決定離開政圈諗住轉行重新出發？如果你選擇前者，你就會陷入「四年之後又四年」既選舉遊戲之中，到時好可能睇住Rooney打足三屆世界杯跟住宣佈退出英格蘭國家隊你都仲係一條社區幹事，睇住你既同輩一個二個十年八載後無論做緊邊行都總算有d起色有d成就之際，你都仲係響某個政黨既地區辦事處裡面同班婆仔量緊血壓；如果選擇後者，你又會發現原來外界根本唔會點承認同看重你過去服務社區既所謂「工作經驗」，做左幾年野差唔多廿到尾三張黎緊頭既你，到時先至同班初出茅廬既年青男女爭飯食，你又過唔過到自己個關？

就當我份人太過市儈一味只係著重從政既「錢途」，我又試下同你計計從政既「前途」。我就當你真係有著莫大既理想抱負唔怕捱足幾年，響一屆至n屆不定既選舉後終於俾你選到做區議員一個月拎足萬六蚊人工 (如果計埋補貼地區辦事處既支出同搞活動既使費你份糧肯定冇咁多)。雖然生活上叫做勉強有保障，但響而家本埠區議會等同吹水會大官唔鬼理你細官俾你日嘈夜嘈都係話唔到事既情況下，一個區議員同一個街坊保長又有咩分別？你既崇高理想同抱負又可以發揮到幾多？最後咪又係搞埋個d乜鬼野「成功爭取巴士站加多個垃圾筒樓下個公園加多條晨運腳底按摩石春路對面屋村個籃球場開放做曬棉胎基地」(當然仲有某位「真誠為香港」既候選人既豐功偉業：成功爭取交通燈綠公仔延長兩秒 - 有相為證)。但係最大鑊既就係，據我個人觀察一般而言一個區議員既視野同胸襟同佢既參政年資係成反比既 (拿拿拿，我呢個觀察係咪好有前瞻性先？話哂呢篇都係一篇學術論文黎的)，即係諗來諗去都只係關心 (擔心？) 四年後有邊個政黨邊個對手「搞佢個區」，又或者係要如何攻陷/防禦邊間大廈既法團或者互委會，同埋份人只會變得愈來愈小器同記仇，好似個腦只會永遠記住邊個議員響邊次大會同佢互片呢類都唔知有咩好嬲既小兒之爭。如果真係誰人能及你最好手風亂說都開口中做左幾屆之後輸埋個現任議席，更會頓時由街坊保長變成失業中年，到時響你唔食你老婆仔女都要食 (如果你儲到$$結婚生仔的話) 既壓力下你都唔知可以點行落去，個種失落感同無助感真係好惡啃的。

基於以上種種殘酷既現實，難怪現時大部份被吸引至政圈既年青人，無論係咩黨咩派都只能算是平庸之輩，當中縱然有著一個半個有志或有識之士，響目前既政治環境下也只會落得鬱鬱不得志既下場，簡直係格雷欣法則 - 「劣幣驅逐良幣」既最好示範 (唔好話我拋書包，我一早講左呢篇係學術論文黎架，哈哈哈哈)。

大哥講話你要聽？

2006-07-19T00:25:00.000+08:00

呢排朝朝搭巴士返工，都響"wow so" (我聽好多藝人都係咁讀架播) 度睇到有條淫蟲抱住一件都幾可愛既西B響樹唱一首乜鬼「寶貝歌」，晨早流流睇到+聽到呢條友扮哂慈父唱歌仔，真係搞到我早餐都食唔落，認真多得你唔少。

呢條淫蟲最歡喜就係扮大佬，而大伙兒亦好俾面佢叫佢一聲「大哥」，而佢又好似好受落架喎。佢呢，平時只要有位俾佢展露佢自以為擁有既無限愛心同江湖地位，你就必定能夠響鏡頭中心方圓一隻手指位既距離搵到佢正望住鏡頭笑哂口咁樣樹起V字手勢。如果發生乜野大鑊野就仲犀利，佢又一定會第一時間走出來正氣凜然地發表偉大演說後再負責牽頭統領全港國際紅星至七線霉友在內既演藝圈同仁一齊發功出番一分力，而且佢又係乜鬼香港旅遊大使，負責宣傳香港既旅遊業，真係不得不說一句：「哇，你好叻丫！」

之但係，我仲好清楚記得當我仲係青春期既時候，呢條淫蟲剛岩去荷里活發展時有幸被邀請搭住以前打NBA個位身高七呎既天鉤渣巴一齊上台做奧斯卡頒獎嘉賓，當時好多人都話「哇！大哥好叻丫又可以為香港增光之餘更可以證明香港既藝人唔係垃圾啦中國人終於吐氣揚眉唔再係東亞病夫我們成功了」，點知唔睇都仲可以自我感覺良好，一睇就見到呢條淫蟲竟然響台上死跳爛跳都拎唔到渣巴先生舉起既信封，自此我就頓悟了，知道原來佢只係一條負責插科打諢既淫蟲。

當然好戲在後頭，前幾年搞大左吳小姐個肚仲有埋自己骨肉之後竟然唔肯認頭仲拉埋我等男人落水話自己犯左一d所有男人都會犯既錯，我聽到後真係想一拳"窩"佢雞心 (不過我都係諗下姐因為我唔想咁早死住)，咁岩呢件事之後無幾耐電視就成日播佢響度耍太極教d司機道路安全既政府宣傳片，當中有一句vo係：「無論大與小，禮讓最緊要」，我就話應該改成「無論大與小，一個都不要」至岩 (我係咪好有幽默感呢哈哈哈哈)。

講開佢既威水史梗係仲有佢前兩日個單醉酒爆粗鬧舞台搞串寶島歌手李某演唱會事件，記者問佢羅反應，佢又竟然話自己唔係聖人只係普通人。喂，你d豪情壯語去哂邊先，扮死狗唔係你性格喎。

至於呢條淫蟲係咪一位慈父，不如你聽下以下呢個故事先作定奪：據悉有一位父親有一日突然心血來潮想去個仔讀個間小學接佢放學，佢去到至發現原來個仔已經一早升左中學，你話係咪好叻呢？

老友，你揹得起「大哥」呢個花朵，就唔該你拎出做大佬應有既風範，唔好下下衰左就搵藉口，錯就要認打就要企定，你做大既唔係咁都唔識丫嘛？仲有丫，你咁有愛心咁鬼鐘意湊細路，不如你去湊下你個小龍女丫笨。

2006世界杯 (第26日 - 決賽)

2006-07-11T21:58:00.000+08:00

意大利 1 法國 1 (十二碼：5-3)

意大利同法國其實勢均力敵，意大利防線守得好穩，但法國由Zidane領軍既中前場亦越踢越生，之但係平心而論，意大利今場既整體發揮其實好過法國，事關法國條防線今場表現失準，特別係應付死球既能力極差，中場響Vieira傷出後直頭好似放棄中路進攻一樣，只靠Ribery、Wiltord同埋後段轉打左翼既Henry響邊線搞搞震，反觀意大利響換入Iaquinta同Del Piero後活力大增，打到加時都仲可以滿場飛，所以最終得到冠軍都算實至名歸，但不得不提Materazzi呢條友真係好鬼好腳頭，神又係你鬼又係你，真係吹到啤一聲。

2006世界杯 (第25日 - 季軍戰)

2006-07-11T21:44:00.000+08:00

德國 3 葡萄牙 1

今場兩隊都出左好多副選上陣，但極想羅返個彩既德國戰意明顯比葡萄牙為高，Schweinsteiger打出漂亮一仗，Kehl亦踢得好生，加埋之前幾場打到曉飛既Lahm，德國未來靠呢班友應該有運行，反觀葡萄牙雖然有C. Ronaldo同Deco兩件中場希望，但係前鋒群既表現卻令人失望 (單係睇Pauleta都可以做到正印前鋒就知有幾不濟)，真係造多多靚波俾佢地都只會浪費哂。

2006世界杯 (第24日 - 四強)

2006-07-08T22:55:00.000+08:00

法國 1 葡萄牙 0

法國真係上哂力了。Zidane響中前場打到如入無人之境，一對防中截擊能力極強，Ribery越打越好，唯一隱憂就係成鬼日玩野接親遠射都甩手既Barthez。至於葡萄牙真係疲態畢現，之前C. Ronaldo、Deco同Figo三條友既左右互搏之術完全失效，Miguel亦再冇氣力走上走落，前鋒Pauleta整項賽事由此至終都係行行企企，此消彼長下對住氣勢如虹既法國，就算俾佢地搏到加時睇怕都只係死路一條。

2006世界杯 (第23日 - 四強)

2006-07-08T22:49:00.000+08:00

意大利 2 德國 0 (加時)

兩隊各打半場好波。上半場意大利搶得優勢，但係下半場德國攻擊較有威脅。德國去到尾防守一次犯錯就中招，四條友走埋Pirlo度以為佢實會響禁區邊拉弓，點知佢睇得通透交俾空哂既Grosso，造就佢做多一次國家英雄，但呢球最樣衰就係Ballack，Grosso起腳既時候佢竟然縮喎，咁既防守態度真係要不得。

2006世界杯 (第22日 - 八強)

2006-07-05T03:12:00.000+08:00

葡萄牙 0 英格蘭 0 (十二碼：3-1)

其實英格蘭今場已經好有部署地針對葡萄牙左閘Nuno Valente速度慢既弱點而集中響右路進攻，亦一直同葡萄牙打成均勢，點知一粒老鼠屎就搞壞一窩粥，Rooney小朋友親自示範何謂「精人出口，笨人出手」，搞到英格蘭唔單只要龜縮至完場，Eriksson笑死人既前鋒選人更搞到最終冇哂可用之兵 (Crouch？咪玩啦)，咁你當初點解唔選件用得既箭鋒，反而要選Walcott但始終都唔俾佢出場呢？

法國 1 巴西 0

巴西成隊冇前冇後，輸個球只有三件黃衫響禁區睇住五件白衫，咁搞法唔輸至奇。至於法國真係上力了，Vieira繼續攻守兼備，Zidane全場左穿右插舞龍咁舞 (佢交俾Henry射入個球真係好乖巧的)，四強對住葡萄牙可以睇高一線。

2006世界杯 (第21日 - 八強)

2006-07-02T02:21:00.000+08:00

德國 1 阿根廷 1 (十二碼 4:2)

德國今場雖然中場靈魂Ballack表現不佳 (你睇佢輸第一球時企響度睇住Ayala跳起自己郁都唔郁下就知佢有幾掂)，但不得不讚Klinsmann擺到明用高空轟炸針對阿根廷後防較矮既弱點黎進攻，最終亦得償所願由Klose頂入追成平手，但係下場對以防守見稱既意大利未必再有呢支歌仔唱了。至於阿根廷今場不單只冇鬼哂d乜野短傳滲入，而且好多人話教頭Pekerman換走Riquelme同Crespo諗住守到完場係過於保守，但俾著我打到80分鐘見到德國來勢兇兇都可能會咁做，況且上場對墨西哥既激戰搞到阿根廷班友根本回唔切氣，唔通仲同對家硬碰咩，你輸唔輸得起先？ (雖然我又唔係好明點解佢唔用近來好fit既Messi，反而要用Cruz)，當然"成也Ayala，敗也Ayala"，阿根廷又真係爭唔落的。

意大利 3 烏克蘭 0

意大利既Toni終於開齋 (仲起雙飛添)，Zambrotta又fit到痺，雖然我不值Grosso上場對澳洲既行為，但你地打敗了符碌精烏克蘭，我俾五個叻。

2006世界杯 (第20日 - 十六強)

2006-06-30T00:28:00.000+08:00

巴西 3 加納 0

或者加納教頭Dujkovic對佢地條防線真係好有信心，竟然選擇以佈越位黎對付巴西個班具備速度同個人突破技術 (除左佢地著9號波衫個件前鋒) 既中前場球員，三球裡面有兩球都係輸裝越位失敗，真係抵輸三蛋。平心而論，加納今場響晨早落後一球要採取主動既情況下表現已經好好，Amoah同Draman響前線好活躍，仲幾次迫到Dida要駛出真功夫，都唔算太失禮囉。

法國 3 西班牙 1

法國今場返哂黎贏波，全靠有Vieira聯繫攻守。佢不單只做到中場掃蕩既工作，更加係球隊發動轉守為攻時既起步點。法國今場班波打反擊既模式，其實同當時有Vieira、Wiltord、Henry同埋Pires (今屆冇份玩) 在陣既阿仙奴好相似，都係轉守為攻時一條友帶波響中路推進，左右兩邊就有兩件高速前鋒響度大奔走等接應直線，呢種流暢既打法相當賞心悅目。至於西班牙就死哂火，今場受制於法國個條死都唔肯谷前既防線簡直一籌莫展，Raul欠缺活力，Torres始終都係獨食左少少，仲有左閘Pernia今場實在谷得太前了，搞到法國響右路如取如攜，最終只能靠David Villa個球靚到痺十二碼入波。

2006世界杯 (第19日 - 十六強)

2006-06-27T21:46:00.000+08:00

意大利 1 澳洲 0

從Hiddink去到下半場尾段都只係換得一件，就知道佢想搏加時兩隊體力下降後至換入佢既愛將Kennedy去前場做柱躉 (秘密武器黎架)，甚至摸和射十二碼兩個只能活一個，可惜事與願違，臨天光俾個球證玩死，真係不抵到痺。一句到尾，個球我唔覺得要俾十二碼，意大利真係好彩，之但係佢地咁屎既攻力就算俾你入到四強都只有死路一條，仲有Nesta同Materazzi下場唔出得，條防線仲會唔會咁穩陣呢？

烏克蘭 0 瑞士 0 (十二碼：3-0)

五五波一場，瑞士雖敗猶榮。烏克蘭今屆死好命抽條好籤，呢d球隊俾佢過到骨真係睇到人眼怨，所以八強我決定訓身支持意大利擊倒"符碌足球"。

2006世界杯 (第17日 - 十六強)

2006-06-26T19:50:00.000+08:00

英格蘭 1 厄瓜多爾 0

英格蘭今場改打4-5-1，J. Cole同Gerrard負責中場較炮，但打少件箭頭真係差好遠，搞到成場波都係中場混戰居多，前線既Rooney雖則速度唔慢，但佢係個類有人餵到波俾佢至搵到食既前鋒，今場佢就係欠缺輸送，所以表現一般，搞來搞去最尾都係要靠老大哥Beckham既死球一箭定江山，下場對葡萄牙未必再咁好彩的。至於厄瓜多爾其實已經盡哂力，Hurtado繼續響後防一夫當關，可惜一對撞死馬箭頭Delgado同C. Tenorio表現普通，佢地殺到入十六強都算超額完成了。

葡萄牙 1 荷蘭 0

十六黃四紅，究竟佢地想打波定打人？呢場暴力足球既精髓唔係Maniche入個球 (雖則呢球葡萄牙既組織真係好靚)，而係當你見到Boulahrouz一野倀雞腳搞到C. Ronaldo碌脾有個窿、Figo俾人一睜批到塊面紅哂同埋Sneijder成個爛仔一樣有乜事都第一個湧埋去「咩丫咩丫」咁同人推撞搞到件衫心口上面個"20"號燙字甩出黎咁滯之後，最尾竟然影到Deco、Van Bronckhorst同埋Van Bommel三個球會隊友排排坐響場邊一齊睇波呢個反高潮喎，在在印證「上場冇父子」呢句至理名言，哈哈哈哈，足球就是這樣的。

2006世界杯 (第16日 - 十六強)

2006-06-25T16:06:00.000+08:00

德國 2 瑞典 0

攻防戰。德國攻足全場，但瑞典本身又真係好唔爭氣成隊走哂樣，前鋒Ibrahimovic全場受制於德國中堅Metzelder，中路防守更加係一塌糊塗，輸第一球就係俾Ballack響中路直搗黃龍至俾Podolski執雞，輸第二球又係三件中路守將走哂去娥眉月頂既Klose個邊至搞到Podolski梅開二度，加上Lucic兩黃一紅，Larsson個球十二碼又宴客，唔輸至奇了。

阿根廷 2 墨西哥 1 (加時)

兩隊合演一場好波。墨西哥今場防守打得好好，球員走動多，盡量減少空位令阿根廷班中前場可以用"x"同"Δ"掣做短傳組織既機會大幅減少 (特別係Osorio睇到Tevez實一實，好野)，雖然聯繫攻守既Pardo傷出，但入替既Torrado亦做到掃蕩中場既工作，前線Borgetti走動唔多，但位置感好經驗搭夠總係走到靚位，打到加時至輸波都算雖敗猶榮。至於阿根廷開波輸個球Heinze要負好大責任，竟然可以俾Marquez從後場衝入禁區，但又不得不讚佢地下半場睇準兩隊體力下降既時候換入Messi令到成隊波生哂，最後M. Rodriguez入個球左Q窩利又真係好鬼靚喎。

2006世界杯 (第15日)

2006-06-24T23:19:00.000+08:00

烏克蘭 1 突尼西亞 0

因為突尼西亞贏波就好有機會出線，所以我好醒地揀呢場黎睇，點知悶到我嘔。可能天氣太熱既關係，兩隊都好似唔願走咁樣，大家行行企企輕輕鬆鬆又收工，唉。烏克蘭入到十六強完全係靠執到條好籌姐，對住瑞士肯定冇運行，我話既。

西班牙 1 沙地阿拉伯 0

西班牙話就話全隊後備上陣咁滯，但Raul、Fabregas、Reyes同Joaquin呢班人根本就具有正選既實力，真係令其他球隊欣羨，熱切期待佢地十六強對法國既大戰。

法國 2 多哥 0

好正路既一場波。轉打4-4-2既法國面對多哥個條唔知想點既防線 (我睇左佢地三場波都仲係唔知佢地想點的)，自然成場係咁壓住攻，如果唔係Ribery係咁響門前敗家，應該唔知贏兩粒的。至於多哥，我真係睇咁耐都唔知佢地想點，特別係前鋒Adebayor極度獨食，甩左波又唔追波，追唔到波就指住隊友埋怨埋怨再埋怨，呢d咁既球員真係你愛了。

瑞士 2 南韓 0

瑞士今屆表現令人驚艷，唔打明星唔打名氣只打團隊同組織，而且防守異常穩健 (佢地係分組賽階段唯一一隊冇失波既球隊)，真係要講句「瑞士，賣飛佛！」至於南韓都可算光榮出局，反勝多哥迫和法國喎，日本得唔得先？

2006世界杯 (第14日)

2006-06-23T20:10:00.000+08:00

意大利 2 捷克 0

捷克今場再輸波，一方面係輸俾意大利個條好穩陣既防線，但另一方面我都好同情佢地前線缺少左Koller (今場連另一個高佬Lokvenc都冇埋)，只能夠用狀態不足既Baros搏殺，中場Nedved孤掌難鳴，Rosicky越踢越沉，明明隊波第一場仲踢得好好，點知又受傷又停賽搞到可用之兵愈來愈少，出唔到線相當可惜。

加納 2 美國 1

加納由Essien同Appiah領導既反擊係幾有效率，但今場佢地真係要多謝美國既極品後衛Onyewu禁區犯手球，冇你加納又邊度會有球十二碼呢？

巴西 4 日本 1

日本出局真係抵死。今場雖然繼續打4-4-2，一對後備箭頭亦勤於走動 (玉田圭司個球窄角度入球射得好靚架喎)，但條把鬼防線完全冇向巴西班進攻球員作出壓迫，導致後場大把空位俾對手起腳練遠射，搞到川口能活左飛右撲好不得閒，最尾輸四球咪好彩囉，但係最最最羞家既係，連跑唔郁跳唔高既Ronaldo都可以入兩粒 (你睇佢上半場跳起頂入第一球時中澤佑二走甩佢之餘連跳都費事跳就知呢條防線有幾差)，你話醜唔醜呢？Zico，你都係返巴西做體育部長算啦，你其實唔識教波架。

澳洲 2 克羅地亞 2

我撐澳洲，因為佢地班波夠拚搏，全隊上下一心前仆後繼為爭出線好鬼好睇，十六強睇佢地好過睇克羅地亞啦，係咪？

2006世界杯 (第13日)

2006-06-22T20:27:00.000+08:00

葡萄牙 2 墨西哥 1

兩隊都收起主力球員，但後備上陣既球員一樣對攻，都幾精彩。上半場葡萄牙Maniche個球充分表現佢地既團隊組織，但防守有少少鬆懈，而且入到十六強要硬碰荷蘭，到時肯定打甩脾。至於墨西哥缺少防守中場Pardo聯繫攻守，總覺得有點混亂，下一場對住阿根廷中前場水銀瀉地式進攻，防線恐怕會受到嚴重考驗。

安哥拉 1 伊朗 1

冇睇，只係睇到安哥拉失波後班友互相指責，好過癮。

阿根廷 0 荷蘭 0

本來或者真係一場世紀大戰，但尋晚響兩隊都坐定粒六收起半隊主力之下就變左世紀悶場。阿根廷上半場初段谷左一輪雖無斬獲，但睇到Riquelme點樣一個打哂同埋Terez既活力都唔錯既，荷蘭收起Robben邊線立即死哂火，成場波中場混戰多，都係等睇十六強好過了。

科特迪瓦 3 塞黑 2

兩隊都係晨早出局，話知你地打到曉飛都冇用啦。

2006世界杯 (第12日)

2006-06-22T02:59:00.000+08:00

德國 3 厄瓜多爾 0

慢熱的德國開始上力了，面對收起半隊主力既厄瓜多爾輕輕鬆鬆鄧梓峰就入三粒，至於厄瓜多爾雖然輸波，但我仍然睇好佢地對箭頭Delgado同埋C. Tenorio十六強繼續撞死馬。

波蘭 2 哥斯達黎加 1

例行公事，冇睇。

英格蘭 2 瑞典 2

雖然J. Cole笠死個球真係好乖巧 (都話佢好fit架啦)，但係下半場佢地整體既表現就恐怖囉。面對瑞典既狂轟同死球攻勢，成隊表現慌失失，一對中堅Terry同Campbell更加係輸第二球既罪魁禍首，一個就頂空氣，一個就凌空哂靴，真係唔得你死，入到十六強仲要冇埋Owen，問你點打？仲有丫，Rooney小朋友，你被換出後咁唔好老脾，不如一拳「窩」埋Eriksson度丫笨。

巴拉圭 2 千里達 0

例行公事，都係冇睇。

2006世界杯 (第11日)

2006-06-20T17:53:00.000+08:00

瑞士 2 多哥 0

瑞士整體發揮不俗，攻勢主要集中兩翼側擊，後防一對中堅Mueller同Senderos好穩陣，係打整體戰既最佳演繹。至於多哥都係個句，唔係咁知佢地想點，前線一對箭頭過於獨食 (特別係Adebayor)，進攻板斧唔多，左猜右猜一輪最尾都係要靠個人硬闖，咁搞法最後一場對法國睇怕都冇運行了。

烏克蘭 4 沙地阿拉伯 0

烏克蘭一洗烏氣，一次入返四粒補數。烏克蘭贏到波唔係佢地打得特別好 (雖然Kalinichenko表現好搶鏡)，只係沙地表現太差，特別係防守時毫無壓迫，烏克蘭攻到去三閘線都仲係懶懶閒大把空位任人舞，加上應付高空波能力極差，唔輸至奇。

西班牙 3 突尼西亞 1

突尼西亞一開波偷到雞真係好波，呢球西班牙又真係抵輸架喎，Mnari射第一腳俾Casillas救出後成班友都冇人去跟波，個個企響度睇戲，難怪可以俾Mnari執雞啦，但又真係不得不讚西班牙半場換入Raul同Fabregas既調動，Raul位置感一流 (睇佢執雞個球就知，Boumnijel一拍個波出黎佢就已經預計到個波會跌響邊)，Fabregas傳射盡顯功架 (你睇第二球佢交俾Torres個球大直線真係好通透架喎)，但最恐怖既係，呢兩條友都只係打後備，問你驚唔驚？

2006世界杯 (第10日)

2006-06-19T17:48:00.000+08:00

日本 0 克羅地亞 0

兩隊雖不乏埋門機會，但把握能力不高，所以和波都算合理。日本今場放棄翼衛打法轉打4-4-2，攻擊主要響中路發動，但中村俊輔表現一般，中田英壽雖有一兩腳具威脅射門但始終徒勞無功 (呢條友完全唔願意防守的)，一對正印箭頭繼續發夢，下半場入替既速度型左Q玉田圭司亦無甚表現，而防守方面更加恐怖，隊長宮本恆靖輸個球十二碼明顯睇到佢羅位極差，明明mark住對手都可以俾人側身推過，咁搞法下場對巴西個堆走位靈活既前鋒就真係兇多吉少。至於克羅地亞表現都只係普通，響日本對閘今場刻意縮後之下，Prso冇上場咁活躍，可幸有另一個前鋒Klasnic搭夠。

巴西 2 澳洲 0

兩隊既後防今場都好離譜，從澳洲輸第一球可以睇到佢地班後衛欠缺壓迫，可能驚拍得太埋會俾巴西班高速球員一推就過，所以連成場都跑唔郁既Ronaldo都可以輕輕鬆鬆助攻俾Adriano搞掂 (Ronaldo企響度都仲可以引到三個後衛埋去拍佢喎)，但巴西條防線都唔好得去邊，Roberto Carlos打到上前場咁滯，令澳洲下半場落後死谷之下既攻勢一浪接一浪 (尤其後備上陣既Bresciano表現唔錯)，如果唔係Dida有水準演出，巴西未必贏到波的。

法國 1 南韓 1

法國初段表現唔差，亨利入個球展示出佢既走位同入楔技巧 (如果發揮到的話) 真係世上數一數二的，呢一球亦同時暴露到南韓後防既弱點，一對中堅崔鎮哲同金永銖轉身太慢，對住法國呢類前鋒速度夠快同走位夠靈活既球隊會好蝕底。平心而論如果無左個球誤判，戰果或者會改寫。至於南韓表演唔算太好，全場俾對手壓住攻，反擊亦冇咩威脅，和到波都算好好彩。

2006世界杯 (第9日)

2006-06-18T20:48:00.000+08:00

葡萄牙 2 伊朗 0

葡萄牙全場壓住對手打，戰果合理。佢地雖有Deco復出並且入左球遠射，但係佢同埋C. Ronaldo同Figo都係個類上腳型球員，三個和尚爭水喝反而令到條中場線有少少不知所措。右閘Miguel呢兩場表現都好好，攻守全面，好野來的。最後奉勸C. Ronaldo一句，你都係快d去拜拜條龍門柱啦，兩場都中楣中柱，唔老黎喎。

加納 2 捷克 0

捷克真可憐，一開波Ujfalusi就輸球大意波，真係唔得佢死，搞到成隊波迫住強攻，反而岩哂團隊意識較強既加納打快速反擊，加上Koller缺陣對捷克既負面影響真係好大 (你睇頂替佢既Lokvenc全場失蹤就知佢既重要性) ，如果唔係Cech打到上哂身，加納應該唔只入兩粒的。

意大利 1 美國 1

三個字："呢場波，好混亂"。兩隊都因為有球員被趕出場而弄得陣腳大亂，所以全場都處於混戰，但不得不贊美國今場波真係有改善，上場踢得極差既Onyewu今場表現勇猛，左路既Convey亦有唔錯既演出。呢組形勢亂七八糟，最後一round肯定好緊湊了。

2006世界杯 (第8日)

2006-06-17T13:42:00.000+08:00

阿根廷 6 塞黑 0

大屠殺。阿根廷既進攻水銀瀉地，傳送精準流暢，球員技術細膩之餘亦有靈活走位組織，睇佢地做波既感覺，就好似打winning時係咁用"X"掣短傳一樣，呢d咪叫球味囉。反觀塞黑就真係一舊屎，正如上場一樣，一對箭頭Milosevic同Kezman狀態真係好差 (後者仲做埋紅牌阿姑)，球員又完全冇鬥心，睇怕最尾一場對科特迪瓦都好牙煙，分分鐘要做「三零部隊」。

荷蘭 2 科特迪瓦 1

有科特迪瓦就有快上快落既足球睇。兩隊上半場開波就鬥攻，荷蘭英超三寶狀態好fit，特別係Van Persie助攻助守打法勤力，入個腳左Q罰球盡顯功架，而且不得不提老將Cocu，有佢響中場掃蕩真係好放心。至於科特迪瓦果然今場打多左兩邊，但始終比較側重個人主義，班友個個都係上腳就死去，但從B. Kone入個球又真係睇到佢地腳法好好架喎。

墨西哥 0 安哥拉 0

悶波一場，兩隊頻頻斷纜。唯一有睇頭既係安哥拉門將Joao Ricardo成場左飛右撲，演出可人。

2006世界杯 (第7日)

2006-06-16T15:32:00.000+08:00

厄瓜多爾 3 哥斯達黎加 0

厄瓜多爾以整體戰為主，打法簡單直接，全場控制戰局，一對箭頭Delgado同C. Tenorio把握能力認真唔錯，後防Hurtado繼續一夫當關，整體表現實而不華，但首兩場對手太弱，入到16強至有真正考驗。至於哥斯達黎加成隊狀態都好差，今場明知非勝不可但班波都係懶懶閒，成隊最有鬥心個件反而係下半場入替既Bernard，真係唔到你唔出局囉。

英格蘭 2 千里達 0

英格蘭今場戰術有明顯改變，唔再獨沽一味斬高波俾Crouch做二傳，兩邊翼衛A. Cole同Carragher亦冇谷得咁前，反而多左響中距離射門 (可惜Lampard幾球撞射都越楣而過)，下半場換入Rooney同Lennon後成隊生左好多，最尾Beckham響右路set埋中路俾Crouch頭鎚入波真係幾靚，而千里達則繼續一貫穩守突擊打法，後防高佬Lawrence看管Crouch表現唔錯，但就係走漏一次足以致命，下半場又係換入速度較快既Glen諗住搏一粒，但礙於質素反撲無力，下場想出線要贏巴拉圭之餘仲要靠英格蘭打敗瑞典，睇怕都係冇符。

瑞典 1 巴拉圭 0

好悶的一場波，雙方射門次數雖多，但無幾可命中目標。瑞典上半場有Ibrahimovic既時候打得唔錯，但下半場一換入Allback之後就真係"痾拔甩"，但又估唔到佢臨尾set到個波俾無人看管既Ljungberg頂入，真係吹佢唔漲。巴拉圭今場表現又係令人失望，Santa Cruz魂遊球場，Valdez雖努力鑽營但徒勞無功，表現比較好既只有救左幾球波既後備門將Bobadilla。

2006世界杯 (第6日)

2006-06-15T18:44:00.000+08:00

西班牙 4 烏克蘭 0

好一場攻防戰。西班牙全場壓住對手強攻，中前場一眾球員默契唔錯，但似乎未受真正考驗。至於烏克蘭我好同情佢地無啦啦輸左球十二碼，但整體表現真係好差，後防鬆散，中場受制於西班牙既壓迫防守且欠缺創造力，成場波左猜右猜始終都俾唔到波Shevchenko，咁既情況下就算佢曉飛都冇用啦，之後個兩場分分鐘俾兩支亞非球隊偷到雞。

突尼西亞 2 沙地阿拉伯 2

雖然戲碼好弱，但兩隊全場搏拳又幾刺激架喎。整體表現黎講沙地認真唔曳，尤其佢地既反擊真係好鬼有效率，入個兩球都只係用三兩腳波就成功埋門，至於突尼西亞就不過不失啦，攻勢主要集中響Trabelsi打既右手邊，佢地臨尾追返和又真係好鬼野。

德國 1 波蘭 0

波蘭雖敗猶榮。門將Boruc打到上哂身，而且由隊長Bak領導既防線打得都算唔錯，臨天光輸個球實乃非戰之罪，怪就只怪有件中堅無啦啦走左埋去Odonkor個邊幫波，搞到老鬼Neuville後上成功囉。至於德國方面，Lahm表現繼續搶眼，Ballack就普普通通啦，但對箭頭就認真麻麻，特別係降班射手Podoski頻頻失機，真係睇到眼火爆，下場不如落Klinsmann啦。

2006世界杯 (第5日)

2006-06-14T22:11:00.000+08:00

南韓 2 多哥 1

南韓打出精彩一仗，半場壓迫式防守令對手全場難以組織攻勢。朴智星雖然俾人mark得好緊，但李天秀、李榮杓同後備入替既安貞煥均表現活躍，特別係對手打少一件後更完全搶得主動，幾個進攻擊球員響蛾眉月附近製造左唔少威脅。相反多哥整體表現除卻入波既Mohamed Kader偶有個人突破外其實不太突出，感覺有點不知所措，真係攻唔係守又唔係，都唔知佢地想點。

法國 0 瑞士 0

法國整體表現令人失望，雖然Zidane同Wiltord好努力響製造攻勢，新人Ribery亦響左路積極鑽營，但一著起國家隊球衣就會魂遊球場既Henry表現令人失望，個人突破速度壓過刁鑽射門等招數全部欠奉，相反後防更多次走甩瑞士前鋒Frei而險象環生，法國和到波已經好好彩，仲想佢地贏到波？咪玩啦。

巴西 1 克羅地亞 0

巴西攻力無疑強勁，Ronaldinho亦真係好好波，但對親巴西你都預得對手會屯重兵於後防，如果想有效撕破呢種密集式防守，睇怕巴西要多用Kaka入波個類中距離射門至搞得掂，仲有唔該唔好再出Ronaldo了，如果唔係佢響下半場射過腳越楣波，我都唔知佢有落場喎。至於克羅地亞都算雖敗猶榮，而且左路Prso表現生猛，全場食正巴西對翼衛成日谷到半場既優勢頻頻發難，佢遲下對住日本個條把鬼三人防線應該會好開心的。

2006世界杯 (第4日)

2006-06-13T16:03:00.000+08:00

澳洲 3 日本 1

本屆最扣人心弦既比賽。澳洲用10分鐘就KO對手，最大功勞當然係Cahill，但教練Hiddink既調動亦應記一功，下半場換入高大既Kennedy加埋大舊佬Viduka二條友牽制日本個條把鬼三人防線以掩護後面既Kewell同Cahill，真係好鬼野。至於日本就把鬼囉，門將川口能活係救左兩次射門，但佢既上三路波完全唔掂，特別出迎既時間掌握更係離譜，日本第一球就係輸佢，邊線個兩隻翼衛三都主同駒野友一其實製造左唔少機會，但進攻個對箭頭高原直泰同柳澤敦表現真係一無是處，佢地全場唯一既貢獻睇怕都係上半場夾計撞埋Schwarzer度令中村俊輔無啦啦入左一粒。Zico呀Zico，你都係算罷啦，對於澳洲都打成咁，對住你祖家點算呢？

捷克 3 美國 0

捷克整體表現出色，後防夠穩陣，防守中場Galasek實而不華，中間一老一嫩Nedved同Rosicky負責組織攻勢同控制球賽節奏，配合唔單只得個「高字」既Koller既高空轟炸同二傳，成隊波攻守流暢，可惜Koller半場傷出，睇佢個樣好似好嚴重個隻，後備高佬Lokvenc級數明顯不同，打後唔通要用Baros？至於美國同日本一樣都係死得，成條防線表現極差，特別係新仔中堅Onyewu更係不知所謂，佢明明負責凍結Koller，但輸第一球時佢老哥就被Koller走甩，輸第二球仲妙，佢竟然可以是但用個頭點下個波就叫解圍，真係唔得佢死。如果美國繼續用佢打正選，睇怕只會死多兩錢重。

意大利 2 加納 0

意大利全場壓住對手攻，Toni狀態一流滿場飛，Perrotta響右路亦出左唔少靚波，當然仲有Pirlo個野射門，而且中前場球員好肯走動，經常用first touch同短傳推進，相當賞心悅目。至於加納既反擊其實幾有威脅，中間Essien發動攻勢盤球推進，左右兩邊就有人向前走，呢d至係以小制大穩守突擊架嘛，可惜Kuffour最終魂遊球場，整腳醫院波俾Iaquinta輕鬆搞掂。

2006世界杯 (第3日)

2006-06-12T13:59:00.000+08:00

荷蘭 1 塞黑 0

荷蘭開局後一直以慢打快，好有耐性地響中後場組織攻擊，睇準機會"質"直線，Robben既入球就係靠呢招 (雖然佢真係好好波，但真係太獨食了)，但荷蘭入波後反而打得有點進退失據，尤其響下半場塞黑換入高佬Zigic之後更加俾對手搶返唔少攻勢，特別係左閘Dragutinovic既助攻能力認真唔錯。至於塞黑對正印箭頭Milosevic同Kezman就真係多舊魚，想靠佢地入波？不如望對手擺烏龍算啦。

墨西哥 3 伊朗 1

唔好以為呢場牌面好弱，實情係尋晚最好睇既一場波。兩隊開局打法進取且具壓迫性，特別係伊朗既德國軍團Karimi、Mahdavikia同Hashemian響邊線製造左唔少威脅，可惜輸壞第二球，搞到成隊原先高昂既士氣一去不返。墨西哥方面雖然中場大腦Borgetti同前鋒Franco表現唔太好，但整體合作一流，加埋右路孖寶Mendez同Bravo打到曉飛咁滯，所以真係抵贏。

葡萄牙 1 安哥拉 0

大佬對細佬。大佬用一個C. Ronaldo加一個Figo就玩到細佬死死下，基本上兩條友有波上腳就起碼有兩三件白衫招呼佢。C. Ronaldo打得好生，自已搵食又得，製造機會又得，睇見葡萄牙換走佢之後成隊波毫無生氣就知佢既重要性，至於入波個位Pauleta用佢就真係"保你大"，唔係Figo截到個波後推右走左再黎個地波靚交，你有鬼波入呀你。安哥拉上半場表現可用"不堪入目"黎形容，前又冇後又冇默契又冇合作又冇，特別前鋒Akwa更係浪射加獨食王，半場換走佢簡直明智，好彩下半場葡萄牙換走C. Ronaldo後自斷半臂佢地至有反撲機會，臨尾Andre個腳勁射又真係幾靚的。

2006世界杯 (第2日)

2006-06-11T15:45:00.000+08:00

英格蘭 1 巴拉圭 0

英格蘭除左J. Cole同Lampard有貨交之外，整體表現只屬普通，全靠對手一個老烏至贏到波。Crouch既存在令到英格蘭球員傳送時有清晰目標，但佢響場上只係會做三件事：1. 用頭鎚點個波做二傳 (不過尋晚做唔到)；2. 用腳將個波回後做二傳同埋；3. 犯規 (經驗始終未夠)。至於巴拉圭就一如既往以小組滲入為主，可惜中場頻頻斷纜，前面Santa Cruz全場表演失魂，咁搞法隊波想出線都幾難。

瑞典 0 千里達 0

其實瑞典踢得唔差，兩邊側擊亦頗具威脅，前線三條煙Larsson、Ibrahimovic同Ljungberg走動頻頻，自已隻揪又得，三條友打小組亦得，尤其Ibrahimovic下半場小禁區邊個球車身抽射有姿勢又有實際，奈何千里達老鬼龍門Hislop打到上哂身 (全場有6次撲救)，就算下半場開始千里達要打少件，換入黎既Glen響右路表現都唔錯，差d一腳收死對手，真係抵佢地以小制大。

阿根廷 2 科特迪瓦 1

呢場波兩隊快上快落，拳拳到肉，真係好鬼好睇。兩隊球員腳下功夫都比較耍家，但阿根廷比科特迪瓦優勝既地方就係有團隊意識，中前場球員勤於走動，製造好多空檔做直線，Saviola入個球就係最好既示範。相反科特迪瓦中前場成班友差唔多件件都係獨扭濕手巾 (例如Kalou、Keita同埋後備入替既Dindane)，有波在腳就算左右兩邊有隊友接應都只係一味dup低頭死去，反而下半場後段打多左兩翼側擊就仲有威脅，你睇佢地入個球就係先響右邊底線出波，再響左邊出多次俾Drogba篤入就知。其實佢地兩邊個對谷到好前既閘速度夠高又有膽識落底 (尤其左邊個件細粒仔Boka認真唔錯)，配合Drogba中路有體型又有頭鎚，打咁多地波把鬼咩。

2006世界杯 (第1日)

2006-06-10T18:41:00.000+08:00

德國 4 哥斯達黎加 2

雖然Lahm入個球既角度真係好刁鑽，雖然Klose終於識用腳入波，雖然Frings個球長程炮真係用手擺都冇咁靚，但對住打5-4-1既哥斯達黎加 (個箭頭仲要係高峰已過既Wanchope) 都可以失兩球，德國既防線睇黎要執執 (特別係裝越位時既企位)。但另一邊廂哥斯達黎加都唔好得去邊，打穩守突擊唔係問題，但成隊波既上落節奏真係要加快，德國攻到落三閘線你班大帝都仲可以懶懶閒，真係入埋都唔夠輸。

厄瓜多爾 2 波蘭 0

唔好比場波既比數呃左，事實上兩隊都打出水準，要怨就只能怨波蘭臨尾十分鐘又中眉角又中柱，真係連運都輸埋。厄瓜多爾反擊快速，防線由Hurtado領軍好鬼穩陣，前面Delgado同C. Tenorio又打出水準，而且成隊體能一流步大力雄，真係抵佢地贏波的 (但總覺右閘De la Cruz有d過於高章，好怕佢會玩出事)。

唧死你

2006-06-07T01:40:00.000+08:00

近日本埠政界的話題作，首推華叔踢爆BT曾當年參加「民主歌聲獻中華」活動一事。從事件中可看出華叔不愧為搞政治鬥爭的老手 (傳聞佢年青時乃共產主義信徒也)，呢鋪一出手就玩到BT曾大出洋相。

成件事一開波，華叔只係拋出一句「BT曾當年有去跑馬地參加民主歌聲獻中華」，BT曾當然即時大加否認，表示當日冇見過華叔，亦從未參加支聯會舉辦的活動 (佢錯唔哂，當時支聯會的確尚未成立)。然後第二日華叔又爆多一句：「BT曾個日同埋佢個仔一齊黎」，BT曾就改口話當日的確有響跑馬地見過華叔，但只係咁岩去會所吃飯時偶遇佢既時候傾左兩句姐，仲話個仔可以做證添。好了，跟住今日又有當日有出席既戰友同義工指出當時馬場搞緊裝修所以會所根本冇開門，BT曾就回應稱事實勝於雄辯，佢不想再糾纏於「無證據」、「無厘頭」同埋「莫須有」既指控。噢，堂堂一位特首俾華叔耍到一棟都冇，你都咪話唔醜怪。

其實心水清者一眼就可看出華叔呢次只係用左一招「唧牙膏」策略，就玩到民望高企既BT曾樣衰左幾日。「唧牙膏」者，即逐小逐小地將手頭上既料放出黎 (當然前提係要手握堅料啦)：如果你諗住賭一鋪搏對家其實冇料扮四條所以唔認數，聽日我咪放多二兩出黎囉，但你如果怕衰選擇坦白從寬，又生怕一次過爆埋對家甚至全世界都唔知道既內幕出黎最後蝕哂章。換句話說，身有屎者真係講又唔係唔講又唔係，點搞都係死路一條。

唔好睇少呢一招看似簡單既「唧牙膏」策略，佢既殺傷力其實相當驚人。遠既唔講，近幾年死響呢一招手上既政客就有前尊貴議員情戒男同埋前財爺阿松，當然唔少得上年注目全城既車震賤男梁某。

所以各界友好，記住錯就要認，打就要企定。點解？因為十賭九輸囉。

****************************

頭先2230睇電視，見到亞洲電視三五台執死雞播埋個乜鬼「非禮投票」風波分析節目。唉，蛋散DJ梁某的確係抵死，但係一來佢已公開道歉，二來真係罪不致死，三五台繼徐步高事件後又一次抽水抽到咁低莊咁核突，難怪永遠俾人叫做「二奶台」。

****************************

低級趣味

2006-06-06T01:55:00.000+08:00

報載商業二台DJ梁某，在其節目中搞了個甚麼「十大我最想非禮的香港女藝人」投票。消息傳出後，梁某立被社會人士圍剿，直斥其做法有傷風化，更有婦女團體發起簽名運動，投訴梁某嚴重侮辱女性。呵呵呵呵，以為好過癮好好玩唄，梁某，你而家唔係響屋企同你班老友吹緊水，你係響大氣電波做緊節目丫，受過高等教育既你唔係咁都唔識分丫嘛？

唔好話我抽佢水，其實我早對這件經常以為自己幽默非常生鬼有趣的蛋散看不順眼。試看一下此人目前在無記主持的電視節目，當你看到他係唔係都「木」起個咀以為自己好有型，聽著他那三句唔埋兩句就哈哈哈哈胡亂叫囂一番的主持風格，加上那堆連陳幸煩個小王子都會覺得完全唔掂既無聊「爛gag」，就知我所言非虛。但可悲的是，根據年前的市場調查顯示，此君原來乃現時最受本港年青人歡迎的電台DJ，你話點線好？

如果第時我個仔女同我講「商業二台好好聽好好笑架老豆」，我肯定本埋條老命同佢死過。

良知

2006-06-04T05:00:00.000+08:00

十七年前的北京天安門廣場的凌晨，發生了「那件事」。

只須在鍵盤上按一下，儲存於電腦硬碟內的一切資料就能輕易清除，但我是一個人，一個有血有肉的普通人，就算你要我把腦袋裡的記憶徹底忘掉，我的良知仍會告訴我誰是誰非，誰對誰錯：對日本人發動的「南京大屠殺」尚且也要一年譴責三五七次，那對一群荷槍實彈的中國人暴力鎮壓另一群手無寸鐵的中國人，我們又應如何看待？

為戀愛平反

2006-05-28T02:00:00.000+08:00

很喜歡容祖兒《情歌的情歌》這段副歌歌詞：

「愛並非要來臨叫你感慨
是愛令這個平凡世界精彩
不要盡信苦惱皆因愛
它使生活帶著期待」

當今世途險惡，賤男橫行，尤以情愛作幌子的無賴為甚，但亦有不少拜金女憑藉自身幾分姿色，把裙下之臣玩弄於股掌，令一眾男女在未嘗到愛的甜頭以前，就早付出愛的代價，慘被弄得焦頭爛額，片體鱗傷，從此對「愛情」二字敬而遠之，信心盡失。唉，難怪愈來愈多人寧選單身也不願痴心錯付，免得日後醒覺頓悟之時才知回頭已是百年身，本想憑愛去換燦爛一生，最終卻只帶來永恆傷感。

有過去的男女啊，「經一事長一智」，就把以前承受的悲痛當成是人生的磨練好了。愛與被愛本乃美事一樁，錯只在於那幫不知廉恥的感情騙子而已。期盼你們早日康復，重新站起來，為戀愛平反。

時事雜感

2006-05-21T11:55:00.000+08:00

因考試封筆半月，想說的依然太多，但筆觸卻有生疏，惟有草草記下，免得感覺隨時間流逝。

「五一」勞動節梳打埠建築工人大遊行，與警方發生激烈衝突。從新聞片段所見，有示威者拎起鐵馬衝擊警方防線，反映港澳兩地示威人士經世貿一役後已盡得韓農精髓，真係不得不再次稱讚老董爭取舉辦世貿會議既苦心。
姑爺陶、尊貴的梁議員長毛先生同尊貴的陳議員大舊先生等人牽頭組成的「社會民主陣線」號稱為民主派的左翼份子。雖然立意良好，但如要成功搶佔泛民選票灘頭，恐怕第一件事係要多花心思改變大眾對佢地「有破壞冇建設」既負面印象，相信毓民響呢方面應該會有d橋的。
屯門那幫「曲藝發燒友」睇怕真係有少少發燒，我全力支持政府嚴打。無論佢地唱得好唔好，佢地當然都有操曲既自由，但個人自由的行使絕不能凌駕公眾利益。其實康文署早已作出讓步，響公園整左個乜鬼曲藝園地咁上下既表演場地俾佢地用咪唱個飽，但呢班發燒友就話個度個位置唔好，又要排兩三個月至有得用，又話響公園其他地方唔用咪唱d聲唔夠響唔夠靚，真係成語動畫廊之「貪得無厭」既最佳演繹。
港府推出區議會職能角色檢討諮詢，建議加強區議會對社區文康設施既管理，同埋每年用三億元設立「地區改善小工程」基金之類既小恩小惠，搞來搞去始終搔不著癢處。其實區議會如果冇實質既監察政府財政開支權力，同埋繼續受到《基本法》97條「非政權性地區諮詢組織」既制肘，睇怕以後都脫離唔到「吹水會」既路 (或者呢個至係政府既原意掛)。
民主黨「真兄弟」洩密事件其實沒甚大不了。香港個個政黨內部都肯定有不同路線同派別既分歧，只係本埠保守派政黨無論點嘈都好，到最尾阿爺一聲令下大家都要收聲而已。

面對現實≠接受現實

2006-04-30T04:33:00.000+08:00

前幾天看無記《星期二檔案》，談的是目前香港中學生之間盛行的補習風氣。

對於這種心態，其實用不著以非黑即白的二分法去衡量其好壞，皆因傳統文法中學和坊間補習學店的教學重點根本不同：前者強調全人發展與師生互動，後者著重應試技巧與答題策略。兩者有如蘋果與橙，有咩好比？

平心而論，補習學店近年把男女老幼高矮肥瘦全部包裝成「教育演員」之舉 (呼應乜叔乜sir乜哥乜姐之流的「財經演員」) 當然極不健康，但諷刺的是，任由我們的教育改革如何著力減少「一試定生死」帶給學生們的龐大壓力，又或如何增加校內評估和多元考核的成份，只要一日教育制度包含一套篩選機制和準則，當中就必然存有競爭，這是無可避免的現實。對於一個活在「萬般皆下品，惟有讀書高」期望下的十來歲公開試考生而言，會考或高考好可能是他們人生面對的第一個挑戰，如果補習學店可以讓考生們對公開試有更好的準備和更大的信心，而他們又願意在日常課堂外付出真金白銀和時間精神報讀那些雞精班貼題班保A保C保E班的話，在「不成功便成仁」的現實面前，他們又可如何抗衡？只要莘莘學子們能有所自覺，一方面明白補習學店課程的狹隘與其灌輸的功利思想的醜陋，另一方面努力擴闊自身的知識層面和生活經歷，補習學店也許並不是甚麼十惡不赦的洪水猛獸。

去年暑假看過《龍櫻》這套日劇，內容講述一個由阿部寬飾演的霉到痺律師到一所垃圾高校任教，並揚言要在一年內令該校五個讀唔成書毫無指望的廢柴青年考進東京大學，過程當然是一貫的日式熱血拚鬥，但令我最有印象的卻是主角在首集對學生們的訓話，大意是指社會的運作規則是由一群頭腦聰明的人所制訂，而身為既得利益者的他們自然不會把規則當中的不公平揭露出來，如果我們對此等規則感到不滿的話，最有效的解決辦法就是當上規則的制訂者。

要改變世界，就先要面對殘酷的現實。面對現實不代表接受現實，身處充滿不公平的世代，在我們未有能力和地位重建社會的遊戲秩序前，與其埋怨被世界遺棄和誤解呻到樹葉都落，倒不如選擇跳入世俗洪流，依著現存的遊戲規則走下去，直至有一天在社會找到一個較有影響力的位置才去實踐自己的想法。因為我相信，坐言起行，比「無厘著數齋talking boom boom」(有看近來早上五點重播的《笑聲救地球》嗎？) 更具說服力。

********************

致各車路士球迷：

敝人懷著「敵人的敵人就是朋友」之心，恭賀貴隊技術擊倒曼聯，得到英超聯冠軍。

一曼城球迷

********************

處境喜劇

2006-04-23T04:43:00.000+08:00

【註：為求有最佳效果，看這篇文章前請先開啟閣下電腦的揚聲器，然後按此連結繼續閱讀。】

看著現時無記播放那套主角一家間屋大到無倫一梯兩伙佔地全層的處境喜劇《高朋滿座》，總覺欠了一點甚麼似的，後來發覺我對該劇的「處境」原來毫無共鳴，難怪總提不起勁去多瞄一眼。

一般來說，「處境喜劇」乃一種主角性格轉變較少，以及場景數量和改變相對固定的完整獨立體。由於處境喜劇要求較為鮮明的人物性格，故此用作反映社會現實和諷刺時弊就最好不過，而對我等長於上世紀八十年代的香港仔來說，這類時事處境劇的代表作就首推無記播足六年的《香港八X》系列。

《香港八X》系列其時所反映的正是低下階層的現實寫照，亦是我最有回憶的舊劇集之一。劇中位於禮頓道一號那前鋪後居的小小「銀禧小食店」 (知道當年真正座落於禮頓道一號的是那家機構嗎？答中有獎。) 就是當年小市民的生活縮影：有抱打不平的小老闆懋叔、蠢得可愛的師奶順嫂、市儈勢利的經紀陳積、飛沙走奶的悟恩居士、貪小便宜的八婆牛嫂、胖得溫文的大學生斌仔和性格火爆的伙頭阿威等… 各人縱來自五湖四海，職業背景亦有所不同，但他們每晚都總會透過板斧不多的劇情，用那草根味十足的共同語言，嬉笑怒罵，不平則鳴，為當時日日做到無停手滿腹牢騷有怨無路訴的打工仔女每晚多添一道下飯菜。

可惜《香港八X》其後由於劇情變化不大，又或者民智漸開之故，導致收視江河日下，無記因此逐漸增加其肥皂劇成份 (例如社工阿萍可以一年換幾個男朋友) 與加入多位紅星客串 (例如劉德華、苗僑偉和張國榮等) 力圖挽回收視，可惜反而弄巧反拙，徒勞無功，最終在1986年中停播。

有學者分析指，由於電視有著為觀眾製造夢想的本質，而本地電視節目的主流觀眾群卻主要由教育程度和文化水平較遜的家庭主婦組成，所以香港的電視台編劇就會傾向製作帶有濃厚中產味道，反映中產價值的電視節目，皆因低下階層早把這套生活品味視為他們賣力向上流動時的最大精神寄託。看看近年的電視劇題材拍來拍去都是醫生律師醫生律師和醫生律師，主角個個唔係西裝骨骨走去fine dining聚埋飲wine，就係去「高而富」球場傾生意同relax一下，就知道這種中產心態投射在本地電視節目中的主導地位。

實不相瞞，三五台當初推出《喜有此理》之時，我曾對這套開宗明義打正小市民旗號的時事處境劇抱有期望，但當我看了三幾集後，見到阿鵬晚晚拎住份《喜有此報》大聲朗讀，然後又有元秋變森森，跟住又有啤酒May隔晚失憶，同埋最近試圖為每個角色加返條「情線」的肥皂劇式劇情後，就覺得《喜有此理》真係豈有此理，睇怕都係命不久矣。

比起「心繫家國」，其實我更屬於基層，「心繫草根」。

超越左右的「第三道路」

2006-04-22T04:18:00.000+08:00

從上一篇文章《烏托邦》的回應中，引發出一個值得探討的問題：「福利國家在當今世代還可行嗎？」

事實上，那種依靠不斷提高公共開支來干預市場運作的「大政府」舊左派思維，自上世紀七十年代初石油危機開始就已遭到世人唾棄，所以「福利國家」在今天的具體定義，我覺得應被視為一個「社會投資國家」。這概念由英國著名社會學家紀登斯 (Anthony Giddens) 在上世紀九十年代所提出，乃其「第三道路」 (The Third Way) 主張的一部分。

簡單來說，「第三道路」意指在傳統政治光譜向「左」走的共產主義與向「右」走的自由資本主義兩條道路以外，嘗試尋找一條中間偏左的新出路。就福利政策而言，「第三道路」一方面主張摒棄舊左派對計劃經濟的迷戀，另一方面承認自由市場的作用，透過增加市場彈性及加強對人力資本的投資來促進國家經濟領域創造財富的能力，藉以把自由經濟體系下因市場失衡而造成的不平等減至最低。換句話說，「社會投資國家」著眼的不再是如何把一個餅分派予不同需要的國民，而是如何增加餅的數量，讓更多國民受惠。

因此，在這套理論下，實行「福利國家」制度的可行性，除了取決於社會財富的分配效果，更重要的其實是政府在經濟產業政策上的角色和定位，所以要說服國民接受向弱勢社群提供比自由資本主義社會較為優厚的福利，就先要確保國家經濟能夠持續地穩步發展，但正正就是這個死穴，令起初曾有短暫榮光的「第三道路」，在2000年左右卻開始在歐陸失勢。

究其原因，在歐盟進一步開放和全球化的浪潮下，本土國民歸咎於大量移民的湧入，導致就業市場出現僧多粥少的現象，同時犯罪率和社會不同族群間的分化又轉趨惡化，經濟增長又未見起色，選民自然會對提倡「第三道路」的政黨投下不信任票，最終在三數年前右派成功反撲，於法國、西班牙和意大利等地重奪政權。

從理論角度來看，「社會投資國家」這個概念的確非常吸引，亦是社會主義者在全球資本主義浪潮的局限下，一次作出自我修正的漸進式更新，但如何將其付諸實踐，特別是如何理順福利政策與經濟政策的結構性矛盾，仍須一段長時間去探索。

烏托邦

2006-04-21T01:38:00.000+08:00

世界上有一個國家，有著如此全面的國民福利：

產婦在嬰兒出生後可得到嬰兒用品包裹或現金津貼，並享有263天產假，其間得到相等其66%的工資補助；
每個家庭的孩子可每月領取生活津貼直至17歲，單親家庭更可得到額外補助；
每個學生 (包括外國留學生) 在大學學士程度前均可享受免費義務教育，中小學實行每班人數少於20人的小班教學，並每人每日奉送乙份免費午餐，而大學生則享用每月相等2,500港元的學習津貼，並可按家庭狀況有所增加，同時亦有低息貸款以供選擇；
失業人士可領取基本失業補助金或與其原有工資掛鉤的補助；
所在國民均享有醫療保險待遇，普通病人購藥只須付藥價的50%，患有重病或長期病患者更只須付藥價的25%，甚至全額補助；
工傷者可得到全額藥費補助，養病期間更可繼續領取全額工資；及
所有年滿65歲的長者均有養老金，退休者更可額外領取相等原有工資60%的職工退休金。

與此同時，這個國家也有著如此高昂的稅率：

勞動人口的薪俸稅率及社會保險金徵收率合計為工資收入的44.2%；
消費稅稅率為28%；
資本收益稅稅率為22.9%；及
各種稅收合計佔每年國民生產總值 (GDP) 的46%。

換句話說，「羊毛出在羊身上」，這個國家用國民繳交的高昂稅收，藉以提供「從搖籃到墳墓」的福利全包宴，你願意到這個「福利國家」居住嗎？

這個國家叫芬蘭，是一個連續三年被評為全球最具競爭力的「福利國家」。

我不否定「物競天擇，適者生存」，因為這的確是促進社會和經濟向前走的動力，但任憑一個經濟體系如何成熟，我始終相信社會上總有競爭的失敗者。一個理想的國度，每個國民都應有著一份「人人生而平等」的人文主義精神：經濟能力較強的一群，透過政府把稅收作出社會資源再分配，藉以支持一套全面而平等的福利保障制度，無分彼此，令所有國民受惠。「今日我搵多d咪俾多d囉，第時老左班後生既又會養返我轉頭嘛」，學《大鬧廣昌隆》既大隻廣話齋：「幾好丫！」

一個地方，如果只一味強調個人能力和責任，是很冷漠和恐怖的。她的冷漠，在於對別人的不信任；她的恐怖，在於對別人欠缺一顆包容和關顧的同情心。

試試易地而處，將心比己，世界自會變得不一樣。

延伸閱讀：

《福利主義造就芬蘭IT盛世》- 明報區佩芬 2005年3月20日

漂亮的固執

2006-04-19T01:48:00.000+08:00

自數年前讀完屎片投身社會以來，今年再次以全職學生身份重返校園，印象最深刻的其中一幕是，有次上導修課時同學S表示自己上大學四年以來從未試過「走堂」後，同班十餘位同學隨即表示驚訝，而我則對他們的驚訝表示驚訝。

或許當今個人主義的極速膨脹對年輕一輩的影響真的太深，又或者學習機會唾手可得，我對現時部份大學生那種不知「自律」為何物的心態感到渾身不自在：不滿上課時間太早又對老師遲了下課感到不悅、難得皇恩大赦俾面晨早返學的話就算遲到也要先到Starbucks買杯咖啡才施施然走入課室、上課時如果不是把口同身邊的三五知己嘈嘈嘈嘈傾傾傾傾天南地北兩個鐘無視老師的存在，就是上演「肉體與靈魂抽離」- 肉身雖在但靈魂卻只想放學去邊度玩同邊個玩點樣玩 - 的真人表演、如果知道lecture內容是「唔駛考」的話，超過三分二學生就會自動人間蒸發，總之老子想點就點，更會視認真上課的學生為「阻住人發達」的麻煩異類。

我承認我是一個守舊的老餅，我相信一個「學生」的成績未必需要標青，但他的言行舉止卻必須切合自己的身份：不可走堂外上課更不可遲到早退、要留心聽書，要尊師重道，要尊重自己，更要尊重別人，這是我們從小開始就要學習和堅守的基本做人原則和要求。不要以為我食古不化，墨守成規，我不反對上課時氣氛可以輕輕鬆鬆鄧梓峰，但我卻至少明白「工作時工作，遊戲時遊戲」的重要之處。

平心而論，做學生要履行的責任只是把書讀好而已，如果這樣也要叫苦連天，未來的日子要怎麼過？不要以為老師對此等行為真的束手無策，十歲八歲尚可捉住你隻手教你寫字，對著成年人難道還要打要罵才知道個「醜」字點寫？離開校園這個保護網以後，試試日後繼續抱著這種習非成是，黑白不分的心態開工，保證出糧俾你個位老闆朝朝都會煮定蝦蝦蟹蟹俾你做早餐。

感謝神，讓我經歷到世界的大，自己的小，以及賜予我這份漂亮的固執。

三五台高層的智商

2006-04-12T03:15:00.000+08:00

致三五台高層楊某：

歡迎涉案人士家屬提供資料同疑點俾你地發死人財，等你地幫受害人翻案？

你個腦究竟係咪生係個屎忽度？

翻炒疑案拍劇　亞視盡發死人財
2006年4月11日星期一《東方日報》

亞視上個月製作《徐步高事件實錄》，重播出徐步高於01年參加《百萬富翁》的片段，節目未出街廣管局已收到602宗投訴，但觀眾邊鬧邊睇，節目收視達十五點，亞視食過翻尋味，落實開拍《香港疑案》，將徐步高殺警案搬上電視！

徐步高殺警案哄動全城，除了不少電影公司有意以此題材開戲外，有指亞視亦籌備開拍一齣劇集《香港疑案》，由飾演記者之劉綽琪，從採訪工作中查案，接觸多宗有疑點之案件，初步計劃「徐步高」部分會由陳展鵬飾演徐步高，為求逼真還會到尖沙咀案發現場拍攝槍戰過程，但因案件正排期上死因庭聆訊，為免妨礙司法公正，亞視打算待死因庭審結徐步高案後，即第一時間播出，希望能乘勢再創高收視。

《香港疑案》故事內容以一系列疑點重重之案件為主，除了殺警案外，還有「彭楚盈案」、「富商王德輝綁架案」及多年前之歐陽炳強的「紙盒藏屍案」等，望能透過多個角度再去重演案件，實行挑戰法律，幫受害人「翻案」。

否認挑戰法律

記者就消息向亞視戲劇及藝員營運部副總裁楊紹鴻求證，他承認正籌備《香港疑案》，對於挑戰法律，他說：「又唔可以話挑戰法律，響外國都有好多呢類型既節目，只係以唔同角度去睇件案，因為有關案件雖然已有判決，但仲係疑點重重，我相信觀眾都好有興趣深入d去睇，而我地會以實錄戲劇形式表達，所以我地好歡迎各方面人士，包括涉案人士之家人，向我地提供資料及各樣疑點，等我地拍得更加真實。」

對於有報道指警方禁止亞視開拍有關徐步高案之劇集，楊紹鴻否認說：「我地一直有同警方聯絡，無人阻止過我地拍呢部劇，我地會響兩個月內開拍！」

至於被派演徐步高之陳展鵬，對演出這角色甚有信心，他說：「做演員不能夠計較角色，d人一提徐步高，就諗到d負面野，但從另一個角度去睇，佢d家人覺得徐步高係個乖仔，難得有咁d題材，我亦好有興趣。」

格格不入的「國情教育」

2006-04-10T18:03:00.000+08:00

有聽過近來熱播的類流行曲《熱愛基本法》嗎？呵欠，一貫的老掉大牙，好悶。

《熱愛基本法》(按此收聽)

作曲：陳輝陽
填詞：鄭國江

李克勤：
這律法尊重它珍惜它欣賞它
你若要多認識請打開它

梁詠琪：
讓這律法保大家不偏倚不偏差
盼大眾肯定它真心不假

陳慧琳：大眾遵守基本法社會穩定
實踐鎖定一國兩制成就早得到承認

*李克勤：
你共我他或他都一起遵守它
以力勁保護它多加一把

梁詠琪：讓國越富家越豐想安邦先安家
既利國這利家共享榮華

陳慧琳：大眾擁帶基本法以它管和治
令到香港緊靠祖國延續新的機遇

合唱：國家每日強盛角色早肯定
香港祖國力拼繁盛且安定
全力以更大信心創美麗遠景
讓香港做到高度自治以創下了英明

這些偉大成就發揮新威力
崎嶇通過合作成就新的價值
有這大法香港與動力各界共勉可創造奇蹟
基本法熱愛基本法*

重覆*

一直堅持在香港推行「國情教育」的達官貴人們，想必是絕少 (甚至從未) 用心留意本地樂迷的主流喜好，以為找來陳輝陽整首編曲充滿華麗西洋宮廷味的K歌，加上那套國家強盛成就偉大社會繁榮民心安定的老套中式愛國歌詞，再找來三個流行歌手，就可令本地青少年忽然熱愛和熱唱《基本法》。須知道年青人愛K歌不僅愛它那容易上口的旋律，更愛當中我愛你但你不愛我愛的他不愛我卻有她仍然愛你始終愛我但她愛的你終於愛我到底你最愛我還是愛他等一聽到後就大叫哇好鬼中丫哇好有feel丫的所謂現代戀愛寫照，不中不西不倫不類的《熱愛基本法》，恐怕只會被青年人當成另一種噪音，被成年人當成另一個笑話而已。

自從上世紀四十年代二次大戰以後，香港一直只被各路過客視為避難所。1949年中共建國後，上海資本家和國民黨餘部大舉南下，他們有的懼怕「毛賊」的共產統治，有的則期待有朝一日能和「蔣匪」一起反攻大陸，其後大陸內亂頻繁，三反五反大躍進多快好省文化大革命炮轟司令部四人幫掌權，令南來的難民只把香港當成逃出生天的踏腳石，直至八十年代初本土意識開始醞釀之時，港人卻驚覺原來這裡只是我們借來的美夢，8964後更怕政權易手後到來的共產黨會把香港弄至陸沉。另一方面，當年港英的殖民統治心態對香港過去的歷史 (特別對日軍佔領香港三年零八個月那段黑色歲月)著墨根本不多，中小學生的社會科和EPA讀來讀去對香港只有單一印象：香港是一個從貿易轉口港發展成華洋雜處的國際城市的經濟奇蹟，甚麼國家認同民族身份愛國精神，「梳Li喎，學校冇教喎！」

在這種特殊的背景下，我等飲港英殖民奶水長大流著香港血的香港仔，不知不覺培養出一種被周佩霞和馬傑偉在《愛國‧政治審查》一書內形容為混雜殖民歷史和本土記憶的「多元國族意識」。香港人的「國家」觀念多年來呈真空狀態，而且中港兩地歷史經濟文化背景完全不同，我們卻要在回歸後突然被當權者從多角度高壓灌輸「中國是我們的祖國，中國人要愛祖國的天經地義的事」這類政治語言，一時間接受不了，甚至作出反彈乃自然不過的事，感覺就好似有日有個女人同個做左五十年孤兒仔既麻甩佬講：「我係你親生老母，你係咪好愛我呢？」大佬丫，就算我真係信我係你生出黎既，你都要俾少少時間我適應下至得架，話愛就愛咩？

或許不少香港人真的欠了一點演戲天分，所以永遠不能如部份港英餘孽一樣，在七百萬觀眾面前表演一幕又一幕「忽然愛國」的真人show。

再談我們的「中產」

2006-04-09T01:36:00.000+08:00

日前貼出的《我們的「中產」》一文回響不少，非常值得討論，故就各網友意見作出回應：

首先，有網友留言指香港的「中產」或許有種「憎人富貴厭人貧」的心態。根據不少社會學者觀察，本地「中產」階層雖則可能真的有點「厭人貧」，但有趣地他們卻從來沒有「憎人富貴」的怨恨心態，反之「中產」們不論對白手興家的生意大亨，抑或經過多重競爭後攀至社會高位的專業菁英，他們無不認為這一小撮傳統社會上等階層均是值得受到尊重的一群，更是他們的形象模範 (雖然普遍地在「中產」心目中專業菁英亦有高低之分：醫生律師為首，工程師建築師會計師次之，教師社工再次之，反而對在歐美社會地位不輕的新聞專業卻嗤之以鼻，你說有趣不有趣)。

此外，或許有人認為本地「中產」們不是不願意對弱勢社群作出承擔，他們不忿的只是自己日日做到無停手，卻眼見不少領取綜援人士唔駛開工日日可以去嘆茶之餘更可一年去九次旅行環遊世界。就此我想強調的是，世界上沒有一種制度是毫無漏洞的：法律制度如是，工作制度如是，綜援制度當然亦一樣，難道因為一套制度在執行上有不足之處以致未能堵塞每一個大小漏洞，我們就要一刀切地完全抹煞這套制度的存在必要嗎？我從不反對政府增加行政資源，藉以加強審批綜援申請的嚴謹度和打擊濫用綜援的力度，我亦不反對加強騙取綜援的罰則，但我們同時也不能不設實際地要求政府先行詳細審批每一個申領綜援個案後才批出申請，一方面因為行政上根本不可行，另一方面亦會動搖到「寧縱勿枉」的法治精神和社會公義的基本原則。

除此以外，我也相信「數字會說話」。首先，根據社會福利署網站列出的統計資料，截至本年2月28日領取綜援個案有297,557宗，而同期舉報「懷疑」詐騙綜援的數字則有4,257宗，屈指一算後發現「懷疑」詐騙綜援的個案只佔整體領取綜援個案的0.00143%，亦即一萬個領取綜援個案中只有1.43個「懷疑」懶人呃綜援的個案 (不要忘記當中可能有多於一人就同一個「懷疑」個案作出投訴)。其次，相對其他組別如「年老」、「永久性殘疾」和「健康欠佳」而言，目前領取綜援個案中最具工作能力 (亦即在常人眼中最有可能濫用綜援) 的類別應屬現時佔領取綜援個案13.7%的「失業」組別，但如果配合最新失業率5.2%或176,000人完全失業作分析，經常被「中產」一族評為要他們納重稅來支持的「養懶人」綜援制度卻把超過七成半 (77%) 的失業人士因不合資格申請或本人不願申請而拒諸門外，由此可見坊間「綜援養懶人」的主流說法仍然欠缺嚴謹的數據支持。

J2第6節 - 橫濱FC 1-0 水戶Hollyhock

2006-04-08T03:24:00.000+08:00

圖上：令人懷念的三之澤花見美景。

圖中：隊長城彰二本季終於開齋。

圖下：「三重縣第一美男」吉武剛。

戰況：
橫濱FC在主場出擊的優勢下全場控制戰局。上半場14分鐘，「三重縣第一美男」吉武剛把握對手門將武田博行擋出Augusto頭鎚不遠執死雞破網，為主隊先開紀錄，其後橫濱FC攻擊不斷，最終於75分鐘憑隊長前國腳城彰二接應今場表現活躍的Augusto右路開出的罰球跳頂入網，為橫濱FC奠定2-0的勝局。

橫濱FC現以三勝二和一負成績排第2位，下場將主場迎戰柏Reysol。

出場陣容：
GK：菅野孝憲
DF：中島崇典、早川知伸、Tweed、小野智吉
MF：吉武剛、山口素弘、內田智也、Augusto
FW：城彰二 (Izaias-83)、三浦知良 (富永英明-75)

入球：
吉武剛 (14、右腳、助攻：無)
城彰二 (75、頭鎚、助攻：Augusto)

黃牌：
山口素弘

寸評：
久違了的三連勝，並且係自2001年以來第一次排聯賽第2位 (雖然只係暫時)，配合埋當日主場三之澤公園既花見美景，足以令球迷開心半天。城彰二踢足6場後終於開齋。Augusto左Q打右邊表現活躍，全場製造不下四次具威脅攻勢，應該好快會搶返正選位置。球隊防守力暫時係J2最佳 (6場只失2球)，光頭仔菅野孝憲應記一功。

我們的「中產」

2006-04-04T23:44:00.000+08:00

由於新成立的公民黨被標榜成「中產黨」之故，令本港近日彷彿又再度掀起究竟何謂「中產」的討論，當中有幸拜讀教育學院專任導師崔偉恆刊登於上星期六明報一篇題為《是中產還是新的封建》的文章，對內裡提及的現象深表認同。

雖然學術界現在仍對界定中產階層的方法和指標眾說紛紜，但姑勿論採用最傳統的教育程度或個人收入，抑或用較為抽象的文化水平，本港所謂 (或自稱) 的中產一族卻普遍抱有這種心態：由於他們相信個人成就是全憑自身的個人努力爭取回來，所以完全接受汰弱留強，優勝劣敗的自由市場原則就是社會的必然運作模式，因此社會上的所謂「弱勢社群」不僅因為不夠勤奮，游手好閒才會招致失敗，更反要他們每年納重稅去養這班大食懶，但自己卻得不到絲毫福利。

各位自我感覺良好的「中產」諸公，當你們每天開工前到公司樓下間Starbucks同個職員講"Tall Latte and Cinnamon Danish no heat to go"的時候；當你們每天收工後大伙兒去打「高而富」球的時候 (雖然大部份人學來學去都只是學習如何發球，正如學踢足球只學射十二碼，又或學打籃球只學射罰球一樣有趣)；又或當你們每天返回自己那個名字裡總有"豪""園""皇""廷""峰""華""軒""臺""灣"是但一個字 (「臨兵鬥者皆陣列在前」？當然包括一時之選的「富豪海灣」和「君臨天下」) 的五星級的家的時候，你們又有否想過你們今日的成就，某程度上其實可歸功於港英政府在上世紀六七十年代開始推行如公屋計劃和九年免費教育等惠及大部份市民的社會福利政策，令你們可以慢慢在社會向上流動，從而晉身成「中產」？

事實上，我從未抹煞各位「中產」以往所付出的努力，但起碼三四十年的香港機會處處，只看你有沒有心機裝載：讀得成書的根本不愁出路，要想的只是做AO還是做「三師」吧，讀書不成也不打緊，至少可到工廠做做車衣鐘錶電子或QC，錢雖不多但至少可夠糊口。反觀現在卻有著天壤之別：你們說「知識就是力量」，但我卻看到成千上萬的副學士畢業生升學不成變做倔頭進士之餘更要揹負十萬八萬學生貸款；你們說打工仔要「終身學習」，但我卻看到工廠大量北移令勞工密集的低技術職位不足，導致中年失業者讀完七個再培訓課程學習學習再學習後仍要天天量地；你們說「綜援養懶人」，但在一小撮害群之馬背後，我卻看到更多從來沒抱怨半句不去問理由一個月搵得四千八養一家四口但仍不願申請綜援的勞動者。

「中產」呀「中產」，你們在追求番鬼品味之餘，又會否放下成見，嘗試同時追求西方中產階層那種對社會關懷、包容和爭取公義的人文精神和價值取向？

J2第5節 - Consadole札幌 0-1 橫濱FC

2006-03-30T01:26:00.000+08:00

圖：北村知隆(17)入球後與隊友慶祝，左起三浦叔叔(11)、山口素弘(6)、北村、內田智也(10)及城彰二(9)。

戰況：
主隊雖然開賽後就採取主動，但橫濱FC上半場卻於15分鐘憑藉一次反擊機會先開記錄。當時菅野孝憲手鎚打出主隊開出的角球後，內田智也搶得來球後策動反擊，在三打二的優勢下傳交右路的北村知隆，而後者在"cup"過和波智廣後亦不負所望以左腳一射破網。其後橫濱FC換入後衛早川知伸加強防守，配合山口素弘及Tweed領導中後場防線，最終一一瓦解主隊雙柱躉中鋒中山元氣與相川進也的凌厲攻勢力保勝果，為球隊締造二連勝。

橫濱FC現以二勝二和一負成績排第4位，下場將主場迎戰水戶Holly Hock。

出場陣容：
GK：菅野孝憲
DF：中島崇典、鄭容臺、Tweed、小野智吉
MF：北村知隆、山口素弘、內田智也、吉武剛
FW：三浦知良 (早川知伸-74)、城彰二

入球：
北村知隆 (15，左腳、助攻：內田智也)

黃牌：
吉武剛、小野智吉、鄭容臺

寸評：
橫濱FC打出本季最漂亮一仗，在只得攝氏5.4度既寒冷天氣下被札幌全場禁住攻都頂得住，好波。鄭容臺下場果然因為拎夠四張黃牌而要停賽，睇怕佢真係要學習如何減少犯規次數。內田智也連繫攻守，對球隊貢獻良多，佢同菅野考憲都係我地既未來希望，期待二人大鳴大放。最後都係個句，兩個過氣箭頭球星真係江河日下了，可惜可惜。

《笨賊占》系列之二

2006-03-28T13:51:00.000+08:00

誤以為女職員手持膠袋內有錢財
肥賊扑頭搶走三飯盒
2006年3月28日星期二《蘋果日報》

【本報訊】上環一名找換店女職員昨午身懷五萬多元人民幣鈔票，返回德輔道西店舖途中，遭肥胖賊人從後扑頭行劫。 賊人慌張間，誤將女事主一個盛載飯盒黑色膠袋當錢財袋搶走。 原來女職員的鈔票放進貼身斜袋幸保不失。女職員稱為免日後擔驚受怕，考慮辭工不幹。記者：胡恩宏

遇劫女子姓陳（二十一歲）於德輔道西九號「許氏兄弟外幣找換公司」工作，自言初上工時東主已叮囑外出存款出納要小心，務必看清楚前、後、左、右，慎防遭人跟蹤。她事後苦笑說：「當時自己已睇前睇左又睇右，就係忘記睇後面，加上落雨擔住傘，結果俾賊人搶劫！」

沒想過這麼危險

事件中陳女頭部並受損傷，只感到暈眩劇痛。她稱，個多月前經友人介紹到該店工作，負責在店內找換外幣，間中會外出存款，從沒想過這份工作這麼危險，經敷治後她已出院。至於該找換店負責人亦慶幸女職員輕傷而回及錢財未失，並稱吸取教訓日後考慮安排兩名職員同行以策安全。

消息稱，昨午十二時許，陳女按負責人吩咐，攜同一批現款到附近銀行存款，然後拿五萬元現款到德輔道中一家相熟找換店兌換五萬二千元人民幣。稍後她再到位於急庇利街同集團轄下分店，拿取三個由「包伙食」女工供應的飯盒後，返回德輔道西店舖。據知當時下微雨，她把五萬多元人民幣鈔票放進貼身的斜袋，一手拿雨傘，另一手拿盛載三個飯盒的黑色膠袋，冒雨由急庇利街前行至永樂街。

行蹤外洩遭跟蹤

 懷疑她的行蹤外洩，遭賊人跟蹤，賊人疑誤會她把財物放在黑色膠袋，一直啣尾跟隨，稍後趁陳女步至永樂街二百號一家海味店門外時，賊人終於下手從後以硬物扑頭向她行劫。陳女形容，當時「自己都唔知發生乜事，只覺得頭部一陣刺痛」，稍後才發現黑色膠袋遭搶走，並呼叫求救。附近海味店工人趕來扶起陳女及代為報警求救，救護員發現她頭部並無損傷流血，但因劇痛加上受驚過度需要送院。據目擊案發工人形容，疑匪約四十歲、五呎三吋高、穿啡色運動服。

亞洲電視三五台

2006-03-25T04:13:00.000+08:00

得聞亞洲電視三五台明晚將播映《徐步高事件實錄》，頓感此台長期積弱，果然自有其因。

據三五台某高層表示，由於公眾對此事有「知情權」，而該台又「碰巧」有一段徐君數年前參加《百萬富翁》遊戲節目的片段，故配合相關新聞片段以及邀請心理專家分析徐君性格製作一特備節目，並安排於明晚黃金時段播出。該高層還表示，節目播出時絕不會播出徐君妻子的片段，又只會中立地「如實報導」事件經過。

好一句「知情權」啊，多麼冠冕堂皇的藉口啊，多麼造福人群的亞洲電視三五台啊。

按我理解，「知情權」是指公眾用以抗衡政府信息壟斷和新聞封鎖的基本權利：凡是涉及國家重要事務和公民利益的事宜，國民就能透過運用「知情權」瞭解、監督和制衡執政當局的行為。

由此可見，「徐步高事件」跟香港市民的根本利益其實沒甚關係，說穿了，還不是三五台希望發個死人財而妄顧他人感受的涼薄行為？

三五台食飽飯等屎痾的高層們，你們知道「易地而處」的意思嗎？你們有想過徐君家人的感受嗎？你們又有想過受害者家人和其他警隊成員的感受嗎？死者已矣，就算生前犯下彌天大罪，但始終禍不及妻兒，為何三五台還要大言不慚地在別人傷口灑鹽？為何還要缺德地透過傳媒公器向徐君鞭屍？

亞洲電視三五台，果非浪得虛名 ─ 播放甚麼節目也只有「三五點」收視 (雖然好偶爾有三點加五點收視)，來來去去也只有那「三五張」面孔在插科打諢，而觀眾亦永遠在轉台到亞視後「三五分鐘」就想打爆個電視機。

我熱切希望亞洲電視早日執笠，到時我第一個拉banner慶祝。

《笨賊占》系列之一

2006-03-24T04:51:00.000+08:00

前警員帶病劫診所嘔吐物成基因證據
2006年3月23日星期四《明報》

【明報專訊】前警員偕同伴計劃打劫屋邨診所，當時的確抱恙，「候診」期間拿着膠袋嘔吐大作。他後來進入診症室，亮刀架着醫生的頸，掠去6500元後逃去，但他遺下的一袋嘔吐物卻成為了罪證。警方憑嘔吐物的基因確認被告的身分，一年多後採取拘捕。

因欠債辭職有盜竊案底

被告陳永生（29歲）昨日在高等法院承認搶劫罪及盜竊罪，還押候判。代表大律師今天將代為求情。控方昨透露，被告95年加入警隊為警員，隸屬中區警署，2000年因債台高築而自動辭職，之後任職油漆工人，有一次盜竊案底。

刀架醫生頸同伴指嚇妻

案情指，被告於03年6月與一名男子前往石硤尾邨西醫邱伯威的診所，當日被告身體不適，拿着膠袋嘔吐，其同伴代他用他人的身分證登記資料後，兩人坐下等候。

被告見醫生後，即亮出利刀，架着醫生的頸聲稱打劫，要對方交出所有金錢。與此同時，被告的同伴在接待處表明來意，用刀指着醫生的妻子，妻子昏倒。

劫6500元再提款2萬

醫生交出共6500元現金及錢包，被告與同伴得手後逃去，在太子地鐵站內，用醫生的提款卡提取2萬元。

警方接報後，在診所的廢物箱內發現一個盛有嘔吐物的膠袋，並在廁所找到兩把刀，進一步調查後拘捕被告。測試發現，嘔吐物的基因與被告脗合，被告亦在認人手續中被護士認出。

被告在警誡下承認在同伴提議下犯案，而當天自己真的抱恙﹔犯案後他與同伴失去聯絡，自己則已將分得的1.3萬元在內地花光。

【案件編號﹕HCCC69/05】

J2第4節 - 橫濱FC 1-0 山形Montedio

2006-03-23T17:06:00.000+08:00

圖：三浦叔叔主射十二碼一刻。

戰況：
今季首度以正選上陣既橫濱FC中場內田智也於上半場初段表現活躍，頻頻與右閘小野智吉在右路發難，但繼後客軍卻搶回優勢，先有氏原良二31分鐘的射門，後有34分鐘Leandro的單刀威脅，但全被本仗演出神勇的橫濱FC門將菅野孝憲一一化解。賽事轉捩點始於36分鐘橫濱FC於敵方左路禁區邊得開出罰球之際，敵方後衛內山俊彥於禁區內以手肘碰跌鄭容臺後直接被逐，而三浦知良亦不負眾望射入十二碼為主隊先開紀錄。下半場少打一人的山形雖然屢次由臼井幸平和佐佐木勇人於右路發動攻勢以求追平，可幸橫濱FC力保不失，最終獲得本季第一場勝仗。

橫濱FC現以一勝二和一負成績排第8位，下場將作客Consadole札幌。

出場陣容：
GK：菅野孝憲
DF：中島崇典、鄭容臺 (早川知伸-85)、Tweed、小野智吉
MF：吉武剛 (Augusto-76)、山口素弘、吉野智行、內田智也
FW：三浦知良 (北村知隆-65)、城彰二

入球：
三浦知良 (36，十二碼、助攻：鄭容臺)

黃牌：
城彰二、鄭容臺、Tweed、中島崇典

寸評：
踢左四場全隊既前鋒加埋只係射門16次入一球咁大把 (仲要係三浦叔叔既十二碼)，明顯一方面中場輸送不足，另方面前鋒們既決定力亦好有問題，可幸有今場復任正選打右中場既細粒仔內田智也同菅野孝憲撐場至可以打開本季聯賽勝利之門。此外從一對中堅鄭容臺同Tweed已分別拎左三張同兩張黃牌可以睇到，一係前面打防守中場既山口素弘未能有效阻截對手進攻，一係佢地兩個體力或實力不足所以成日要作出超技術攔截，兩者都令人擔心。

Life continues...

2006-03-22T21:50:00.000+08:00

陳醫生的《最佳損友》有這句歌詞：「為何舊知己，在最後變不到老友？」

少年不識愁滋味，了無牽掛，自會把友情無限放大成生活之全部，總覺身邊死黨好比世上任何人，亦主觀地期望好友把我看成出死入生的好兄弟，就算樓底這夜倒下來，身旁總有你鼓勵。

然而人大了亦成熟了，走出校園後經歷際遇各自各精彩，處身的世界愈來愈複雜，需要兼顧的範疇愈來愈多，但與昔日戰友的交集卻愈來愈少，碰面只道天涼好個秋，老友我撐你，但我點幫你？從前共你促膝把酒傾通宵都不夠的日子如今只可追憶到，想追卻永遠追不到。

友情，在我眼中，跟其他感情一樣，都是窮半生精力都沒可能算清的賬，沒有絕對的勝負對錯，亦無人得知何時開始何時終結，只知道付出不等於有回報。既然世上從來沒有逆轉時間的鑰匙，逝去了的都已逝去，何不選擇珍惜現在，放眼將來？正如陳醫生的EP名稱一樣：《Life continues》─ 明天，仍要繼續。

走著瞧

2006-03-19T17:25:00.000+08:00

由上層社會菁英及知識份子所組成的泛民主派政團公民黨今日正式宣佈成立，提出維護人權法治、推動民主進程、爭取盡快達致全面普選、保障弱勢社群權益以及建設公平公義社會五個黨綱理念，並揚言會以執政黨作為參政目標。

或許這就是傳統社會菁英的一份情意結，總覺得自己背負著「取諸社會，用諸社會」的龐大道德責任：參政是為了普天下蒼生的福祉和未來，問政時亦要處處展露知識份子應有的理性、客觀和持平，才算對得起自己的身份。

可惜我們的政治現實是殘酷的，在目前的鳥籠政治制度下，各級參政者充其量可做的就只是有限度地監察政府政策的制訂和執行，不是嗎？立法會地區直選的比例代表制、立法會的分組點票機制，以及有限的議員條例草案提案權這些關卡，無一不令六十位尊貴的立法會議員綁手綁腳，更遑論在中共的統治下透過參選特首執政，從而實踐自身的政治理念，因此本港上至尊貴的立法會議員，下至十八區的幾百個區議員，無論左中右老中青，宏觀來說其實全都只屬「有破壞，無建設」的反對派，亦正因如此，本港各政治黨派在社會民生的議題上分歧根本不大，談的政綱亦出奇地大同小異，你說香港過癮不過癮？

在這個背景下，公民黨的出現更叫人擔心泛民主派在地區直選中「塘水滾塘魚」的問題進一步加劇，如何開拓新票源和爭取中間派選民的支持，藉以突破現時泛民主派與保守派的六四得票比例，成為泛民主派必須面對的一大課題。

但願公民黨諸公如願以償，祝君好運，阿門。

J2第3節 - 德島Vortis 1-1 橫濱FC

2006-03-19T02:11:00.000+08:00

圖：橫濱FC小野智吉(18)與對手角力，後為隊友內田智也(10)。

戰況:
上半場雙方互有攻守，橫濱FC本來更有一大好機會結束入球荒，可惜三浦知良被德島防守中場秋葉忠宏力壓下未能將隊友既右路傳中轉化成入球，德島其後更有兩次具威脅既攻門，好彩門將菅野孝憲演出水準，橫濱FC上半場最終力保不失，但下半場開波兩分鐘就被對手中場球員伊藤彰既頭鎚先開紀錄。失球後橫濱FC立即換入中場內田智也，球隊亦逐漸奪回控球權，並於62分鐘憑蘇格蘭中堅Tweed接應右閘小野智吉既傳中球頭鎚破網追成1:1，其後戰情雖然緊張，但兩隊因把握力不足而未能增添紀錄，最終握手言和，各得一分。

橫濱FC現時以兩和一負成績排聯賽第10位，下星期三會主場迎戰Montedio山形。

出場陣容：
GK: 菅野孝憲
DF: 中島崇典、鄭容臺、Tweed、小野智吉
MF: Augusto (內田智也-56)、山口素弘、吉野智行、吉武剛 (北村知隆-83)
FW: 城彰二、三浦知良 (富永英明-65)

入球：
Tweed (62，頭鎚，助攻：小野智吉)

黃牌：
鄭容臺、Tweed

寸評：
我地竟然要靠一個後衛至入到今季聯賽第一個入球，睇怕真係要諗諗計加強攻力至掂，單靠過氣孖寶城彰二同三浦叔叔肯定係死路一條。我諗極都唔明，點解球隊寧願將明明係後衛腳既富永英明擺上前面死滾爛滾，都唔肯搵個正印前鋒返黎掛帥，真係睇到眼火爆。另外自從高木琢也走馬上任以後，本來有正選打既新仔金澤大輔，以及新加盟既巴西前鋒Izaias連續兩場後備都冇份，看來佢地可能未必得到新阿頭既歡心了。

九鐵鬧劇

2006-03-17T00:16:00.000+08:00

一場反智到極點的九鐵鬧劇，總算暫時落幕。

平心而論，田二少那種不可一世的打救世人心態又真係要不得，但以黎先生為首既九鐵高層亦離譜得可怕，所以最終大家一鑊熟既結果都不算意外。

我反而覺得呢場鬧劇其實正正反映出咱們根深柢固既傳統思想：欺君犯上既叛徒必不得好死，要麼人頭落地，要麼就放逐邊彊，永無例外，而且聽聞以黎先生呢位數佬既性格，根本唔會夠guts搞壇大龍鳳出黎，呢鋪睇怕都有高人背後發功，指指點點，看來好戲還在後頭。另外亦不得不對一字排開個廿件押錯寶既九鐵總經理高舉姆指，佢地充分演繹出何謂義氣仔女既"哂馬精神"，如果佢地好似林海峰話齌，一個二個"咩丫！咩丫！"咁樣嗌埋出黎，應該更有效果。

都係記者朋友K說得對：一個人越在高位，智商就會越低。

哈哈哈，真係喜有此理，此有喜理丫。

承擔

2006-03-16T05:05:00.000+08:00

林海峰曾經講過，《男子組》呢首歌講野既係「承擔」兩個字。

認識林海峰，始於九十年代初既《老人苑》，當時年紀尚輕，從佢玩電話既功架當中，只覺得佢既"轉數"比葛民輝高，而佢個種"串串貢"的態度亦總令我覺得佢比葛民輝少了一份平易近人的親切感，心想呢條友睇怕都唔慌好人，一味死剩把口。

誰料年紀愈大，就愈發覺林海峰那種嗒落有味的風格，正合我的何車。我唔係甚麼潮爆人，不懂得林海峰在設計界和潮流界的成績有多高，我只係從佢既歌曲當中，看到呢條友做野唔單只得把口，更係有心有信心個隻多元化藝人，即係俗話說的"有heart"。

不是嗎？《男子組》就正正是我的心頭好。人，尤其係男人，始終要長大，終須要成熟：從被照顧到照顧別人，從被保護到保護別人，從屋企最細個件到一家之主，從攤大手板問父母羅零用到供養父母，當中總有growing pain。男人條命就係咁難捱，對自己負責，更要對別人負責：唔單只要對伴侶同家人好，更有時刻有顆爭取公義既心，唔係要你拋頭顱灑熱血，但至少要入世地從社會中來，到社會中去，挺身而出，據理力爭，仲要信守承諾，講得出就要做得到，開工也好返學也好，都絕對唔可以渣流灘，呢d就係男人的感慨，我們的承擔，除左"振振兩臂拍拍背肌"咬緊牙關衝衝衝以外，別無他選。

如果閣下只想永遠活在青春期，我會睇你唔起。

話時話，唔知林海峰有冇送佢隻碟俾佢個位身為喜劇泰斗，極有「承擔」既好細佬呢？

董建華的國際視野

2006-03-14T21:43:00.001+08:00

還記得去年WTO會議舉行時，不少市民怨聲載道，大力批評當年老董及唐唐好大喜功，為省靚那塊邏輯上充滿矛盾既「亞洲國際都會」牌匾而爭左舊蘇州屎返黎，最後搞到灣仔被以韓農為首的示威者弄得腥風血雨，一片混亂。

但係如果睇返之後幾個月香港各大小團體既示威活動，深深受到韓農啟迪以後，就會睇到老董既國際視野：佢唔只希望香港成為「動感之都」，其實更加希望香港能成為名符其實的「示威之都」，所以來一招曲線教育，讓我等庶民大開眼界，繼而自省努力查找示威方式的不足。

自從上年年尾百幾個韓農不懼天寒地凍於灣仔海傍上演跳海示威後，本地各示威人士立即有如被周星星用天眼通點化一樣，一個二個有樣學樣。自韓農去後，印象中都試過有唔同團體以跳海明志，好似今日又有三幾個雞農跳海抗議周一鑊既殺雞政策，你話老董係咪用心良苦呢？

都話左老董真係日日夜夜都諗住為香港好架啦，係你地唔信佢之嘛。

第一次

2006-03-13T03:46:00.000+08:00

其實一直有寫部落格的想法。

作為一個口水佬，日頭猛做食過晚飯滿腹牢騷實乃自然又合理之事，雖則每晚總有人願當我的忠實聽眾，惟獨樂樂不如眾樂樂，所以把心一橫，坐言起行，一於開blog作法，將日常的維園阿伯式言論cyber化，為自己作證。

將這地盤命名為「單打」，既指單人匹馬大唱獨腳戲，亦指以文字就身邊的人和事嘻笑怒罵一番。當然，本部落格純為個人意見節目，你我他的想法未必一致，故此歡迎各路人馬賜教，多多交流。

請請。

Category：《笨賊占》系列

2006-03-12T04:35:00.000+08:00

Category：橫濱FC

2006-03-12T04:34:00.000+08:00

Category：娛樂直播

2006-03-12T04:32:00.000+08:00

Category：無病呻吟

2006-03-12T04:30:00.000+08:00

Category：維園阿伯

2006-03-12T04:08:00.000+08:00